- అథ్లెట్ల ఖాతాలో జమచేయనున్న శాట్స్‌
నవతెలంగాణ, హైదరాబాద్‌ : 36వ జాతీయ క్రీడల్లో పతకాలు సాధించిన క్రీడాకారులకు తెలంగాణ ప్రభుత్వం నగదు బహుమానం ప్రకటించింది. అక్టోబర్‌ 12న గుజరాత్‌ వేదికగా ముగిసిన జాతీయ క్రీడల్లో తెలంగాణ క్రీడాకారులు 23 పతకాలు సాధించారు. పతకాల పట్టికలో తెలంగాణ రాష్ట్రం 15వ స్థానం సంపాదించింది. పలు క్రీడల్లో అత్యుత్తమ ప్రదర్శన కనబర్చి పతకాలు సాధించిన రాష్ట్ర క్రీడాకారులను క్రీడాశాఖ మంత్రి వి. శ్రీనివాస్‌గౌడ్‌, శాట్స్‌ చైర్మన్‌ అల్లీపురం వెంకటేశ్వర్‌ రెడ్డి ఘనంగా సన్మానించారు. ఈ సందర్భంగా పతక విజేతలకు ప్రైజ్‌మనీ చెక్‌లను సైతం అందజేశారు. పసిడి పతకం సాధించిన క్రీడాకారులకు రూ.5 లక్షలు, రజత పతకం సాధించిన క్రీడాకారులకు రూ.3 లక్షలు, కాంస్య పతకం సాధించిన క్రీడాకారులకు రూ.2 లక్షల చొప్పున ప్రకటించారు. ఈ మేరకు పతకాలు సాధించిన క్రీడాకారుల ఖాతాల్లోకి నేరుగా నగదు బదిలీ చేయాలని మంత్రి శాట్స్‌ అధికారులను ఆదేశించారు.