- బంగ్లాదేశ్‌పై భారీ విజయం
సిడ్నీ : రీలె రౌసో (109, 56 బంతుల్లో 7 ఫోర్లు, 8 సిక్స్‌లు) శతక విహారానికి తోడు క్వింటన్‌ డికాక్‌ (63, 38 బంతుల్లో 7 ఫోర్లు, 3 సిక్స్‌లు) ధనాధన్‌ మోత మోగించటంతో బంగ్లాదేశ్‌పై దక్షిణాఫ్రికా భారీ విజయాన్ని సాధించింది. ఐసీసీ టీ20 ప్రపంచకప్‌ సూపర్‌12 గ్రూప్‌-2లో భాగంగా గురువారం సిడ్నీలో బంగ్లాదేశ్‌పై దక్షిణాఫ్రికా 104 పరుగుల తేడాతో గెలుపొందింది. తొలుత బ్యాటింగ్‌ చేసిన దక్షిణాఫ్రికా 20 ఓవర్లలో 5 వికెట్లకు 205 పరుగుల భారీ స్కోరు నమోదు చేసింది. ఓపెనర్‌ డికాక్‌ (63),రీలె రౌసో (109) రెండో వికెట్‌కు భారీ భాగస్వామ్యం నమోదు చేశారు. ఈ ఇద్దరి మెరుపులతో సఫారీలు తొలుత భారీ స్కోరు అందుకున్నారు. సఫారీ పేసర్లు నోకియా (4/10), స్పిన్నర్‌ షంషి (3/20) విజృంభించటంతో ఛేదనలో బంగ్లాదేశ్‌ 16.3 ఓవర్లలో 101 పరుగులకే కుప్పకూలింది. ఆ జట్టులో లిటన్‌ దాస్‌ (34), సౌమ్య సర్కార్‌ (15), మిరాజ్‌ (11), టస్కిన్‌ (10)లు రెండెంకల స్కోరు అందుకోగలిగారు. 104 పరుగుల భారీ విజయంతో దక్షిణాఫ్రికా నెట్‌ రన్‌రేట్‌ను భారీగా పెంచుకుంది. శతక వీరుడు రీలే రౌసో 'మ్యాన్‌ ఆఫ్‌ ది మ్యాచ్‌'గా నిలిచాడు.