- నెదర్లాండ్స్‌పై భారత్‌ ఏకపక్ష విజయం
- విరాట్‌, సూర్య, రోహిత్‌ అర్థ సెంచరీలు
- భువనేశ్వర్‌, అశ్విన్‌, అక్షర్‌ వికెట్ల జాతర
పసికూనపై ప్రతాపం!. నెదర్లాండ్స్‌పై భారత్‌ ఏకపక్ష విజయం సాధించింది. 2022 ఐసీసీ టీ20 ప్రపంచకప్‌ సూపర్‌ 12 దశలో టీమ్‌ ఇండియా వరుసగా రెండో విజయం నమోదు చేసింది. గ్రూప్‌-2లో అగ్రస్థానం కైవసం చేసుకుంది. విరాట్‌ కోహ్లి (62 నాటౌట్‌), రోహిత్‌ శర్మ (53), సూర్యకుమార్‌ యాదవ్‌ (51 నాటౌట్‌) అర్థ సెంచరీలతో భారత్‌కు మంచి స్కోరు అందించారు. భువనేశ్వర్‌ కుమార్‌, అక్షర్‌ పటేల్‌, అర్షదీప్‌ సింగ్‌, రవిచంద్రన్‌ అశ్విన్‌లు వికెట్ల వేటలో విజృంభించి భారత్‌కు భారీ విజయాన్ని కట్టబెట్టారు. నెదర్లాండ్స్‌పై 56 పరుగుల తేడాతో గెలుపొందిన టీమ్‌ ఇండియా.. నెట్‌రన్‌రేట్‌ను సైతం భారీగా మెరుగుపర్చుకుంది.
నవతెలంగాణ-సిడ్నీ
విరాట్‌ కోహ్లి (62 నాటౌట్‌, 44 బంతుల్లో 3 ఫోర్లు, 2 సిక్స్‌లు), సూర్యకుమార్‌ యాదవ్‌ (51 నాటౌట్‌, 25 బంతుల్లో 7 ఫోర్లు, 1 సిక్స్‌), రోహిత్‌ శర్మ (53, 39 బంతుల్లో 4 ఫోర్లు, 3 సిక్స్‌లు) త్రయం అర్థ సెంచరీల మోత మోగించారు. భువనేశ్వర్‌ కుమార్‌ (2/9), అక్షర్‌ పటేల్‌ (2/18), రవిచంద్రన్‌ అశ్విన్‌ (2/21), అర్షదీప్‌ సింగ్‌ (2/37) రెండేసి వికెట్లు పడగొట్టారు. ఇటు బ్యాటింగ్‌, ఇటు బౌలింగ్‌లో టీమ్‌ ఇండియా సంపూర్ణ ఆధిపత్యం చెలాయించింది. దీంతో ఐసీసీ టీ20 ప్రపంచకప్‌ సూపర్‌ 12 గ్రూప్‌-2లో నెదర్లాండ్స్‌పై భారత్‌ 56 పరుగుల తేడాతో భారీ విజయాన్ని సొంతం చేసుకుంది. విరాట్‌, సూర్య, రోహిత్‌ త్రయం మెరుపులతో తొలుత భారత్‌ 20 ఓవర్లలో 2 వికెట్లకు 179 పరుగులు చేసింది. ఛేదనలో నెదర్లాండ్స్‌ 20 ఓవర్లలో 9 వికెట్లకు 123 పరుగులకే పరిమితమైంది. సూర్యకుమార్‌ యాదవ్‌ 'మ్యాన్‌ ఆఫ్‌ ది మ్యాచ్‌' అవార్డు అందుకున్నాడు. సూపర్‌12 గ్రూప్‌-2లో భారత్‌ తన తర్వాతి మ్యాచ్‌లో దక్షిణాఫ్రికాతో తలపడనుంది. అక్టోబర్‌ 30 (ఆదివారం) పెర్త్‌ వేదికగా సఫారీలతో భారత్‌ కీలక మ్యాచ్‌కు సిద్ధం కానుంది.
ముగ్గురు మొనగాళ్లు!
టాస్‌ నెగ్గిన భారత్‌ తొలుత బ్యాటింగ్‌ ఎంచుకుంది. సిడ్నీ మైదానం భారత్‌, నెదర్లాండ్స్‌ మ్యాచ్‌కు కాస్త నెమ్మదించింది. దీంతో పవర్‌ప్లేలో స్లో పిచ్‌పై భారత్‌ వేగంగా పరుగులు చేయలేకపోయింది. ఓపెనర్‌ కెఎల్‌ రాహుల్‌ (9) ఆరంభంలోనే వికెట్‌ పారేసుకున్నాడు. మీకరెన్‌ ఓవర్లో ఎల్బీగా నిష్క్రమించాడు. రోహిత్‌ సమీక్షకు వెళ్లమని సూచించినా.. రాహుల్‌ నిరాకరించాడు. కానీ రిప్లేలో బంతి లెగ్‌ వికెట్‌కు దూరంగా వెళ్తోందని తెలిసింది. కెప్టెన్‌ రోహిత్‌ శర్మ (53) ఆరంభంలో తడబడ్డాడు. దూకుడుగా ఆడలేదు. రోహిత్‌ శర్మ ఇచ్చిన రెండు క్యాచులను సైతం డచ్‌ ఫీల్డర్లు నేలపాలు చేశారు. నాలుగు ఫోర్లు, మూడు సిక్సర్ల సాయంతో 35 బంతుల్లో అర్థ సెంచరీ బాదిన రోహిత్‌ శర్మ.. తొలి పది ఓవర్లలో భారత్‌కు మెరుగైన స్కోరు అందించాడు. విరాట్‌ కోహ్లి (62 నాటౌట్‌)తో జతకట్టిన సూర్యకుమార్‌ యాదవ్‌ (51 నాటౌట్‌) అదరగొట్టాడు. కోహ్లి, సూర్య జోడీ మరోసారి మెరుపు భాగస్వామ్యం నమోదు చేసింది. మూడో వికెట్‌కు అజేయంగా ఈ జోడీ 95 పరుగులు జోడించింది. కోహ్లి ఆరంభంలో నెమ్మదిగా ఆడినా.. క్రీజులో కుదురుకున్న అనంతరం జోరందుకున్నాడు. సంప్రదాయ షాట్లతో మెరుపు సిక్సర్లు సంధించాడు. ఇక సూర్యకుమార్‌ యాదవ్‌ పూర్తిగా భిన్నంగా కనిపించాడు. సహచర బ్యాటర్లు తడబడిన పిచ్‌పై అలవోకగా పరుగులు పిండుకున్నాడు. మిడిల్‌ ఓవర్లలో కోహ్లి బౌండరీలు సాధించలేదు. ఈ సమయంలో సూర్యకుమార్‌ యాదవ్‌ ఆ బాధ్యత తీసుకున్నాడు. క్రమం తప్పకుండా బౌండరీలు పిండుకున్నాడు. ఇన్నింగ్స్‌ చివరి బంతిని సిక్సర్‌గా మలచిన సూర్యకుమార్‌ యాదవ్‌ 25 బంతుల్లోనే అర్థ సెంచరీ పూర్తి చేశాడు. ఇక విరాట్‌ కోహ్లి సైతం ఐసీసీ టీ20 ప్రపంచకప్‌లో రికార్డు 12వ అర్థ సెంచరీ పూర్తి చేసుకున్నాడు. మూడు ఫోర్లు, ఓ సిక్సర్‌తో 37 బంతుల్లో విరాట్‌ కోహ్లి అర్థ సెంచరీ మార్క్‌ చేరుకున్నాడు. ఐసీసీ టీ20 ప్రపంచకప్‌లో అత్యధిక పరుగులు చేసిన జాబితాలో మహేళ జయవర్థనె తర్వాతి స్థానంలో నిలిచాడు. ఇక నెదర్లాండ్స్‌ బౌలర్లు విశేషంగా ఆకట్టుకున్నారు. స్లో పిచ్‌పై భారత బ్యాటర్లు విధ్వంసం సృష్టించకుండా అడ్డుకున్నారు. ఇక ఫీల్డింగ్‌లో కొన్ని క్యాచులు మినహా డచ్‌ ఆటగాళ్లు వీక్షకులను మెప్పించారు.
దండెత్తిన బౌలర్లు
180 పరుగుల ఛేదనలో నెదర్లాండ్స్‌ ఏ దశలోనూ లక్ష్యం దిశగా సాగలేదు. పవర్‌ప్లేలో భువనేశ్వర్‌ కుమార్‌ (2/9) ఏకంగా రెండు మెయిడిన్‌ ఓవర్లు వేశాడు. అక్కడితోనే డచ్‌ జట్టు నైరాశ్యంలోకి వెళ్లిపోయింది. పదునైన భారత బౌలింగ్‌ దాడిని నిలువరించి..డచ్‌ బ్యాటర్లు ఎవరూ ఆకట్టుకునే రీతిలో పరుగులు సాధించలేదు. విక్రమ్‌జిత్‌ సింగ్‌ (1) భువనేశ్వర్‌కు వికెట్‌ కోల్పోయాడు. మాక్స్‌ (16), బాస్‌ డి లీడె (16), కొలిన్‌ ఏకర్‌మ్యాన్‌ (17), టిమ్‌ ఫ్రింగిల్‌ (20)లు పరుగులు సాధించినా.. పరిస్థితులకు తగిన విధంగా ఆడలేదు. టామ్‌ కూపర్‌ (9), స్కాట్‌ ఎడ్వర్డ్స్‌ (5), లాగాన్‌ బీక్‌ (3) తేలిపోయారు. చివర్లో అహ్మద్‌ (16 నాటౌట్‌), మీకరెన్‌ (14 నాటౌట్‌) ఓటమి అంతరాన్ని కుదించారు. స్పిన్నర్లు అక్షర్‌ పటేల్‌, రవిచంద్రన్‌ అశ్విన్‌లు ఎనిమిది ఓవర్లలో 39 పరుగులకే నాలుగు వికెట్లు పడగొట్టారు. పేసర్లు భువనేశ్వర్‌ కుమార్‌, అర్షదీప్‌ సింగ్‌, మహ్మద్‌ షమి సైతం వికెట్ల జాతరలో రెచ్చిపోయారు. 20 ఓవర్ల పాటు క్రీజులో నిలిచిన నెదర్లాండ్స్‌ 123 పరుగులే చేయగల్గింది. 56 పరుగుల తేడాతో భారత్‌ భారీ విజయాన్ని ఖాతాలో వేసుకుంది.
స్కోరు వివరాలు
భారత్‌ ఇన్నింగ్స్‌ : కెఎల్‌ రాహుల్‌ (ఎల్బీ) వాన్‌ మీకరెన్‌ 9, రోహిత్‌ శర్మ (సి) ఏకర్‌మ్యాన్‌ (బి) ఫ్రెడ్‌ క్లాసెన్‌ 53, విరాట్‌ కోహ్లి నాటౌట్‌ 62, సూర్యకుమార్‌ యాదవ్‌ నాటౌట్‌ 51, ఎక్స్‌ట్రాలు : 4, మొత్తం : (20 ఓవర్లలో 2 వికెట్లకు) 179.
వికెట్ల పతనం : 1-11, 2-84.
బౌలింగ్‌ : ఫ్రెడ్‌ క్లాసెన్‌ 4-0-33-1, టిమ్‌ ఫ్రింగిల్‌ 4-0-30-0, వాన్‌ మీకరెన్‌ 4-0-32-1, బాస్‌ డె లీడె 3-0-33-0, వాన్‌ బీక్‌ 4-0-45-0, షరిజ్‌ అహ్మద్‌ 1-0-5-0.
నెదర్లాండ్స్‌ ఇన్నింగ్స్‌ : విక్రమజిత్‌ సింగ్‌ (బి) భువనేశ్వర్‌ కుమార్‌ 1, మాక్స్‌ ఓడౌడ్‌ (బి) అక్షర్‌ పటేల్‌ 16, బాస్‌ డి లెడె (సి) హార్దిక్‌ పాండ్య (బి) అక్షర్‌ పటేల్‌ 16, కొలిన్‌ ఏకర్‌మ్యాన్‌ (సి) అక్షర్‌ పటేల్‌ (బి) రవిచంద్రన్‌ అశ్విన్‌ 17, టాప్‌ కూపర్‌ (సి) దీపక్‌ హుడా (బి) అశ్విన్‌ 9, స్కాట్‌ ఎడ్వర్డ్స్‌ (సి) దీపక్‌ హుడా (బి) భువనేశ్వర్‌ కుమార్‌ 5, టిమ్‌ ఫ్రింగిల్‌ (సి) విరాట్‌ కోహ్లి (బి) మహ్మద్‌ షమి 20, లాగాన్‌ వాన్‌ బీక్‌ (సి) దినేశ్‌ కార్తీక్‌ (బి) అర్షదీప్‌ సింగ్‌ 3, షరిజ్‌ అహ్మద్‌ నాటౌట్‌ 16, ఫ్రెడ్‌ క్లాసెన్‌ (ఎల్బీ) అర్షదీప్‌ సింగ్‌ 0, పాల్‌ వాన్‌ మీకరెన్‌ నాటౌట్‌ 14, ఎక్స్‌ట్రాలు : 6, మొత్తం : (20 ఓవర్లలో 9 వికెట్లకు) 123.
వికెట్ల పతనం : 1-11, 2-20, 3-47, 4-62, 5-63, 6-87, 7-89, 8-101, 9-101.
బౌలింగ్‌ : భువనేశ్వర్‌ కుమార్‌ 3-2-9-2, అర్షదీప్‌ సింగ్‌ 4-0-37-2, మహ్మద్‌ షమి 4-0-27-1, అక్షర్‌ పటేల్‌ 4-0-18-2, హార్దిక్‌ పాండ్య 1-0-9-0, రవిచంద్రన్‌ అశ్విన్‌ 4-0-21-2.
