- సోషల్‌ మీడియాలో వైరల్‌గా మారిన వైనం
న్యూఢిల్లీ : ఐసీసీ 2020 టీ20 ప్రపంచకప్‌ సూపర్‌12 గ్రూప్‌-2 మ్యాచ్‌లో పాకిస్థాన్‌పై జింబాబ్వే రసవత్తర మ్యాచ్‌లో ఒక్క పరుగు తేడాతో మెరుపు విజయం నమోదు చేసింది. స్వల్ప ఛేదనలో పాకిస్థాన్‌ జట్టును గొప్పగా నిలువరించిన జింబాబ్వే.. ప్రపంచకప్‌లో చిరస్మరణీయ విజయం అందుకుంది. జింబాబ్వే స్టార్‌ సికందర్‌ రజా చివరి ఓవర్లో చివరి మూడు బంతులకు మూడు పరుగులను కాపాడుకున్నాడు. జింబాబ్వేకు అసమాన విజయాన్ని కట్టబెట్టాడు. బలమైన పాకిస్థాన్‌ జట్టుపై విజయంతో జింబాబ్వే ఆటగాళ్లు మైదానంలో గెలుపు సంబురాలు గొప్పగా చేసుకున్నారు. అయితే, సోషల్‌ మీడియాలో అభిమానులు క్రికెట్‌కు కాస్త దూరంగా జరిగి.. భిన్నంగా సంబురాలు జరుపుకున్నారు. పాకిస్థాన్‌, జింబాబ్వే క్రికెట్‌ మ్యాచ్‌లోకి ప్రపంచ ప్రఖ్యాత హాస్య నటుడు మిస్టర్‌ బీన్‌ వచ్చాడు. నవ్వుల రేడుగా మిస్టర్‌ బీన్‌ను గుర్తుంచుకున్న సాధారణ అభిమానులు.. క్రికెట్‌ మ్యాచ్‌లోకి బీన్‌ ప్రవేశంపై కాస్త ఆశ్చర్యం వ్యక్తం చేస్తున్నారు. అయితే, పాకిస్థాన్‌, జింబాబ్వే మధ్యలో మిస్టన్‌ బీన్‌కు సంబంధించి ఓ ఆసక్తికర విషయం దాగి ఉంది.
2016లో జింబాబ్వేలో స్టేజ్‌ షోల కోసం మిస్టర్‌ బీన్‌కు పోలికలతో ఉండే మిస్టర్‌ పాక్‌ బీన్‌ జింబాబ్వేకు వెళ్లాడు. అక్కడ పలు షోలలో ప్రదర్శనలు ఇచ్చాడు. అచ్చంగా మిస్టర్‌ బీన్‌లానే కనిపించిన మిస్టర్‌ పాక్‌ బీన్‌ను చూసిన జింబాబ్వే ప్రజలు.. 10 డాలర్లు వెచ్చించి అతడికి షోలకు ఎగబడ్డారు. కానీ మిస్టర్‌ పాక్‌ బీన్‌ జింబాబ్వే ప్రజలను నవ్వించటంలో విఫలమయ్యాడు. జింబాబ్వేకు నకిలీ మిస్టర్‌ బీన్‌ను పంపించిన పాకిస్థాన్‌పై జింబాబ్వే ప్రతీకారం తీర్చుకుందని సోషల్‌ మీడియాలో ట్వీట్లు వైరల్‌గా మారాయి. ఇది కాస్త ఇరు దేశాధినేతల ట్వీట్లకు సైతం దారితీసింది. ' జింబాబ్వేకు అద్భుత విజయం. చెవరాన్స్‌కు అభినందనలు. వచ్చే సారైనా.. నిజమైన బిస్టర్‌ మీన్‌ను పంపించండి' అంటూ జింబాబ్వే అధ్యక్షుడు ట్వీట్‌ చేశాడు. దీనికి పాకిస్థాన్‌ ప్రధాని షెబాజ్‌ షరిఫ్‌ స్పందించారు. ' మా దగ్గర నిజమైన మిస్టర్‌ మీన్‌ లేకపోవచ్చు. కానీ మా దగ్గర నిజమైన క్రికెట్‌ స్ఫూర్తి ఉంది. పుంజుకునే ఫన్నీ అలవాటు మా సొంతం. మిస్టర్‌ ప్రెసిడెంట్‌ (జింబాబ్వే) అభినందనలు. మీ జట్టు నిజంగా బాగా ఆడింది' అని ట్వీట్‌ చేశారు.