- కెరీర్‌ అత్యుత్తమ ర్యాంక్‌ సొంతం
న్యూఢిల్లీ : కామన్‌వెల్త్‌ క్రీడల చాంపియన్‌, భారత వర్థమాన స్టార్‌ లక్ష్యసేన్‌ కెరీర్‌ అత్యుత్తమ ర్యాంక్‌ సొంతం చేసుకున్నాడు. మంగళవారం ప్రకటించిన తాజాగా బ్యాడ్మింటన్‌ ప్రపంచ ర్యాంకింగ్స్‌లో లక్ష్యసేన్‌ రెండు స్థానాలు ఎగబాకాడు. పురుషుల సింగిల్స్‌ విభాగంలో వరల్డ్‌ నం.6 ర్యాంకర్‌గా నిలిచాడు. 21 ఏండ్ల లక్ష్యసేన్‌.. ఈ సీజన్‌లో గొప్పగా రాణిస్తున్నాడు. 25 టోర్నీల్లో 76,242 పాయింట్లు సాధించాడు. గతంలో కిదాంబి శ్రీకాంత్‌ మెన్స్‌ సింగిల్స్‌ వరల్డ్‌ నం.1 ర్యాంక్‌ సాధించాడు. మళ్లీ ఆ ఘనత సాధించగల సత్తా ఉన్న షట్లర్‌ లక్ష్యసేన్‌ ఒక్కడే!. ఇక ఇటీవల ఫ్రెంచ్‌ ఓపెన్‌ చాంపియన్లుగా నిలిచిన డబుల్స్‌ స్టార్స్‌ సాత్విక్‌సాయిరాజ్‌ రాంకీరెడ్డి, చిరాగ్‌ శెట్టి జోడీ ఓ స్థానం మెరుగయ్యారు. మెన్స్‌ డబుల్స్‌ విభాగంలో ఏడో స్థానంలో నిలిచారు. కామన్‌వెల్త్‌ గేమ్స్‌ అనంతరం చీలమండ గాయంతో టోర్నీలకు దూరంగా ఉన్న స్టార్‌ షట్లర్‌ పి.వి సింధు సైతం ఓ స్థానం మెరుగైంది. మహిళల సింగిల్స్‌లో వరల్డ్‌ నం.5గా కొనసాగుతోంది. మెన్స్‌ సింగిల్స్‌లో కిదాంబి శ్రీకాంత్‌, హెచ్‌.ఎస్‌ ప్రణరులు వరుసగా 11, 12వ స్థానాల్లో నిలిచారు.