- విజయం ముంగిట ఇంగ్లాండ్‌
- పాకిస్థాన్‌తో మూడో టెస్టు
కరాచీ : పాకిస్థాన్‌పై క్లీన్‌స్వీప్‌ విజయానికి ఇంగ్లాండ్‌ మరో 55 పరుగుల దూరంలో నిలిచింది. తొలి రెండు టెస్టుల్లో విజయాలతో టెస్టు సిరీస్‌ కైవసం చేసుకున్న ఇంగ్లాండ్‌.. కరాచీ టెస్టులో విజయం ముంగిట నిలిచింది. పాకిస్థాన్‌ నిర్దేశించిన167 పరుగుల లక్ష్యఛేదనలో ఇంగ్లాండ్‌ 112/2తో గెలుపు దిశగా దూసుకెళ్తుంది. బెన్‌ డకెట్‌ (50 నాటౌట్‌, 38 బంతుల్లో 8 ఫోర్లు), బెన్‌ స్టోక్స్‌ (10 నాటౌట్‌) అజేయంగా ఆడుతున్నారు. ఓపెనర్‌ జాక్‌ క్రావ్లీ (41, 41 బంతుల్లో 7 ఫోర్లు) ధనాధన్‌ జోరుతో తొలి వికెట్‌కు ఇంగ్లాండ్‌ 87 పరుగుల భారీ భాగస్వామ్యం నమోదు చేసింది.రెహాన్‌ అహ్మద్‌ (10) త్వరగా నిష్క్రమించినా.. మరో ఓపెనర్‌ డకెట్‌తో కలిసి కెప్టెన్‌ బెన్‌ స్టోక్స్‌ ఇంగ్లీశ్‌ జట్టును గెలుపు దిశగా తీసుకెళ్తున్నాడు. నేడు నాల్గో రోజు ఆట ఉదయం సెషన్లోనే ఇంగ్లాండ్‌ లాంఛనం ముగించి పాకిస్థాన్‌పై టెస్టు సిరీస్‌ను క్లీన్‌స్వీప్‌ చేయనుంది!. కెప్టెన్‌ బాబర్‌ ఆజాం (54, 104 బంతుల్లో 6 ఫోర్లు), సయిద్‌ షకీల్‌ (53, 133 బంతుల్లో 6 ఫోర్లు) అర్థ సెంచరీలతో రాణించటంతో రెండో ఇన్నింగ్స్‌లో పాకిస్థాన్‌ 216 పరుగులు చేసింది. ఇంగ్లాండ్‌ బౌలర్‌ రెహాన్‌ అహ్మద్‌ (5/48) ఐదు వికెట్ల ప్రదర్శనతో ఆకట్టుకున్నాడు.