- దక్షిణాఫ్రికాపై 54పరుగుల తేడాతో గెలుపు
- అండర్‌-19 మహిళల టి20 క్రికెట్‌
ప్రిటోరియా : అండర్‌-19 మహిళల ప్రపంచకప్‌ ముందు భారత మహిళలజట్టు దక్షిణాఫ్రికాతో జరిగిన తొలి టి20లో ఘన విజయం సాధించింది. భారత మహిళల జట్టుకు సీనియర్‌ జట్టు ఓపెనర్‌ షెఫాలీ వర్మ సారథ్యం వహిస్తుండగా.. దక్షిణాఫ్రికాతో బుధవారంతో జరిగిన తొలి మ్యాచ్‌లో భారత్‌ 54పరుగుల తేడాతో ఘన విజయం సాధించింది. తొలిగా బ్యాటింగ్‌కు దిగిన భారత మహిళల జట్టు 20 ఓవర్లలో 137పరుగులు చేసింది. శ్వేత సావంత్‌(40) బ్యాటింగ్‌లో రాణించగా.. షెఫాలీ వర్మ డకౌటయ్యింది. ఛేదనలో దక్షిణాఫ్రికా జట్టు 83పరుగులకే ఆలౌటైంది. అర్చన దేవి, షబ్నమ్‌ మూడేసి వికెట్లు తీసి టీమిండియా గెలుపులో కీలకపాత్ర పోషించారు. సఫారీ మహిళల జట్టు ఛేదనలో భాగంగా 17వ ఓవర్‌లో భారత స్పిన్నర్‌ మన్నత్‌ కశ్యప్‌ మన్కడింగ్‌ ద్వారా సఫారీ నాన్‌ స్ట్రయికర్‌ జెన్నా ఇవాన్స్‌ను ఔట్‌ చేయడం ప్రస్తుతం సోషల్‌ మీడియాలో హల్‌చల్‌ చేస్తోంది.