- తొలి రౌండ్లోనే పరాజయాలు
- మలేషియా ఓపెన్‌ సూపర్‌ సిరీస్‌
కౌలాలంపూర్‌ : భారత స్టార్‌ షట్లర్లు సైనా నెహ్వాల్‌, కిదాంబి శ్రీకాంత్‌ నూతన ఏడాదిని ఓటమితో ఆరంభించారు. మలేషియా ఓపెన్‌ సూపర్‌ సిరీస్‌లో మాజీ వరల్డ్‌ నం.1 క్రీడాకారులు మట్టికరిచారు. మహిళల సింగిల్స్‌లో సైనా నెహ్వాల్‌, పురుషుల సింగిల్స్‌లో కిదాంబి శ్రీకాంత్‌ పోరాడి ఓడారు. సైనా నెహ్వాల్‌ 12-21, 21-17, 17-21తో హాన్‌ యు (చైనా) చేతిలో పరాజయం పాలైంది. కిదాంబి శ్రీకాంత్‌ 19-21, 14-21 వరుస గేముల్లో జపాన్‌ స్టార్‌ కెంటో నిషిమోట చేతిలో ఓటమి చెందాడు. మహిళల సింగిల్స్‌లో వర్థమాన షట్లర్‌ ఆకర్షి కశ్యప్‌ 10-21, 8-21తో చైనీస్‌ తైపీ షట్లర్‌ చేతిలో భంగపాటుకు గురైంది. మెన్స్‌ డబుల్స్‌లో కృష్ణ ప్రసాద్‌, విష్ణువర్థన్‌ గౌడ్‌ జోడీ 10-21, 18-21తో దక్షిణ కొరియా జోడీ చేతిలో ఓడారు. మహిళల డబుల్స్‌లో ట్రెసా జాలీ, గాయత్రి పుల్లెల జంట 21-19, 21-14తో తొలి రౌండ్లో మెరుపు విజయం సాధించింది. మహిళల సింగిల్స్‌లో నేడు జరిగే తొలి రౌండ్‌ పోరులో ఆరో సీడ్‌ పి.వి సింధుతో స్పెయిన్‌ స్టార్‌ కరొలినా మారిన్‌ తలపడనుంది.