- రంజీట్రోఫీ ఫైనల్‌
కోల్‌కతా: రంజీట్రోఫీ ఫైనల్లో బెంగాల్‌ జట్టు ఎదురీదుతోంది. తొలి ఇన్నింగ్స్‌లో 230పరుగులు వెనుకబడ్డ బెంగాల్‌ జట్టు శనివారం రెండో ఇన్నింగ్స్‌లో ఆట నిలిచే సమయానికి 4 వికెట్లు నష్టపోయి 169పరుగు లు చేసి ఇంకా 61పరుగులు వెనుకబడి ఉంది. అంతకుముందు సౌరాష్ట్ర జట్టు తొలి ఇన్నింగ్స్‌ లో 404 పరుగులకు ఆలౌటైంది. మిడిలార్డర్‌ బ్యాటర్స్‌ జాక్సన్‌(59), వసవాడ(81), చిరాగ్‌ జానీ(60) అర్ధసెంచరీలతో మెరిసారు. బెంగాల్‌ బౌలర్లు ముఖేశ్‌ కుమార్‌కు నాలుగు, ఆకాశ్‌ దీప్‌, ఇషాన్‌ పోరెల్‌కు మూడేసి వికెట్లు దక్కాయి. అనంతరం రెండో ఇన్నింగ్స్‌ కొనసాగించిన బెంగాల్‌ను కెప్టెన్‌ మనోజ్‌ తివారీ(57నాటౌట్‌), మజుందార్‌(61) అర్ధసెంచరీలతో ఆదుకున్నారు.