- సింగిల్స్‌లో ముగిసిన పోరు
లండన్‌: ఆల్‌ ఇంగ్లండ్‌ ఓపెన్‌ బ్యాడ్మింటన్‌ ఛాంపియన్‌షిప్‌ మహిళల డబుల్స్‌లో భారత యువ జంట సంచలన నమోదు చేయగా.. పురుషుల సింగిల్స్‌లో భారత్‌ పోరు ముగిసింది. శుక్రవారం జరిగిన మహిళల డబుల్స్‌ క్వార్టర్‌ఫైనల్లో త్రీసా జోలీ-గాయత్రి గోపీచంద్‌ జంట 21-14, 18-21, 21-12తో చైనాకు చెందిన టాప్‌సీడ్‌ లీ-లూలపై పోరాడి నెగ్గారు. తొలి గేమ్‌ను సునాయాసంగా గెలుచుకున్న 17వ ర్యాంకర్‌ త్రీసా- గాయత్రి.. రెండో గేమ్‌లో పోరాడి ఓడారు. ఇక నిర్ణయాత్మక మూడో గేమ్‌ మొదటినుంచే మెరుగైన ప్రదర్శనను కనబరిచారు. మ్యాచ్‌ ముగించేందుకు భారతజోడీ సుమారు 64నిమిషాలసేపు పోరాడాల్సి వచ్చింది. సెమీస్‌లో భారత జోడీ కొరియాకు చెందిన లీ-బెక్‌లతో తలపడనున్నారు. త్రీసా-గాయత్రి జంట వరుసగా రెండోసారి ఈ టోర్నీలో సెమీస్‌లోకి ప్రవేశించారు. ఇక పురుషుల సింగిల్స్‌లో భారత్‌ పోరు ముగిసింది. గురువారం రాత్రి జరిగిన పోటీల్లో కిదాంబి శ్రీకాంత్‌ 17-21, 15-21తో నరోకా(జపాన్‌) చేతిలో, లక్ష్యసేన్‌ 13-21, 15-21తో ఆంటోన్సెన్‌(డెన్మార్క్‌) చేతిలో ఓడారు. ఇక హెచ్‌ఎస్‌ ప్రణరు రారు 20-22, 21-15, 17-21తో హోరాహోరీ పోరులో గింటింగ్‌(ఇండోనేషియా) చేతిలో ఓడాడు.