ప్రపంచకప్‌లో 10మీటర్ల ఎయిర్ పిస్టల్‌ ఈవెంట్‌లో సరబ్‌జోత్‌కు స్వర్ణం , వరుణ్‌కు కాంస్యం హర్యానాకు చెందిన సరబ్‌జోత్‌ సింగ్‌ (ఐఎస్‌ఎస్‌ఎఫ్‌ షూటింగ్‌) ప్రపంచకప్‌లో స్వర్ణ పతకాన్ని గెలుచుకున్నాడు. మధ్యప్రదేశ్‌ రాజధాని భోపాల్‌లో జరుగుతున్న షూటింగ్‌ విభాగంలో.. బుధవారం 10 మీటర్ల ఎయిర్ పిస్టల్‌ ఈవెంట్‌లో అగ్రస్థానంలో నిలిచాడు. ధిన్‌ గ్రామానికి చెందిన రైతు కుమారుడు సరబ్‌జోత్‌ 16-0తో అజర్‌బైజాన్‌కు చెందిన రుస్లాన్‌ లునెవ్‌ను ఓడించాడు. 2023 ప్రపంచకప్‌లో భారత్‌కు ఇదే తొలి బంగారు పతకం. అలాగే భారత్‌కు చెందిన వరుణ్‌ తోమర్‌కు కూడా కాంస్య పతకం లభించింది.క్వాలిఫికేషన్‌ సిరీస్‌లో అతను 98, 97, 99, 97, 97, 97 స్కోరు చేశాడు. క్వాలిఫికేషన్‌ సిరీస్‌లో చైనాకు చెందిన లియు జిన్యావో 584 స్కోరుతో రెండో స్థానంలో నిలిచాడు. చివరి రౌండ్‌లో సరబ్‌జోత్‌ 253.2, రుస్లాన్‌ 251.9 షాట్‌లు కొట్టారు. వరుణ్‌ 250.3 స్కోరుతో మూడో స్థానంలో నిలిచాడు.
