- అంచనాలు రూపొందించండి
- శాట్స్‌ అధికారులకు మంత్రి, చైర్మెన్‌ ఆదేశం
నవతెలంగాణ-హైదరాబాద్ : రాష్ట్ర వ్యాప్తంగా స్టేడియాల్లో సౌకర్యాల కల్పనపై దృష్టి సారించాలని శాట్స్‌ అధికారులను క్రీడాశాఖ మంత్రి వి. శ్రీనివాస్‌ గౌడ్‌, శాట్స్‌ చైర్మెన్‌ ఆంజనేయ గౌడ్‌ ఆదేశించారు. హైదరాబాద్‌లోని ఎల్బీ స్టేడియాన్ని శనివారం ఉన్నతాధికారులతో కలిసి మంత్రి, చైర్మెన్‌ తనిఖీ చేశారు. ఎల్బీ స్టేడియం హాస్టల్‌, ఇతర క్రీడలకు అవసరమైన సదుపాయాలు, స్టేడియంలో ఫ్లడ్‌లైట్ల రిపేర్‌కు సంబంధించిన పనులపై అంచనాలను రూపొందించాలని ఇంజనీరింగ్‌ విభాగం అధికారులను ఆదేశించారు. ఎల్బీ స్టేడియానికి సరికొత్త రూపు తీసుకొచ్చేందుకు పెయింటింగ్‌ పనులను సైతం మొదలుపెట్టాలని సూచించారు. ఎండాకాలంలో నీటి ఎద్దడి కారణంగా మైదానంలో పచ్చిక కనుమరుగు కాకుండా తగిన చర్యలు తీసుకోవాలని ఆదేశించారు. క్రీడాశాఖ ముఖ్య కార్యదర్శి సందీప్‌ కుమార్‌ సుల్తానియ, శాట్స్‌ అధికారులు సుజాత, ధనలక్ష్మి, స్టేడియం పరిపాలన అధికారులు తదితరులు మంత్రి, చైర్మెన్‌తో పాటు ఉన్నారు.
