న్యూఢిల్లీ : ఇండియన్‌ ప్రీమియర్‌ లీగ్‌ (ఐపీఎల్‌) 16వ సీజన్‌ తొలి వారంలోనే లీగ్‌ దశలో రెండో మ్యాచ్‌కు జట్లు సిద్ధమవుతున్నాయి. సీజన్‌ ఆరంభ మ్యాచ్‌లోనే బోణీ కొట్టిన డిఫెండింగ్‌ చాంపియన్‌ గుజరాత్‌ టైటాన్స్‌తో ఢిల్లీ క్యాపిటల్స్‌ నేడు తలపడనుంది. చెన్నై సూపర్‌కింగ్స్‌పై గుజరాత్‌ టైటాన్స్‌ అలవోక విజయం సాధించింది. కీలక ఆటగాళ్లు అందుబాటులో లేకపోయినా టైటాన్స్‌ ఏమాత్రం ఇబ్బంది పడలేదు. లక్నో సూపర్‌జెయింట్స్‌తో తొలి మ్యాచ్‌లో ఢిల్లీ క్యాపిటల్స్‌ ఫీల్డింగ్‌, బ్యాటింగ్‌ వైఫల్యంతో తగిన మూల్యం చెల్లించుకుంది. తొలి విజయం వేటలో ఢిల్లీ క్యాపిటల్స్‌ ఉండగా, గెలుపు జోరు కొనసాగించేందుకు టైటాన్స్‌ ఎదురు చూస్తోంది. సొంతగడ్డపై సీజన్‌ తొలి మ్యాచ్‌ ఆడనున్న ఢిల్లీ క్యాపిటల్స్‌ను కెప్టెన్‌ డెవిడ్‌ వార్నర్‌ ఏ మేరకు గెలుపు పథంలో నడిపిస్తాడో చూడాలి.