- ప్రభుత్వ సహకారంతో అకాడమీ పెడతాను
- భారత స్టార్‌ బాక్సర్‌ నిఖత్‌ జరీన్‌
             ప్రపంచ బాక్సింగ్‌ దిగ్గజం ఎం.సీ మేరీకోమ్‌ తర్వాత ప్రపంచ బాక్సింగ్‌ చాంపియన్‌షిప్స్‌లో రెండు పసిడి పతకాలు సాధించిన భారత బాక్సర్‌గా చరిత్ర సృష్టించిన తెలంగాణ సూపర్‌ స్టార్‌ నిఖత్‌ జరీన్‌.. రాష్ట్ర ప్రభుత్వ సహకారంతో తెలంగాణలో ప్రపంచ శ్రేణి బాక్సింగ్‌ అకాడమీ ఏర్పాటు చేసేందుకు సిద్ధంగా ఉంది. వరల్డ్‌ చాంపియన్‌గా రెండోసారి నిలిచిన అనంతరం తొలిసారి హైదరాబాద్‌కు వచ్చిన నిఖత్‌ జరీన్‌ సోమవారం ఎఫ్‌ఎన్‌సీసీ క్లబ్‌లో మీడియాతో ముచ్చటించింది. ఆ విషయాలు నిఖత్‌ జరీన్‌ మాటల్లోనే...!
నవతెలంగాణ-హైదరాబాద్‌
అకాడమీ ఏర్పాటు చేస్తా!
మన (తెలంగాణ) దగ్గర బాక్సింగ్‌కు మంచి సదుపాయాలు లేవు. చెప్పుకోదగిన బాక్సింగ్‌ ఇన్‌స్టిట్యూట్‌లు, అకాడమీలు సైతం తెలంగాణలో లేవు. వర్థమాన బాక్సర్ల కోసం ఇక్కడ ఓ మంచి బాక్సింగ్‌ అకాడమీ ఏర్పాటు చేయాలని అనుకుంటున్నాను. ఎల్‌బి స్టేడియంలో బాక్సింగ్‌ రింగ్స్‌ ఉన్నాయి. కానీ నిర్వహణ బాగాలేదు. నిజాం కాలేజ్‌లో అవుట్‌డోర్‌ బాక్సింగ్‌ సదుపాయమే ఉంది. క్రీడాశాఖ మంత్రి వి. శ్రీనివాస్‌ గౌడ్‌, ఎమ్మెల్సీ కవితతో మాట్లాడాను. త్వరలోనే బాక్సింగ్‌ అకాడమీ స్థాపనకు అవసరమైన స్థలం కేటాయిస్తారని అనుకుంటున్నాను. రాష్ట్ర ప్రభుత్వం సహకారంతో వరల్డ్‌క్లాస్‌ బాక్సింగ్‌ అకాడమీ ఏర్పాటు చేస్తాను.
ఒక్కో మెట్టుపైనే ధ్యాస
పారిస్‌ ఒలింపిక్స్‌లో పతకం నా లక్ష్యం. అందుకని ఇతర టోర్నమెంట్ల గురించి పట్టించుకోకుండా ఒలింపిక్‌ పసిడి స్వప్నించటం లేదు. ఒక్కో మెట్టు ఎక్కుతూ.. లక్ష్యానికి చేరువ కావాలనేది నా ప్రణాళిక. వరల్డ్‌ చాంపియన్‌షిప్స్‌ విజయం రానున్న ఆసియా క్రీడలు, పారిస్‌ 2024 ఒలింపిక్స్‌కు పెద్ద ప్రేరణ. వరల్డ్‌ చాంపియన్‌షిప్స్‌ పసిడితో ర్యాంకింగ్స్‌లో నం.1 కానున్నాను. దీంతో ఆసియా క్రీడల్లో సీడింగ్‌ లభించనుంది. ఆసియా క్రీడల్లో పసిడి పతకంతో 2024 ఒలింపిక్స్‌కు అర్హత సాధించాలని భావిస్తున్నాను.
తుది పోరు కఠిన సవాల్‌
ఏబీఐ ప్రపంచ మహిళల బాక్సింగ్‌ చాంపియన్‌షిప్స్‌లో నా అత్యుత్తమ ప్రదర్శన సెమీఫైనల్లోనే. కానీ నాకు అత్యంత కఠిన సవాల్‌ ఎదరైన బౌట్‌ మాత్రం పసిడి పోరే. సెమీస్‌ బౌట్‌లో ఉత్తమ ప్రదర్శన చేశాను. ఫైనల్లో తొలి రౌండ్‌లో నాకు ఏకపక్ష ఆధిక్యం దక్కింది. రెండో రౌండ్‌లో ప్రత్యర్థి బాక్సర్‌కు స్వల్ప ఆధిక్యత లభించింది. దీంతో చివరి రౌండ్లో నేను చావోరేవో తేల్చుకోవాల్సిన స్థితి. ఈసారి వరల్డ్‌ చాంపియన్‌షిప్స్‌లో ఏకధాటిగా ఆరు బౌట్లలో పోటీపడ్డాను. ఇది సాధారణ విషయం కాదు.
అంచనాలే ప్రేరణ
2023 ప్రపంచ చాంపియన్‌షిప్స్‌లో డిఫెండింగ్‌ చాంపియన్‌గా నాపై అంచనాలు భారీగా ఉన్నాయి. టోర్నీకి నేను పోస్టర్‌ గర్ల్‌గా ఉన్నాను. అభిమానులు నా ఆట చూసేందుకు స్టేడియానికి భారీ సంఖ్యలో వచ్చారు. ఒలింపిక్‌ కేటగిరీలో తొలిసారి పోటీపడుతున్నాను. భారీ అంచనాలు నన్ను మరింత ప్రేరేపించాయి. కానీ ఇదే సమయంలో ఒకింత ఒత్తిడికి సైతం గురయ్యాను. వంద శాతం ప్రదర్శన ఇచ్చేందుకు దృష్టి పెట్టాను. అభిమానుల నుంచి లభించిన మద్దతు మరువలేనిదని నిఖత్‌ జరీన్‌ తెలిపింది.