- ఫిఫా ర్యాంకింగ్స్‌లో మళ్లీ అగ్రస్థానం కైవసం
జ్యురిచ్‌ : ప్రపంచ చాంపియన్‌, ప్రపంచ ఫుట్‌బాల్‌ అగ్రజట్టు అర్జెంటీనా ఆరేండ్ల సుదీర్ఘ విరామం అనంతరం తిరిగి అగ్రస్థానం కైవసం చేసుకుంది. ఫిఫా తాజాగా విడుదల చేసిన ర్యాంకింగ్స్‌లో బ్రెజిల్‌ను మూడో స్థానానికి నెట్టిన లియోనల్‌ మెస్సీ సేన.. వరల్డ్‌ నం.1 జట్టుగా నిలిచింది. 2022 ఫిఫా ప్రపంచకప్‌ విజేతగా నిలిచిన అర్జెంటీనా.. లియోనల్‌ మెస్సీ నాయకత్వంలో ఫైనల్లో ఫ్రాన్స్‌పై గెలుపొందిన సంగతి తెలిసిందే. తాజాగా పనామాపై 2-0, కుర్సావోపై 7-0తో తిరుగులేని విజయాలు సాధించిన అర్జెంటీనా ఫిఫా ర్యాంకింగ్స్‌లో ఆరేండ్ల విరామం అనంతరం అగ్రస్థానానికి చేరుకుంది. యూరో క్వాలిఫయర్స్‌లో నెదర్లాండ్స్‌పై 4-0, ఐర్లాండ్‌పై 1-0తో గెలుపొందిన ఫ్రాన్స్‌ ర్యాంకింగ్స్‌లో రెండో స్థానానికి ఎగబాకింది. ఫ్రెండ్లీ మ్యాచ్‌లో 1-2తో మొరాకో చేతిలో కంగుతున్న బ్రెజిల్‌ మూడో స్థానానికి పడిపోయింది. బెల్జియం, ఇంగ్లాండ్‌ టాప్‌-5లో కొనసాగుతున్నాయి. నెదర్లాండ్స్‌, క్రోయేషియా, ఇటలీ, పోర్చుగల్‌, స్పెయిన్‌ టాప్‌-10లో నిలిచాయి.