- సఫారీల రాకతో నూతనోత్సాహాం
- లక్నో సూపర్‌జెయింట్స్‌తో పోరు నేడు
నవతెలంగాణ-లక్నో :ఐపీఎల్‌ 2021లో పాయింట్ల పట్టికలో చిట్టచివరి స్థానం (8). ఐపీఎల్‌ 2022లో పది జట్లు పోటీపడగా హైదరాబాద్‌ మళ్లీ ఎనిమిదో స్థానంలోనే నిలిచింది. ప్లే ఆఫ్స్‌ దశకు అర్హత సాధించలేదు. మెగా ఆటగాళ్ల వేలంలో ఆకర్షణీయ ఆటగాళ్లను కొనుగోలు చేసిన హైదరాబాద్‌పై ఐపీఎల్‌ 2023లో మంచి అంచనాలు నెలకొన్నాయి. కానీ ఐపీఎల్‌16 తొలి మ్యాచ్‌లోనే సన్‌రైజర్స్‌ హైదరాబాద్‌ తేలిపోయింది. రాజస్థాన్‌ రాయల్స్‌తో మ్యాచ్‌లో 72 పరుగుల తేడాతో భారీ పరాజయం మూటగట్టుకుంది. బంతితో పవర్‌ప్లేలో 85/1తో రాయల్స్‌ చేతిలో చితికిపోయిన సన్‌రైజర్స్‌.. బ్యాట్‌తో 30/2తో రాయల్స్‌ బౌలర్ల చేతిలో కంగుతింది. మూడేండ్ల తర్వాత సన్‌రైజర్స్‌ సొంత గడ్డపై ఆడుతున్న మ్యాచ్‌ కావటంతో సుమారు 40 వేల మంది అభిమానులు స్టేడియానికి పోటెత్తగా.. పసలేని పోరాటంతో ఆరెంజ్‌ ఆర్మీ నిరాశకు లోనైంది. కెప్టెన్‌ సహా కీలక ఆటగాళ్లు తొలి మ్యాచ్‌కు అందుబాటులో లేకపోవటంతో ఆ ఓటమిని హైదరాబాద్‌ పెద్దగా సిరీయస్‌గా తీసుకోవటం లేదు. నేడు రెండో మ్యాచ్‌లో లక్నో సూపర్‌జెయింట్స్‌తో హైదరాబాద్‌ తలపడనుంది. లక్నోపై మెరుగైన ప్రదర్శనతో గెలుపు బాట పట్టేందుకు ఆరెంజ్‌ ఆర్మీ ఎదురుచూస్తుంది.
ఆ ముగ్గురు వచ్చారు!
కెప్టెన్‌ ఎడెన్‌ మార్కరం, పేసర్‌ మార్కో జెన్సన్‌, వికెట్‌కీపర్‌ బ్యాటర్‌ హెన్రిచ్‌ క్లాసెన్‌లు లక్నోతో మ్యాచ్‌కు అందుబాటులోకి వచ్చారు. ఎస్‌ఏటీ20 లీగ్‌లో సన్‌రైజర్స్‌ను చాంపియన్‌గా నిలిపిన మార్కరం.. ఐపీఎల్‌లో తొలిసారి సారథ్య పగ్గాలు అందుకున్నాడు. మార్కరం, జెన్సన్‌, క్లాసెన్‌లు మంచి ఫామ్‌లో ఉన్నారు. మార్కరం రాకతో మిడిల్‌ ఆర్డర్‌ బ్యాటింగ్‌ లైనప్‌ బలోపేతం కానుంది. క్లాసెన్‌ తుది జట్టులో నిలిస్తే.. లోయర్‌ ఆర్డర్‌లో కీలకం అవగలడు. ఇంగ్లాండ్‌ స్టార్‌ హ్యారీ బ్రూక్‌ తొలి మ్యాచ్‌లో తేలిపోయినా.. అతడిని తక్కువ అంచనా వేయడానికి వీల్లేదు. భారత ఆటగాళ్లలో రాహుల్‌ త్రిపాఠి, అభిషేక్‌ శర్మ, మయాంక్‌ అగర్వాల్‌ అంచనాలను అందుకోవాల్సి ఉంది. పేస్‌ విభాగంలో నటరాజన్‌ మినహా భువి, ఫరూకీ, ఉమ్రాన్‌ మాలిక్‌ నిరాశపరిచారు. మార్కో జెన్సన్‌ రాకతో పేస్‌ విభాగానికి మరింత బలం చేకూరనుంది. ఫరూకీ స్థానంలో జెన్సన్‌ తుది జట్టులోకి రానున్నాడు. స్పిన్నర్‌ ఆదిల్‌ రషీద్‌ తొలి మ్యాచ్‌లో వికెట్లు తీయలేదు. నాణ్యమైన స్పిన్‌ ఆల్‌రౌండర్‌ వాషింగ్టన్‌ సుందర్‌ సైతం రాయల్స్‌పై విఫలమయ్యాడు. రషీద్‌ నేడు తుది జట్టులో నిలిచేది లేనిది అనుమానమే. మార్కరం, బ్రూక్‌, జెన్సన్‌లతో పాటు మరో విదేశీ ప్లేయర్‌ కోటా కోసం ఫిలిప్స్‌, క్లాసెన్‌, రషీద్‌ పోటీపడుతున్నారు.
సొంతగడ్డ సానుకూలత! :
లక్నో సూపర్‌జెయింట్స్‌తో సన్‌రైజర్స్‌ హైదరాబాద్‌ గత సీజన్లో ఓ మ్యాచ్‌ ఆడింది. ఆ మ్యాచ్‌లో లక్నో విజయం సాధించింది. ఈ సీజన్లో లక్నో రెండు మ్యాచులు ఆడగా..ఓ గెలుపు, ఓ ఓటమి చవిచూసింది. సొంతగడ్డపై ఢిల్లీ క్యాపిటల్స్‌ను ఓడించిన లక్నో.. చెపాక్‌లో ధోనీసేన చేతిలో ఓటమిపాలైంది. కెప్టెన్‌ కెఎల్‌ రాహుల్‌ ఫామ్‌ ఆ జట్టును ఆందోళనకు గురి చేస్తోంది. పొట్టి ఫార్మాట్‌కు అనుగుణంగా రాహుల్‌ దూకుడు ఉండటం లేదు. ఓపెనర్‌ కైల్‌ మేయర్స్‌ ధనాధన్‌ హిట్టింగ్‌ సూపర్‌జెయింట్స్‌ శిబిరంలో ఉత్సాహం నింపుతోంది. మేయర్స్‌ బాదుడుతో బౌలర్లపై లక్నో ఆధిపత్యం చెలాయిస్తోంది. నేడు సన్‌రైజర్స్‌తో మ్యాచ్‌లోనూ మేయర్స్‌ కీలకం కానున్నాడు. స్పిన్నర్‌ రవి బిష్ణోరు, పేసర్‌ మార్క్‌వుడ్‌లు రెండు మ్యాచుల్లో ఆకట్టుకున్నారు. సన్‌రైజర్స్‌ బ్యాటర్లకు ఈ ఇద్దరు బంతితో కఠిన సవాల్‌ విసరనున్నారు.