- నేడు చెన్నైతో రాజస్థాన్‌ ఢీ
చెన్నై : ఐపీఎల్‌16 ఆరంభ మ్యాచ్‌లో ఓడినా.. ఆ తర్వాత వరుసగా రెండు మ్యాచుల్లో ఎదురులేని విజయాలు చెన్నై సూపర్‌కింగ్స్‌ సొంతం. పంజాబ్‌ కింగ్స్‌తో వర్షం ప్రభావిత మ్యాచ్‌లో పరాజయం పాలైనా.. పుంజుకుని రెండు మ్యాచుల్లో తిరుగులేని విజయాలు సాధించింది రాజస్థాన్‌ రాయల్స్‌. అటు సూపర్‌కింగ్స్‌, ఇటు రాయల్స్‌ సీజన్లో నాల్గో మ్యాచ్‌కు సిద్ధమయ్యాయి. ఈ పోరుకు చెన్నై చెపాక్‌ స్టేడియం వేదిక కానుంది. సొంతగడ్డపై సూపర్‌కింగ్స్‌కు ఘనమైన రికార్డుంది. ఇక్కడ ఆడిన 57 మ్యాచుల్లో ధోనీసేన ఏకంగా 41 విజయాలు సాధించింది. గెలుపు శాతం 72తో చెన్నై సూపర్‌కింగ్స్‌ చెపాక్‌ను కోటగా చేసుకుంది. స్పిన్‌ అనుకూల చెపాక్‌లో రాజస్థాన్‌ రాయల్స్‌ విజయంపై కన్నేసింది. రవిచంద్రన్‌ అశ్విన్‌, యుజ్వెంద్ర చాహల్‌ రాయల్స్‌ శిబిరంలో ఉండగా.. సూపర్‌కింగ్స్‌కు సొంతగడ్డ అదనపు ప్రయోజనం ఉండదని ఆ జట్టు డ్రెస్సింగ్‌రూమ్‌ ఆలోచన.
రవీంద్ర జడేజా, మిచెల్‌ శాంట్నర్‌లకు తోడు మోయిన్‌ అలీ సూపర్‌కింగ్స్‌ తరఫున మాయజాలం చేస్తున్నారు. రాయల్స్‌ మాత్రం అశ్విన్‌, చాహల్‌పైనే ఆశలు పెట్టుకుంది. రుతురాజ్‌ గైక్వాడ్‌, డెవాన్‌ కాన్వేలకు తోడు అజింక్య రహానె సూపర్‌కింగ్స్‌ బ్యాటింగ్‌ను మరింత బలోపేతం చేశాడు. టాప్‌ ఆర్డర్‌లో దుమ్మురేపే ఇన్నింగ్స్‌లు నమోదు కావటంతో చెన్నై అలవోక విజయాలు సాధిస్తోంది. ఆ జట్టు మిడిల్‌ ఆర్డర్‌కు నిజమైన సవాల్‌ ఎదురుకాలేదు. ఆ సవాల్‌ విసిరేందుకు రాయల్స్‌ ఎదురుచూస్తోంది.
ఇక రాయల్స్‌ బ్యాటింగ్‌ ఆర్డర్‌ ప్రమాదకరంగా ఉంది. యశస్వి జైస్వాల్‌, జోశ్‌ బట్లర్‌, సంజు శాంసన్‌లు భీకర ఫామ్‌లో ఉన్నారు. రియాన్‌ పరాగ్‌, షిమ్రోన్‌ హెట్‌మయర్‌లు జోరుమీదున్నారు. సూపర్‌కింగ్స్‌ పేసర్లు తడబాటుకు లోనవుతుండగా.. రాయల్స్‌ పేసర్లు అంచనాలను అందుకుంటున్నారు. సూపర్‌కింగ్స్‌తో పోల్చితే మెరుగైన పేస్‌ విభాగం కలిగిన రాజస్థాన్‌ రాయల్స్‌.. అశ్విన్‌, చాహల్‌ మాయతో చెపాక్‌ కోటను బద్దలు కొట్టేందుకు సిద్ధమవుతోంది. చెన్నై సూపర్‌కింగ్స్‌, రాజస్థాన్‌ రాయల్స్‌ పోరు నేడు.
