దుబాయ్‌: భారత జట్టు వరల్డ్‌ నం.1గా నిలిచింది. టీ20 ఫార్మాట్‌లో అగ్రస్థానంలో కొనసాగుతున్న టీమ్‌ ఇండియా తాజాగా టెస్టుల్లోనూ టాప్‌ లేపింది. ఐసీసీ తాజాగా విడుదల చేసిన టెస్టు ర్యాంకింగ్స్‌లో భారత్‌ నం.1 స్థానం సాధించింది. ఆస్ట్రేలియాపై బోర్డర్‌ గవాస్కర్‌ ట్రోఫీని 2-1తో గెల్చుకున్న భారత్‌.. 121 రేటింగ్‌ పాయింట్లు సొంతం చేసుకుంది. ఆస్ట్రేలియా 122 నుంచి 116 పాయింట్లకు పడిపోయి రెండో స్థానంలో నిలిచింది. జూన్‌ 7న ఐసీసీ ప్రపంచ టెస్టు చాంపియన్‌షిప్‌ ఫైనల్లో వరల్డ్‌ నం.1 భారత్‌తో వరల్డ్‌ నం.2 ఆస్ట్రేలియా పోటీపడనుంది. ఇంగ్లాండ్‌ (114), దక్షిణాఫ్రికా (104), న్యూజిలాండ్‌ (100) టాప్‌-5లో కొనసాగుతున్నాయి. వన్డే ర్యాంకింగ్స్‌లో భారత్‌ నం.2గా నిలువగా.. ఆస్ట్రేలియా అగ్రస్థానం సాధించింది.