-ఆళ్ల నాగేశ్వరరావు , తెనాలి
 7416638823

స్వాతంత్య్రం  సాధించి
ఏడు పదులు  దాటినా
నేతి బీరలో  నెయ్యిలా
పాలకూరలో  పాలులా
ఎడారిలో  ఒయాసిస్సులా
నేటి  సమాజంలో  సామాజిక  న్యాయం  అలా !
తడబడు నడకలతో
పడుతూ  లేస్తూ  నడుస్తున్న  తరుణంలో
అంబేద్కర్  గారి  చొరవతో
వీరికి  అన్ని  రంగాల్లో  రిజర్వేషన్లు
రాజ్యాంగం  ద్వారా  కల్పించబడ్డాయి
ఆ  రిజర్వేషన్ల  పైనే  పాలకుల కళ్లూ పడ్డాయి !
రాజ్యం గం  ప్రకారం  వీరిని  పాలకుల్ని  చేసినా
అధికారం  చెలాయిస్తూ, పాలన  సాగించేది  మాత్రం  వారే !
తెల్ల దొరల  నుంచి  విభజించి  పాలించడం
నేర్చుకున్న  మన వాళ్ళు
రిజర్వేషన్  వర్గీయుల్ని  A, b, c, d  గ్రూపులుగా
విడదీసి
వారిలో వారికీ  పోటీలు  సృష్టించి
ఆ  ఉద్యోగాల్ని  రాబందుల్లా  తన్నుకు పోతున్నారు  వారు !
ఉచితాలు, రాయితీలు  వీరికి  అందించి
ఉన్నతస్థాయికి  ఎదుగు తున్నారు  వారు
ఉన్న చోటనే  ఉంటున్నారు  వీరు !
అధికారం లోకి  వచ్చిన  ప్రభుత్వాలు
చిటారు  కొమ్మన  సామాజిక  న్యాయమనే
మిఠాయి  పొట్లాన్ని  చూపిస్తూ  పబ్బం 
గడుపుకుంటున్నారు
అందని  ద్రాక్ష  పుల్లన  అనుకుంటూ
అందిన  దానికే  ఆనంద పడ్తున్నారు  వీరు !
నేటి  సమాజంలో  సామాజిక  న్యాయ సాధనకై
కవులు,  కళా కారులు,  మేధావులు  మౌనం  వీడి
వాడి,  వేడి  శరాలతో  సమరం  కొనసాగిస్తూ
మహాకవి జాషువా  అడుగు జాడల్లో  నడుస్తూ
సామాజిక  న్యాయం కోసం  ఇకనైనా  పోరాటం  సాగించాలి !