- కోడిగూటి తిరుపతి
9573929493

అభ్యుదయ జ్వలిత
మహోద్యమ ధీరోదాత్త
తెలంగాణ "వీర" వనిత
ఆమె ...చాకలి అయిలమ్మ

ఓ(పో)రుగల్లు గడ్డపై పుట్టి
విప్లవాల "బాట" పట్టింది

అనాది "ఆధిపత్యం" మీద ...
ఆయుదం ఎక్కుపెట్టింది

తరాల "నిరంకుశం" మీద ...
ధిక్కార కత్తులు జులిపించింది

పెత్తందారీ "వ్యవస్థ" మీద ...
తిరుగుబాటు "బౌటా" ఎగరేసింది

భూమి, భుక్తి ,దాస్య విముక్తికి
సమర శంఖారావం పూరించింది

దున్నే వాడిదే భూమి నినాదంగా
రైతాంగ సాయుధ "పోరు" సాగించింది

రైతు కూలీలను ఏకం చేసి ...
ఎర్ర జెండా నీడన నడిపించింది

సమర సివంగిలా గర్జిస్తూ…
దేశ్ ముఖ్ ల  తరిమి కొట్టింది

మాటల క్షిపణి  పేల్చి ...
రజాకార్ల గుండెల్లో గుబులు రేపింది

అరివీర భయంకర రూపునెత్తి ...
భూస్వాముల ఉప్పు పాతరేసింది
గడీల దోపిడీ పాలన సమాధి చేసింది

ఆ సమర "స్ఫూర్తి" విప్లవ గీతమై
జన పెదాలపై పల్లవిస్తుంటుంది

ఆ శౌర్య "కీర్తి" తెలంగాణ పల్లెలో  ..
ఎర్ర జెండాల ఎగురుతూనే ఉంటుంది