- తంగెళ్ళపల్లి ఆనందాచారి
9848683377

నుదుటన మాసిన విధి రాతలు
పగిలిన పాదపు నెర్రెలు మిగిల్చిన గీతలు
మలిగిన చేతి భాగ్యపు రేఖలు
వంగిన నడుముకు ఆనిన చేతులు

కుంగిన దేహం నిండా ముడుతలు
జారిన చెంపలు మారిన రూపు తరీకలు
మందమైన చెవులు మసక మసక కళ్ళు
రాలిపోయిన పళ్ళు కదలలేని కాల్లు

కండలు కరిగించి కష్టాలెన్నో పడి
కన్నీళ్ళు దిగమింగి కలోగంజో తాగి
కన్నబిడ్డల కోసమని...
కాయమంతా గాయమైన ఈ వృద్ధులు
మూడోకాలితో నడుస్తూ ముక్కంటికి సమానమైన పెద్దలు

ముడుతలు కావవి ఒంటిపై అనుభవాల కాతలు
బతుకు పుస్తకాన్ని చదివి సారంతో రాసిన రాతలు
గతకాలపు జ్ఞాపకాల చరితలు గురుతులు
వృద్ధులు మన పాలిట గుప్తనిధులు జీవనదులు
భావితరానికి సాంస్కృతిక వారధులు సారధులు

కాల్లుమొక్కి కడుపులోన దాచుకుందాం
మనల కన్న ఋణం కాస్తైనా తీర్చుకుందాం