- తాళ్ళపల్లి శివకుమార్
మీదికొండ, ఘనపూర్ స్టేషన్
9133232326.
బతుకమ్మ పండుగ రేపనంగా
నువ్వు తప్పించుక సందు తిరిగితే
కాళ్ళు ఇరిసి పొయ్యిల పెడుత అని
అవ్వ మాటలు జోరీగలై వెంటబడుతుంటయి
శివుడూ..
యాల అయితాంది లేరా
పువ్వుకూ పొద్దూబూకుతాందని
తెల్లారగట్ల నాయన కూతబెడుతుంటే
నిద్రదొంగ అదిరిపడి భయపడేటోడు
పొగలు గక్కుతున్న పొడి మంచులో
సంచి సంకన బెట్టి
సోపతి గాళ్ళతో ఒప్పందం కుదుర్సుకొని
గుట్టలన్ని జల్లడ పట్టేటోళ్ళం
అడుగులన్ని కలవోపుగా సాగుతూ
కమ్మని జోకుల సెటైర్లతో
తంగేడు పువ్వు జేతబట్టి
బస్తాలో గుక్కెటోళ్ళం
ఆరుద్రపువ్వు అలుపుతీర్చే
టేకుపువ్వు చెమట తూడ్చే
గునుగు పువ్వు గుమ్మం చేర్చే
మా అవ్వ నవ్వు
మైళ్ళ దూరాన్ని అడుగుజేసి మయిమరిపించే
పువ్వంతా ఇంట పేర్చి
తీరు తీరు రంగులపూలతో
పెద్దక్క,అవ్వ గౌరమ్మను ముస్తాబు జేస్తూ
మెట్టు మెట్టుగా మారి
బతుకమ్మలో ఒదిగిపోయేటోళ్ళు
ఆ క్షణం వాళ్ళకి పెదాలపై
నవ్వులు మాత్రమే గనిపిస్తై
నాకు మాత్రం పువ్వు సాటున
పొక్కు పోసిన అవ్వ చేతులు,
కష్టపడ్డ అక్క
నయనాల ఘోస యాదికొస్తది
పెద్ద బతుకమ్మ తోడుగా
చిన్న బతుకమ్మ ఉన్నదాయే
పెద్దక్క తోడుగా నా చిన్న అక్క లేకపాయే
ఇంటిని తన ఒంటిసెత్తో శాసించే
ధైర్యం ఎక్కడ తల దాసుకుందో అని గుర్తొస్తది
పువ్వు పేర్చి రాత్రి పూట డప్పుల మోతతో
అవ్వ నడుస్తుంటే మాబాధని అంతా
బతుకమ్మ ఎంట బెట్టుకొని పోయినట్టుంటది
కష్టాన్నంత తోలుకపోయే పువ్వమ్మ
మగాడి బలహీనతను
"కామపు బుద్ధి కూసాలను" కూడా
గుంజుకపోతే బాగుండు
ఇయ్యాల , వాళ్ళ కన్నీటి సంద్రంలో
గింజుక సచ్చెటోళ్ళం కాదేమో..
చెరువు కాడ బతుకమ్మ పాటలు
పొరగాళ్లంత పడుచు పిల్లలకు సైగలు
చిన్నప్పటి సోపతీ గాళ్ళ ఆలింగనాలు
బడిలో పారేసుకున్న నవ్వులు
కళ్ళ ఎదుట తేలియాడుతుంటై
పసి పిల్లల పాషికాయల చిత్తురు గొట్టాలు
తోకబాంబుల పేలుడు సప్పుడులు,
రంగు రంగుల బతక్మమల సోగసులు
ఆ రాతిరి - ఆడతల్లుల మూస్తాబులోనే
కొలువుదీరి, నక్షత్రాలన్ని ఒక్కదగ్గర
కుప్పబోసినట్టు కనిపిస్తై
సంతోషాలు అల్లుతూ పేర్చిన బొడ్డెమ్మ
అందరినీ ఒక్కటి చేసి పాడించింది..
మీ స్నేహితులకు రికమెండ్ చెయ్యండి
