- డా.మహ్మద్ షరీఫ్
సంగారెడ్డి, 9866560527
1ఉ:
దారుణ మైన సంఘటన దగ్ధము జేసిరి యానవాళ్ళు నా
మారణ కాండ విన్న జనమంతయు నోపిక పట్డలేక యా
క్రూరుల జంపుమంటు తమకోపము నంతయు దెల్పువారలై
దారులు మూసి రోడ్లపయి ధైర్యముగా నిలుచుండిరందరున్!
2ఉ:
కామము నిండు కన్నులకు కానగ రాదుగ మంచిచెడ్డలన్
కోమల మైన కన్యలను కోర్కెలు దీర్చు మటంచు జంపుచున్
ప్రేమగ మాటలాడి నిరుపేదగు నింతుల కాల్చివేయుచున్
సేమము లేదు దేశమున సిగ్గు పడాలి సమాజ మంతయున్!
3ఉ:
మత్తు పదార్థ సేవనము మానవ జాతికి పాడుకాలమే?
చిత్తుగ త్రాగి మానవులు జేయుదు రెల్లరు దారుణమ్ములన్
చిత్తము మార్చుకొమ్మనుచు జెప్పుము ప్రీతిగ! మారకున్న? మీ
కత్తికి ఖండగా నరికి కాకుల గద్దల కేయు- మందరిన్!
4ఉ:
రక్షణ లేదు నింతులకు రావణ కాష్టము గాలునట్లుగన్
రక్షిత మైన చోటు కనరాదెటు ధాత్రిని నిశ్చయమ్ము! మా
పక్షము నిల్చి పోరుమిక బాధ్యత గల్గిన పౌరులందరున్
తక్షణమే సహాయమును ధైర్యము నింపుడి దేశమంతటన్!
5పంచచామరము:
కరాళ నృత్యమాయె నేడు కానరాదు మార్గమున్
నిరంతరమ్ము వార్తలందు నీచమైన గాధలే
ధరాతలమ్మునందు క్రూర దారుణాలు నిండెరా
నిరాశ నిండె జీవితాన నేరవృత్తి జూడగా!
మీ స్నేహితులకు రికమెండ్ చెయ్యండి
