కొత్త కొత్త ఆలోచనలను
పుట్టించే మెదడు కుదుళ్లను
ఒత్తిళ్ళతో
పొత్తిళ్లలో పొడవొద్దు
పరిమళింప జేయాలి

ఈ బుర్ర బహుదూరపు తొర్ర
అస్తిత్వానికి మూలం
వ్యక్తిత్వాన్ని పెంచే స్థానం
ఇదో స్వప్న పేటిక
ప్రావీణ్య వాటిక

కలుషితం చేయాలని చూసినా
అంతా కల్లోలితమే
గెలుపుకోసం మలుపుకోసం
తలుపుకోసం
అన్నీ తలుపులు తెరుస్తోంది
ఎన్నెన్ని మజిలీలో ఇక్కడ

అదును చూపిస్తోంది
పదును పెట్టిస్తోంది
ఏదైనా అలికిడి వచ్చినప్పుడు
అల్లకల్లోలం చేస్తోంది
నిశ్శబ్ద నిద్రలో ఉంటుంది
శబ్ద తరంగాలను అందిస్తోంది
ఎన్నెన్నో పార్శ్వాలు
అన్నీ పరిశీలించే యోగ్యత
ప్రాధాన్యత ఉంటోంది

ఓ నిశ్చల మౌనరూపమే
అఖండ ఆజ్ఞలకు నిలయం
ప్రచండ ప్రజ్ఞలకు ప్రళయం
ఇదొక అంతర్యామి
అనంత విశ్వాసాలు
సమస్త సూచకాలు
ఉద్యమింప జేస్తోంది

అగుపించని చలనాలతో
ప్రకంపనాలను సృష్టిస్తోంది
ఇదో అలల కడలి
జీవితాన్ని నడిపిస్తోంది
అప్పుడప్పుడు ముంచేస్తోంది

ఓ చిన్న సంఘటన చాలు
అలలు ఆగిపోవడానికి
ప్రాణం కోల్పోవడానికి
దిశానిర్దేశం చేసే సూత్రధారి
ఎక్కడ యేమైనా తప్పని అవిటితనం
ఇదో గత వర్తమానాల వారధి

సుకుమారంగా చూడాలి
అప్పుడే వళ్ళంతా పులకింత
ఎన్నెన్ని పొరలో ఎన్నెన్ని అరలో
అన్నీ స్పర్శిస్తూ వర్శిస్తూ
కురిసే ఆశలు మెరిసే ఆలోచనలు
సమస్తనాడులకు అందించేది
సమస్తానికి సంకేతాలు పంపిచేది

- అంబటి నారాయణ
9849326801