నవతెలంగాణ-వేమనపల్లి
అసాంఘిక శక్తులకు సహకరించొద్దని ఇన్‌చార్జి డీసీపీ అఖిల్‌ మహాజన్‌ అన్నారు. నీల్వాయి పోలీస్‌స్టేషన్‌ పరిధిలోని రాజారాం గ్రామపంచాయతీలో శుక్రవారం పోలీసులు మీ కోసం కార్యక్రమాన్ని నిర్వహించారు. ఈ సందర్భంగా డీసీపీ మాట్లాడుతూ అసాంఘిక శక్తుల వల్ల అభివృద్ధికి ఆటంకం ఏర్పడుతుందన్నారు. గ్రామాల్లోకి ఎవరైన కొత్త వ్యక్తులు వస్తే ఆశ్రయం కల్పించవద్దని, పోలీసులకు సమాచారం ఇవ్వాలని తెలిపారు. విద్యార్థులు, యువకులు ఉన్నత చదువులు చదువుకోవాలని, చెడు వ్యసనాలకు దూరంగా ఉండాలని సూచించారు. గిరిజనుల అమాయకత్వాన్ని ఆసరా చేసుకుని కొన్ని సంఘ విద్రోహ శక్తులు ప్రలోభాలకు గురిచేసి, చెడు మార్గం వైపు నడిచేలా ప్రోత్సహిస్తారన్నారు. గిరిజనులకు ఎల్లప్పుడూ క్షేత్రస్థాయి పోలీస్‌ అధికారులు అందుబాటులో ఉంటు ప్రతి విషయంలో తోడ్పాటును అందిస్తామని తెలిపారు. ప్రభుత్వం అందించే వివిధ కార్యక్రమాలను గిరిజనులకు చేరవేయడానికి పోలీస్‌శాఖతో పాటు అన్ని ప్రభుత్వ శాఖలు సమన్వయంతో పని చేస్తాయన్నారు. అనంతరం గిరిజనులకు దుప్పట్లు, బియ్యం, మహిళలకు చీరలు, యువకులకు క్రీడా సామాగ్రిని పంపిణీ చేశారు. మావోయిస్టు యాక్షన్‌ టీం సభ్యులతో ఉన్న పోస్టర్లను విడుదల చేశారు. ఫొటోలో ఉన్న వారి ఆచూకీ తెలిస్తే సమాచారం ఇవ్వాలని, సమాచారం ఇచ్చిన వారి పేర్లను గొప్యంగా ఉంచి, పారితోషికం అందిస్తామని డీసీపీ తెలిపారు. ఈ కార్యక్రమంలో జైపూర్‌ ఏసీపీ గోపతి నరేందర్‌, చెన్నూర్‌ రూరల్‌ సీఐ విద్యాసాగర్‌, చెన్నూరు పట్టణ సీఐ ప్రవీణ్‌ కుమార్‌, నీల్వాయి ఎస్‌ఐ గోపతి నరేష్‌, చెన్నూరు టౌన్‌ ఎస్సై మహేందర్‌ పోలీసు సిబ్బంది పాల్గొన్నారు.
