- అడ ప్రాజెక్టులో బోటింగ్‌ ప్రారంభం
నవతెలంగాణ-ఆసిఫాబాద్‌
జిల్లాలో టూరిజం అభివృద్ధి కోసం అన్ని చర్యలు తీసుకుంటున్నట్లు జడ్పీ చైర్‌పర్సన్‌ కోవ లక్ష్మి తెలిపారు. మండలంలోని అడ ప్రాజెక్టులో రూ.25లక్షల వ్యయంతో చేపట్టిన బోటింగ్‌ను శనివారం కలెక్టర్‌ రాహుల్‌ రాజ్‌, ఐటీడీఏ పీవో వరుణ్‌రెడ్డి, అదనపు కలెక్టర్లు రాజేశం, చాహత్‌ బాజ్‌పేరు, ఎమ్మెల్యే ఆత్రం సక్కు, జెడ్పిటిసి నాగేశ్వరరావుతో కలిసి ప్రారంభించారు. ఈ సందర్భంగా ప్రాజెక్టులో బోటింగ్‌ ట్రిప్పు నిర్వహించారు. అనంతరం మాట్లాడుతూ జిల్లాలో మరిన్ని ప్రాంతాల్లో బోటింగ్‌ ఏర్పాటు చేయడానికి ప్రయత్నాలు చేస్తున్నట్లు తెలిపారు. జిల్లా ప్రజలకు బోటింగ్‌ అందుబాటులోకి రావడం వల్ల టూరిజం మరింత అభివృద్ధి చెందే అవకాశం ఉంటుందని తెలిపారు. ప్రాజెక్టు ప్రాంతంలో పర్యాటకుల కోసం అభివృద్ధి కార్యక్రమాలు చేపట్టనున్నట్టు వివరించారు. బోటింగ్‌ను జిల్లా ప్రజలు వినియోగించుకోవాలని సూచించారు. టూరిజం అధికారులు మాట్లాడుతూ రెండు మూడు రోజుల్లో బోటింగ్‌ పూర్తిస్థాయిలో అందుబాటులోకి రానుందని తెలిపారు. ఒక్కొక్కరికి రూ.50 చొప్పున టికెట్‌ ధర నిర్ణయించే అవకాశం ఉందన్నారు. ఈ కార్యక్రమంలో జిల్లా మత్స్యశాఖ అధికారి సాంబశివరావు, జిల్లా పంచాయతీ అధికారి రమేష్‌, డిపిఎం రామకృష్ణ పాల్గొన్నారు.
