నేను ముస్లిం అయితే ఏమిటి ?
నువ్వు హిందువైతే ఏమిటి?
నీ గుడి ముందు బిచ్చగాళ్ళు హిందువులే
అయినా నువ్వు గుండెలకు హత్తుకోవు
మసీదు ముందు ఫకీర్లు ముస్లిములే
అయినా నేను హత్తుకోను.
నువ్వు ఎన్ని వ్రతాలు చేసుకున్నా
నేను ఎన్ని రోజాలు పాటించినా
నువ్వు టాక్స్‌ ఎగ్గొట్టేందుకు
ఏ సెక్షన్లు వెతుక్కుంటావో
నేనూ అవే సెక్షన్లు ఫాలో అవుతాను.
నీ మంత్రాలు సంస్కృతం అయినా
నా సూరాలు అరబ్బి అయినా
మన పిల్లల్ని ఇంగ్లీషు మీడియం
మానిపించే ధైర్యం నీకు లేదు నాకూ లేదు.
నువ్వు గుడికెళ్ళే దారిలో
ఏ గుంతల రోడ్డులో ధక్కా
ముక్కీలు తింటూ వెళ్తావో
నేను అదే కంకర తేలిన నాసిరకం రోడ్డులో
మసీదుకు వెళ్తాను.
నీ పండగలకు
ఏ వెజ్‌ వంటలు చేసుకోవాలన్నా
నా పండుగులకు ఏ నాన్‌వెజ్‌ వంటలు
వండుకోవాలనుకున్నా
కిరాణ కొట్టులో ధరల పట్టికలు
ఇద్దరినీ భయపెడుతూనే ఉంటాయి.
నువ్వు కళ్ళ మధ్య
ఎంత పెద్ద బొట్టు పెట్టుకున్నా కానీ
నేను కళ్ళలో ఏ సుర్మా పూసుకున్నా కానీ
ఎవరి కళ్ళు కూడా ఏ కల్తీని గుర్తుపట్టలేక
జిందగీలు మోసపోతూనే ఉంటాయి.
నువ్వు ఏ పానకం చేసుకోవాలనుకున్నా
నేను ఏ పాయసం చేసుకోవాలనుకున్నా
ఇద్దరివీ నీళ్ళ క్యాను కొనుక్కునే
బతుకులై నిరీక్షిస్తుంటాయి.
నువ్వు వాస్తు చూసి ఇల్లు కట్టుకున్నా
నేను వాస్తు లేక ఇళ్ళు కట్టుకున్నా
మన ఇంటి ముంగిట డ్రైనేజులు
మన సహనాల్ని పరీక్షిస్తూనే ఉంటాయి.
పవిత్ర దేశం అని నువ్వేదో అనుకోవడం
సారే జహాసే అచ్ఛా అని
నేను పాడుకోవడమే కానీ
స్వేచ్ఛగా ఊపిరి తీసుకోలేక
పొల్యూషన్‌కు ఇద్దరం
ముక్కులు మూసుకోని తిరుగుతూనే ఉంటాం.
రోజూ గోమూత్రం తాగినందుకు
నీకు ఎవడూ జీతం ఇవ్వడు
పవిత్ర జంజం నీళ్ళు తాగినందుకు
నాకు ఎవడూ తనఖా ఇవ్వడు
నేను ఏ గడ్డం అరబ్‌ వాని వద్దకు వెళ్ళినా
ఇదే స్వర్గాదపి గరీయసి నువ్వు అనుకున్నా
మనం చెమట చుక్కలు చిందించనిదే
మనకెవడూ బువ్వ పెట్టడు.
నువ్వే పండుగ నవరాత్రులు చేసుకున్నా
నేను ఏ పండుగ మాసాలు చేసుకున్నా
బ్లాక్‌ మనీ దొంగల్ని ఏ పాలకుడు కూడా
పూర్తిగా పట్టుకోలేడని ఒప్పుకుంటాము.
నీ సంప్రదాయంలో పిల్ల పెళ్ళి చేసినా
నా తరీఖాలో బేటీ పెళ్ళి చేసినా
మాలో మంచోడు దొరుకుతాడో లేదో అనే
ఇద్దరం భయపడుతూ వెతుకుతుంటాం.
మనిద్దరికి తెలుసు
వర్షాకాలం వస్తుందంటే
కాగితం పడవల ఆనందం పోయి
మన అపార్ట్‌మెంట్లు
ఎప్పుడు మునుగుతాయో అనే ఫికర్‌
నీకు ఉంది నాకు ఉంది.
మనిద్దరికీ తెలుసు
నా గజల్‌ ఖవ్వాలి లాగే
నీ తియ్యని ఆలాపన
ఏదో ప్రమాదంలో ఉంది.
మనమిద్దరి గొంతుల్ని
ఏదో రాజకీయం కబ్జా చేసేస్తుంది.
మనిద్దరికి తెలుసు
నేను ముస్లిం అయితే ఏమిటి ?
నువ్వు హిందువు అయితే ఏమిటి?
మన మిద్దరం ఒప్పుకునే
నిజం మాత్రం ఒకటున్నది
నువ్వు అమెరికా పోయినా
నేను ఏ అరబ్‌ కు వెళ్ళినా
మనమంతా భారతీయులం
హిందూ ముస్లిం భాయీ భాయిలం.
కావున, రాజకీయ నాయకుల ప్రయోజనాల
కోసం మనం ఒకరినొకరు దూషించుకోవద్దు.
- సైఫ్‌ అలీ గోరే సయ్యద్‌