పాలన ఎవరు చేసినా ప్రజలకు స్వావలంభన (చేయూత) కావాలి. రాజకీయ స్వావలంభన ఎలాగూ అనిశ్చితితో కూడినదే. అలాంటప్పుడు కనీసం ఆర్థిక స్వావలంభనైనా పరిపుష్టంగా ఉండాలి. దానికి ఏకైక మార్గం ప్రభుత్వ రంగం. అందులో ముందు వరుసనున్నది ఎల్‌ఐసీ. దీనినిప్పుడు ఖండఖండాలుగా కోసి పంచబోతున్నారు.
     మూలధనమే అవసరంలేని చోట మూలధనాన్ని నిర్ణయించి కొంత భాగాన్ని అమ్ముకోవడం ద్వారా ప్రభుత్వం లాభపడ చూస్తున్నది. వాటాలు దక్కించుకునే వాటాదారులు ఎల్‌ఐసీ సాధించే ప్రగతిలో భాగస్వాములు కావాలని కోరుకుంటున్నారు. ఐఆర్‌డీఏ నిబంధనల ప్రకారం ఒక ఇన్సూరెన్స్‌ కంపెనీ ప్రారంభించడానికి 100 కోట్లు పెట్టుబడి పెట్టాలి. సంస్థ కార్యకలాపాలు పెరిగేకొద్దీ సాల్వెన్సీ మార్జిన్‌ కొనసాగించేందుకు, చర వ్యయాలను ఎదుర్కునేందుకు మూలధన సమీకరణ అవసరమవు తుంది. 2048 ప్రధాన శాఖలతో మరో మూడు వేలు ఉప, శాటిలైట్‌ శాఖలతో పటిష్టమైన పునాది ఎల్‌ఐసీ కలిగి ఉన్నది కాబట్టి మూలధనం అవసరం లేదు. ఏటా పోగవుతున్న మిగులు దృష్ట్యా, సాల్వెన్సీ మార్జిన్‌ సరిపోయిన దానికన్నా ఎక్కువగానే ఉన్నది. ఏ కంపెనీకైనా 1.5శాతం సాల్వెన్సీ మార్జిన్‌ కావాలి కానీ ఎల్‌ఐసీ 1.76శాతం కలిగి ఉన్నది. ఐపీఓ దష్ట్యా-ఎల్‌ఐసీ యొక్క అధీకృత మూలధనం (ఆథరైజ్డ్‌ క్యాపిటల్‌) 25 వేల కోట్లు ఉండాలంటూ, వాటా ముఖ విలువ పది రూపాయలు ఉంటుందంటూ నిర్థారణ అయినట్లు వార్తలు ప్రాచుర్యంలో పెట్టారు, అనగా 2500 కోట్ల వాటాలన్నమాట. ఎంత మొత్తానికి ఐపీఓకి వెళ్ళేది ఆర్థిక శాఖ మంత్రి ఆధ్వర్యంలోని బృందం నిర్ణయిస్తుందని ప్రకటించారు. ఎల్‌ఐసీ వాటా ప్రారంభ ప్రీమియం ధర 450 నుండి 600 వరకు ఉండవచ్చని కూడా సంకేతాలు స్పష్టంగా పంపిస్తున్నారు. ఎల్‌ఐసీ వాటా విలువ రమారమి 500 రూపాయలు అనుకున్నా, పది రూపాయల ముఖ విలువ గలిగిన 2500 కోట్ల వాటాలు 12.5 లక్షల కోట్ల విలువ పలుకుతాయన్నమాట! ఎనిమిది శాతం మేరకు అమ్మినా లక్ష కోట్ల రూపాయలు వస్తాయి మరి! ఒకవైపు ఎల్‌ఐసీ యొక్క ఎంబెడెడ్‌ వ్యాల్యూ (వాస్తవ విలువ)ను మదింపు చేసేందుకు మిల్లిమాన్‌ సెక్యూరిటీస్‌ అనే సంస్థను నియమించుకొని ఆ పని జరుగుతుండగానే మరోపక్క ఆథరైజ్డ్‌ క్యాపిటల్‌ 25 వేల కోట్లు ఉండాలంటూ ముందే నిర్ణయించడం దేని ఆధారంగా జరిగిందో వివరించాల్సిన బాధ్యత ఉన్నది. ఐపీఓ అంశంలో సవరించిన నిబంధనల ప్రకారం లక్ష కోట్ల విలువ కలిగిన సంస్థలో కనీసం ఐదు శాతం వాటాలు విక్రయించాలని ఉన్నది. గత బడ్జెట్‌లో ఆర్థిక శాఖ మంత్రి ప్రసంగిస్తూ 10శాతం వాటా విక్రయంచడం ద్వారా లక్ష కోట్లు ఎల్‌ఐసీ ఐపీఓ ద్వారా సాధించాలని అభిప్రాయపడ్డారు. అనగా సంస్థ ఆస్తుల మదింపు జరగకముందే సరాసరి 8 నుంచి 10 శాతం వాటా విక్రయానికి లక్ష కోట్లు వస్తుందని అంచనా వేశారు! మూలధన మొత్తం, అమ్మ వలసిన శాతం, రాబట్టుకోబోయే రొక్కం బడ్జెట్‌ పత్రాల్లోనే ప్రకటించినప్పుడు ఎంబెడెడ్‌ విలువ నిర్దారించాలనీ, దాని కోసం ఒక సంస్థను ఎన్నుకునే ప్రక్రియకు సలహాదారులుగా డెల్లాయిట్‌, ఎస్‌.బి.సి క్యాప్స్‌ని నియమించుకోవడం వంటివన్నీ శంకంలో పోయడం కోసమేనా! అన్న అనుమానం కలుగుతుంది. ఎందుకంటే బ్యాంకింగ్‌ రంగంలో హెయిర్‌ కట్టింగ్‌, ఆర్బిట్రేటర్‌ రెసొల్యుషన్‌, ఇన్సాల్వెన్సీ బ్యాంక్రప్టసీ కోడ్ల రూపంలో తగ్గించబడుతున్న రాని బాకీల్లో(నిరర్దక ఆస్తులు, ఎన్‌.పి.ఎ) బయట పడుతున్న క్రోనీ క్యాపిటలిజం కళ్ళకు కట్టిన సత్యం. వాటాదారులకు ఓ పది శాతం వాటాలు కేటాయిస్తామనీ, ఉద్యోగులకు డిస్కౌంట్‌ ఇస్తారని వార్త వెలువడింది. ఇది మెహర్బానీ అవుతుందా? మార్కెట్‌ రేటుకే అర్హత కలిగిన వారికి వాటాలు కేటాయించవచ్చు. సాంకేతికంగా చూస్తే ఈ మొత్తం వాటాలు పాలసీదారులకు చెందినవే, ఎందుకంటే ఉన్న ఆస్తులన్నీ పాలసీదారుల సొమ్ముతో చేకూరినవే. గుడ్విల్‌ మాత్రం ప్రభుత్వ గైడెన్లో ఉద్యోగులు నిలబెట్టిన గొప్పతనమే.
     కార్పొరేషన్‌ను కంపెనీగా మార్చేందుకు, స్టాఫ్‌ రెగ్యులేషన్స్‌ను స్టాఫ్‌ రూల్స్‌గా పిలిచేందుకు, ఎల్‌ఐసీ చైర్మన్‌ను ఇక నుంచి చీఫ్‌ ఎగ్జిక్యుటీవ్‌ ఆఫీసర్‌(సీఈవో)గా పిలిచేందుకు కావలసిన మార్పులు చేర్పులు చేస్తూ ఆగమేఘాలమీద గెజిట్లు కేంద్ర ప్రభుత్వం విడుదల చేసింది. ఈ పేర్ల మార్పు వలన జరిగేదేమంటే, ప్రభుత్వం తమ బాధ్యత నుండి తప్పించుకుని సంస్థ కార్యకలాపాలన్నీ కంపెనీల చట్టం ప్రకారం జరుగుతాయి. అయితే ఎల్‌ఐసీ పనితీరులో, ఎల్‌ఐసీ అందిస్తున్న సేవల్లో ఏమాత్రం తేడా ఉండదు. రాబోయే తేడా మొత్తం సంస్థ ఆర్జించే లాభాల లేదా మిగులు పంపిణీకి సంబందించినదే ఉంటుంది. సేవా దృక్పధం నుండి లాభాపేక్ష పైపు విధానాలు రూపొందించబడుతాయి. లాభాపేక్షే ప్రధానమైనప్పుడు గ్రామీణ, తక్కువ లాభార్జన కలిగిన ప్రదేశాలనుంచి ఎల్‌ఐసీ ఆఫీసులు నిష్క్రమించే ప్రమాదమూ ఉన్నది. సేవా ధృక్పథంతో నడుస్తూ అత్యధిక లాభాలార్జిస్తున్న సంస్థ దేశంలో ఎల్‌ఐసీ మాత్రమే. ఇన్నాళ్ళూ ఏర్పడిన మిగులులో పాలసీ దారులకు 95శాతం పంచే పద్ధతిని ఇక నుంచి 90శాతానికే పరిమితం చేస్తారు. ఎల్‌ఐసీలో రెందు రకాల పాలసీలుంటాయి. ఒకటి టర్మ్‌ ఇన్సురెన్స్‌, దీనికి సంస్థ లాభాలతో ఎలాంటి సంబంధం లేకుండా విపత్తు జరిగినప్పుడు హామీ మొత్తం చెల్లించ బడుతుంది. రెండవది కన్వెన్షనల్‌ లేదా ఎండోమెంట్‌ పాలసీలు. వీటిపై ఏటా బోనస్‌ ప్రకటించ బడుతుంది. అయితే ఐపీఓ అనంతరం వాటాదారులకు లాభాలు పెంచేందుకు వీటిని విడివిడిగా లెక్కించే అవకాశమున్నది. ఐపీఓ ద్వారా కొంత శాతం వాటాలను అమ్మినప్పటికీ మెజారిటీ వాటాలు తన దగ్గరే ఉంచుకుంటానని కేంద్ర ప్రభుత్వం ప్రకటించినది కాబట్టి అది ఆ మాటపై నిలబడినంతకాలం సంస్థ కార్యకలాపాలపై ప్రయివేటు భాగస్వామ్య ప్రభావం ఎక్కువగా ఉండే అవకాశం లేదు. కానీ జనరల్‌ ఇన్సురెన్స్‌ కంపెనీ- యునైటెడ్‌ ఇండియా అస్స్యూరెన్స్‌ కంపెనీని పూర్తిగా ప్రయివేటీకరించాలన్న ఉద్దేశ్యం బయట పడ్డాక ప్రభుత్వ మాటపై మరింత నమ్మకం పోయింది. ఎల్‌ఐసీ మనుగడలో అత్యంత ప్రధాన భూమిక పోషిస్తున్నది ఏజెంట్లు. ఒత్తిడిలేని, స్వతంత్ర, శాశ్వత ఆదాయ మార్గంగా ఎల్‌ఐసీ ఏజెన్సీ వృత్తి ఉన్నది కాబట్టి ఏజెంట్లు తమ వృత్తిని కొనసాగించగలుగుతున్నారు. ప్రయివేటు కంపెనీల ఆగమనం తర్వాత ఎల్‌ఐసీ ఏజెంట్ల సంఖ్యలో కొంత తగ్గుదల కనిపించినప్పటికీ గత సంవత్సరం నుండి మళ్లీ మెరుగవుతూ 13 లక్షల 50 వేలకు చేరింది. అదే ప్రయివేటు సంస్థలు నియమించిన ఏజెంట్లలో శాశ్వత కొనసాగింపు చాలా తక్కువ. సాంకేతిక పరిజ్ఞాన వినియోగంలోనూ ఎల్‌ఐసీ ఒక అడుగు ముందుకేసి త్వరిత ప్రాతిపదికన సర్వీస్‌ అందించే సంస్థల్లో అగ్రగామిగా ఉన్నది కాబట్టే ఆ ఘనత ఇప్పటికిప్పుడే కరిగి పోయేది కాదు.
     పబ్లిక్‌ సెక్టార్‌ బ్యాంకుల్లో వాటాల విక్రయం జరిగినప్పటికీ చైర్మన్‌ పదవి కొనసాగుతూ ఉన్నది కానీ ఇన్సూరెన్స్‌ రంగంలో ప్రయివేటు కంపెనీల మాదిరిగా ఎల్‌ఐసీ కూడా చైర్మన్‌ కాకుండా సీఈఓను నిర్ధారిస్తూ తీసుకున్న నిర్ణయం వెనుక వివరణ ఇవ్వాల్సిన బాధ్యత కేంద్రానిదే. స్టాఫ్‌ ''రెగ్యులేషన్స్‌'' అంటే ఇరువర్గాలను బాధ్యులను చేసే నియమ నిబంధనలు. స్టాఫ్‌ ''రూల్స్‌'' అంటే కేవలం ఉద్యోగులకు వర్తించే నియమ నిబంధనలు అని అర్థం. అంటే ఇక నుండి యజమానికి ఎలాంటి బాధ్యత ఉండకపోగా ఫలానా రూల్‌ కింద ఫలాన ఉద్యోగిపై చర్య తీసుకునేందుకు మార్గం సుగమం చేసుకుంటున్నారు అన్నమాట. లాభం పెరగాలంటే దాని సృష్టికి కారకులయ్యే వర్కర్లపై కొరడా ఝుళిపించే అధికారాలు యజమానికి ఉండాలి! కార్పొరేషన్లు అయితే ప్రభుత్వ గైడెన్స్‌లో సహకార పద్ధతిలో పని చేస్తాయి, కంపెనీలు ప్రభుత్వం ఖరారు చేసిన చట్టంలోని నిబంధనలకు లో బడి పనిచేస్తాయి. బడా పెట్టుబడిదారులు, ఇన్సూ రెన్స్‌ రంగంలో ఉన్న పోటీ దారులు కోరుకున్నట్టుగానే ప్రభుత్వం ప్రభుత్వ రంగాలపై తమ బాధ్యతను వదులుకోవడమే ఈ రకమైన చర్యలన్నింటి అర్థం.
    ఎల్‌ఐసీ ఐపీఓ ద్వారా మార్కెట్‌ క్యాపిటలైజేషన్‌ పెరుగుతుందనేది ఒక వాదన. అవును మరి నేడున్న స్టాక్‌ మార్కెట్కు మరో లక్ష కోట్లు ప్రస్తుతం, రాబోయే మూడేండ్లలో మరో ఐదు లక్షల కోట్లతో ఒక కంపెనీ తన వాటాలను మార్కెట్‌లో ఉంచితే క్యాపిటలైజేషన్‌ బాగా ఏర్పడినట్లేగా. గృహ పొదుపును స్టాక్‌ మార్కెట్లోకి లాగాలన్నది ప్రధాన అజెండాగా మార్కెట్‌ ఎకానమిస్టులు బోధిస్తుంటారు. దీని అర్థమేమంటే ప్రతి పౌరుడూ తన తిండి గింజలు కొనుక్కున్న తరువాత మిగతా సంపాదనంతా స్టాక్‌ మార్కెట్లో దాచుకోవాలి. అలా దాచుకో బడిన సొమ్మును కంపెనీలు ట్రాస్పరెన్సీ-అభివృద్ది అనే సాకును అడ్డం పెట్టుకుని మొత్తం స్వాహా చేస్తూ ఉంటాయి. జనాబాలో కేవలం మూడు శాతం మాత్రమే స్టాక్‌ మార్కెట్‌ లావాదేవీలు నడిపే ప్రజలకు మేలు జరుగుతున్నదని వాదిస్తారు. కొరోనా వంటి విపత్తు ఏర్పడగానే స్టాక్‌ మార్కెట్‌ కుప్ప కూలుతుంది, ఆసుపత్రి ఖర్చులకై వాటాలమ్ముకున్న వాళ్ళకి ఆశల కన్నీరు ఎదురొస్తుంది. ఆపత్కాలంలో కనీసం మౌలిక వసతుల కల్పనకు కామధేనువుల్లా సాయపడే ప్రభుత్వ రంగాలను విస్మరించడం వాంఛనీయం కాదు.
- జి. తిరుపతయ్య
సెల్‌: 9951300016