తెలంగాణ రాష్ట్రంలో రాష్ట్రపతి నూతన ఉత్తర్వులకు అనుగుణంగా లోకల్‌ క్యాడర్లలో ఉద్యోగుల విభజన అత్యంత వివాదాస్పదంగా మారింది. సీనియారిటీ ఆధారంగా జిల్లా, జోనల్‌, మల్టీజోనల్‌ పోస్టుల్లో ఉద్యోగుల కేటాయింపు జరపాలంటూ రాష్ట్ర ప్రభుత్వం ఏకపక్షంగా విడుదల చేసిన జీఓ 317 రాష్ట్ర వ్యాప్తంగా తీవ్రమైన అలజడికి కారణమైంది. ఏ స్థానికత సెంటిమెంటును ఉపయోగించుకొని తెలంగాణ రాష్ట్రసాధన ఉద్యమం జరిగిందో ఆ స్థానికత పునాదులనే ధ్వసం చేయబూనుకున్న ప్రభుత్వ వైఖరిపై ఉపాధ్యాయులు, ఉద్యోగులు మండిపడుతున్నారు. బలవంతపు బదిలీలతో స్వంత ఊరుకు, అయిన వాళ్ళకూ దూరమై పొరుగు జిల్లాలో పరాయివాళ్ళుగా రిటైర్‌మెంట్‌ వరకూ కొనసాగాల్సిందేనా అని మధన పడుతున్నారు.
   తెలంగాణ రాష్ట్రం ఏర్పాటు అనంతరం అప్పటివరకూ ఉన్న 10జిల్లాలను 2016 అక్టోబర్‌ 11 నుండి 31 జిల్లాలుగా పునర్విభజించి, జోనల్‌ వ్యవస్థను రద్దు చేయాలని రాష్ట్ర ప్రభుత్వం నిర్ణయించింది. తెలంగాణ ప్రత్యేక రాష్ట్రంగా ఏర్పడినప్పటికీ ప్రాంతీయ అసమానతలు కొనసాగుతున్నాయని, విద్య, ఉద్యోగాల్లో స్థానికులకు సముచితమైన అవకాశాలు కల్పించటానికి వీలుగా ఏర్పాటైన జోనల్‌ వ్యవస్థను రద్దు చేయటం సమంజసం కాదని ఆనాడే స్పష్టంగా చెప్పాం. అయినా ఆర్టికల్‌ 371(డి)కి సవరణ చేయకుండా జోనల్‌ వ్యవస్థ రద్దు అసాధ్యమని కూడా స్పష్టం చేశాం. రెండు జోన్లను ఆరు లేదా అంతకంటే ఎక్కువ చేయాలని ప్రతిపాదించాం. జోనల్‌ వ్యవస్థ రక్షణ కోసం ఐక్య ఉద్యమాన్ని నిర్వహించాం. సరిగ్గా సంవత్సరం తర్వాత రాష్ట్ర ప్రభుత్వం 31జిల్లాలను ఏడు జోన్లు, రెండు మల్టీ జోన్లుగా ఏర్పాటు చేస్తామని ప్రకటించింది. జిల్లా కార్యాలయాల్లోని ఉద్యోగులను ఆర్డర్‌ టు సర్వ్‌ పేరిట తాత్కాలికంగా కొత్త జిల్లాలకు కెటాయించారు. ఉపాధ్యాయులకు, ఇతర ఉద్యోగులకు వారు పనిచేస్తున్న పాఠశాల/ కార్యాలయం ఏ జిల్లా పరిధిలోకి వస్తే ఆ జిల్లా ఉద్యోగులుగా పరిగణించబడ్డారు.
   తెలంగాణ రాష్ట్ర ప్రభుత్వ ప్రతిపాదన మేరకు ఉమ్మడి రాష్ట్రంలో అమలులో ఉన్న రాష్ట్రపతి ఉత్తర్వులను రద్దు చేస్తూ నూతన ప్రెసిడెన్షియల్‌ ఆర్డర్‌ ది తెలంగాణ పబ్లిక్‌ ఎంప్లాయిమెంట్‌ (ఆర్గనైజేషన్‌ ఆఫ్‌ లోకల్‌ క్యాడర్స్‌ అండ్‌ రెగ్యులేషన్‌ అఫ్‌ డైరెక్ట్‌ రిక్రూట్‌ మెంట్‌) ఆర్డర్‌, 2018 (పిఓ - 2018) జిఎస్‌ఆర్‌ 820(ఇ) ఆగస్టు 29న వెలువడగా రాష్ట్ర ప్రభుత్వం జీఓ 124 జిఎడి తేదీ 30.08.2018 ద్వారా అమలులోకి తెచ్చింది. ఆ తర్వాత 2019 ఫిబ్రవరిలో ఏర్పాటు చేసిన మరో రెండు జిల్లాలను చేర్చి, వికారాబాద్‌ జిల్లాను చార్మినార్‌ జోన్‌లోకి మార్చి రాష్ట్రపతి ఉత్తర్వులకు సవరణ ఉత్తర్వులు జిఎస్‌ఆర్‌ 279(ఇ) 2021ఏప్రిల్‌ 16న విడుదల కాగా రాష్ట్ర ప్రభుత్వం జీఓ 128 జిఎడి తేదీ 30.06.2021 ద్వారా అమలులోకి తెచ్చింది. రాష్ట్రపతి ఉత్తర్వులు (పిఓ-2018) విడుదలైన మూడు సంవత్సరాల్లోగా రాష్ట్ర ప్రభుత్వ ఉద్యోగాలను స్థానిక (జిల్లా, జోనల్‌, మల్టీజోనల్‌) క్యాడర్లుగా వర్గీకరించాలనే నిబంధన రాష్ట్రపతి ఉత్తర్వుల్లోనే ఉన్నది. తుది గడువు సమీపిస్తున్న తరుణంలో ఆగస్టు నెలలో ప్రభుత్వం హడావుడిగా శాఖల వారీ పోస్టుల లోకల్‌ క్యాడర్‌ క్లాసిఫికేషన్‌ ఉత్తర్వులు (జిఎడి జీఓలు 141 నుండి 258 వరకు) విడుదల చేసింది. అప్పటినుండి వివిధ లోకల్‌ క్యాడర్లలో ఉద్యోగుల కేటాయింపు ఎలా జరుపుతారనే అంశంపై ఉద్యోగ వర్గాల్లో చర్చోప చర్చలు జరిగాయి. స్థానికత ఆధారంగా సీనియారిటీకి ప్రాధాన్యత ఇస్తూ కేటాయింపులు జరుగుతాయని అందరూ భావించారు. కానీ అందుకు భిన్నంగా రాష్ట్ర ప్రభుత్వం ఏకపక్షంగా డిసెంబర్‌ 6న విడుదల చేసిన జీఓ 317 రాష్ట్ర ఉద్యోగ వర్గంలో తీవ్ర ప్రకంపనలు సృష్టించింది. క్షేత్రస్థాయిలో ఉద్యోగుల మనోభావా లను గమనించకుండా హైదరాబాద్‌ చుట్టూ ఉన్న కొద్దిమంది స్థానికేతరుల ప్రయోజనాలు కాపాడటం కోసం స్థానికత ఊసే లేకుండా ఉద్యోగుల కెటాయింపు నిబంధనలు రూపొందించటం ఆశ్చర్యకరం.
   జిఓలో ఉన్న లోపాలు: స్థానికతను పరిగణించకపోవటం. దివ్యాంగుల వైకల్యం పర్సంటేజి 70శాతంగా నిర్ణయించటం. ఆ ఏరియాలో చేసిన మొత్తం సర్వీసును పరిగణనలోకి తీసుకోకపోవటం. కేంద్ర ప్రభుత్వ, పబ్లిక్‌రంగ సంస్థల స్పౌజ్‌ల ప్రస్తావన లేకపోవటం. వితంతువులు, ఒంటరి మహిళలకు ప్రాధాన్యత ఇవ్వకపోవటం. మరికొన్ని దీర్ఘకాలిక జబ్బులను పరిగణనలోకి తీసుకోకపోవటం.
   జీఓ విడుదలైన వెంటనే ఈ లోపాలను ఎత్తిచూపుతూ సవరించాలని టీఎస్‌ యుటిఎఫ్‌ పక్షాన రాష్ట్ర ముఖ్యమంత్రికి, ప్రభుత్వ ప్రధాన కార్యదర్శికి వినతిపత్రాలు ఇచ్చాం. ప్రభుత్వం పట్టించుకోలేదు. ఉపాధ్యాయుల్లో ఆందోళన వెల్లువెత్తింది. ఇది గమనించిన ప్రభుత్వం డిసెంబర్‌13న విద్యాశాఖ మంత్రి ఆధ్వర్యంలో ఉపాధ్యాయ సంఘాలతో సమావేశం ఏర్పాటు చేసింది. దాదాపు ఆరుగంటలపాటు జరిగిన సమావేశంలో సంఘాల అభిప్రాయాలను ఓపిగ్గా విన్నారు. రాసుకున్నారు. ఇచ్చిన వినతిపత్రాలు తీసుకున్నారు. కానీ ఒక్క సూచనను కూడా పరిగణనలోకి తీసుకోలేదు.
   ఉపాధ్యాయుల నుండి ఒక్కరోజులో ఆప్షన్లు తీసుకున్నారు. రాత్రికి రాత్రే సీనియారిటీ లిస్ట్‌ తయారు చేయాలన్నారు. ఉపాధ్యాయుల బేసిక్‌ సీనియారిటీ జాబితాలు డీఈఓ కార్యాలయాల్లో లేనేలేవు. పాఠశాలల నుండి వివరాలు తెప్పించి హడావుడిగా డ్రాఫ్ట్‌ లిస్టులు ప్రకటించారు. కొన్ని జిల్లాల్లో సీనియారిటీపై వచ్చిన అభ్యంతరాలను సవరించకుండానే ఫైనల్‌ చేసి అలొకేషన్‌ చేసేశారు. మహబూబ్‌నగర్‌, వరంగల్‌, రంగారెడ్డి, కరీంనగర్‌ జిల్లాల్లో సీనియారిటీ నిర్ణయం, జిల్లాల కేటాయింపుల్లో అవకతవకలు జరిగాయని అత్యధికంగా పిర్యాదులు వచ్చాయి.
   సీనియారిటీ జాబితాలు సమగ్రంగా తయారు చేయాలని, ఫైనల్‌ సీనియారిటీ లిస్ట్‌ ప్రకటించిన తర్వాత ఆప్షన్స్‌ రివైజ్‌ చేసుకునే అవకాశం ఇవ్వాలని కోరితే పట్టించుకోలేదు. స్పెషల్‌ క్యాటగిరీ సర్టిఫికెట్స్‌ సరిగా పరిశీలించలేదు. ఎస్సీ, ఎస్టీ దామాషా పాటించలేదు. స్థానిక భాషలనూ పరిగణనలోకి తీసుకోలేదు. ఏజెన్సీ ప్రాంతమైన ఆదిలాబాద్‌ జిల్లా ఉట్నూరు ప్రాంత ఉద్యోగులను వారి ఆప్షన్లకు భిన్నంగా మైదాన ప్రాంతమైన నిర్మల్‌కు మంచిర్యాలకు, ఆదివాసీ ప్రాంతమైన ములుగు జిల్లాకు మహబూబాబాద్‌ నుండి మైదాన ప్రాంత గిరిజనులను, మైదాన ప్రాంత గిరిజనులు ఉన్న మహబూబాబాద్‌ జిల్లాకు ములుగు జిల్లా ఆదివాసీలను కేటాయించారు. ఉమ్మడి ఖమ్మంజిల్లాలో మైదాన ప్రాంత గిరిజనేతరులను, మైదాన ప్రాంత గిరిజనులను ఆదివాసీ ప్రాంతాలైన ములుగు, భద్రాద్రి జిల్లాలకు కెటాయించారు. అదేవిధంగా నాగర్‌కర్నూలు జిల్లాలోని అచ్చంపేట ఏజెన్సీ ప్రాంత గిరిజనులను వారి ఆప్షన్‌కు విరుద్ధంగా ఉమ్మడి మహబూబ్‌నగర్‌ జిల్లాపరిధిలోని అన్ని జిల్లాలకు కేటాయించారు. గిరిజనేతరులను అచ్చంపేట ప్రాంతానికి కేటాయించారు. జిల్లాల్లో ఎస్సీ ఉపాధ్యాయుల దామాషాను సక్రమంగా అమలు చేయలేదు. అలోకేషన్‌ అనంతరం స్పౌజ్‌, సీనియారిటీ, జిల్లాల కేటాయింపుపై కుప్పలు తెప్పలుగా అప్పీల్స్‌ వచ్చాయి. పీఓ - 2018 ప్రకారం అప్పీల్స్‌కు అరవై రోజుల సమయం ఉంటుంది. కానీ జీఓ 317లో నిర్దిష్టమైన గడువు ఇవ్వలేదు. అప్పీల్స్‌ ఏవి పరిష్కరించారో, ఏవి తిరస్కరించారో, కారణాలేమిటో కనీస సమాచారం కూడా ఇవ్వడం లేదు. అంతా నోటి మాటలతోనే నడిపించేస్తున్నారు.
   ప్రాథమిక సమాచారాన్నిబట్టి రాష్ట్ర వ్యాప్తంగా అన్ని శాఖల్లో దాదాపు 40వేలమంది, విద్యాశాఖలోనే 22,500 మంది ఇతర జిల్లాలకు కేటాయించబడినట్లు తెలుస్తోంది. సుమారు పది వేలమంది ఉపాధ్యాయులు తమ ఆప్షన్‌కు విరుద్ధంగా వేరొక జిల్లాకు కేటాయించబడి స్థానిక జిల్లాకు శాశ్వతంగా దూరమయ్యారు. ఇదేమీ చిన్న సంఖ్య కాదు. అన్యాయం ఒకరికి జరిగినా అన్యాయమే.
   ప్రధానంగా సీనియర్లు ఎక్కువగా పట్టణ ప్రాంత జిల్లాలకు, జూనియర్లు ఎక్కువగా గ్రామీణ ప్రాంత జిల్లాలకూ కెటాయించబడినారు. పీఓ - 2018 పేరా 4లో పేర్కొన్న వయస్సు సమతుల్యతకు భంగం కలుగుతుంది. ఇది భవిష్యత్తులో సామాజిక సమస్యగా మారే ప్రమాదం లేకపోలేదు. పీఓ-2018 ప్రకారం 95శాతం ఉద్యోగాలు స్థానికులకే రిజర్వు చేశారు. అయితే నియామకాలు జరగాలంటే ఖాళీలుండాలి కదా... రెండేండ్ల తర్వాత రిటైర్‌మెంట్లు ప్రారంభమైతే పట్టణ ప్రాంత జిల్లాల్లో ఖాళీలు ఏర్పడతాయి. జూనియర్లు ఎక్కువగా కేటాయించబడిన జిల్లాల్లో పదిహేను, ఇరవై సంవత్సరాల వరకు రిటైర్‌మెంట్లు ఉండే అవకాశమే లేదు. ఆయా జిల్లాల నిరుద్యోగుల్లో అసహనం ప్రబలి లోకల్‌ - నాన్‌ లోకల్‌ విభజనతో స్థానికేతరులను వారి స్వంత జిల్లాలకు పంపాలంటూ మరలా జీఓ 610 లాంటి జీఓ కోసం వత్తిడి పెరగొచ్చు. జీఓ 610 వలన కేవలం ఆంధ్రా ఉద్యోగులను మాత్రమే వెనక్కి పంపలేదు. తెలంగాణలోని వివిధ జిల్లాల నుండి వేరే జిల్లాల్లో నియామకం అయిన, బదిలీ అయిన ఉద్యోగులను కూడా వారి స్థానిక (స్వంత) క్యాడర్లకు పంపించారు. అదే పరిస్థితి తెలంగాణ రాష్ట్రంలో పునరావృతం కాదని అనుకోలేం.
   రాష్ట్ర వ్యాప్తంగా జరుగుతున్న ఆందోళన, పోరాటాలను గమనిస్తున్న ప్రభుత్వం ఇప్పటికైనా అన్ని ఉద్యోగ, ఉపాధ్యాయ సంఘాలతో చర్చించి క్షేత్ర స్థాయి సమస్యలను గుర్తెరిగి తదనుగుణంగా జీఓ 317ను సవరించాలి. వికలాంగులు, వితంతువులు, ఒంటరి మహిళలు, సామాజిక వర్గాలకు తగిన ప్రాధాన్యత ఇవ్వాలి. స్పౌజ్‌, పరస్పర బదిలీలకు అవకాశం ఇవ్వాలి. స్థానిక జిల్లాలకు దూరమైన ఉద్యోగులు, ఉపాధ్యాయులను అవసరమైతే సూపర్‌ న్యూమరరీ పోస్టులు మంజూరు చేసి స్వంత జిల్లాలకు తిరిగి పంపించాలి. లేదా భవిష్యత్తులో ఏర్పడే రిటర్మెంట్‌ ఖాళీలలో వారిని తాము కోరుకున్న సొంత జిల్లాకు బదిలీ చేస్తామనే అంశాన్ని ఉత్తర్వుల్లో పేర్కొనాలి. ఏ ఉద్యోగి ఎక్కడ పనిచేయాలో ఎంచుకునే స్వేచ్ఛ ఉద్యోగికే ఇవ్వండి. ఉద్యోగులు మానసికంగా ప్రశాంతంగా ఉన్నప్పుడు మాత్రమే సంతోషంగా పనిచేయగలరు. వారిని ప్రశాంతంగా పనిచేసేటట్లు చూడాల్సిన బాధ్యత రాష్ట్ర ప్రభుత్వానిదే?
- చావ రవి
సెల్‌:9490300571