కరోనా మూడో వేవ్‌ కాలం ఇది. చాలా వేగంగా దౌడ్‌ తీస్తోంది. అంటే వేగంగా మారిపోతోంది కాలం. దానితో పాటు మానవుడూ. ఇక సినిమా వాళ్ళ గురించి చెప్పే అవసరమే లేదు. ఎదో విధంగా తీసేసి, ఇంకో విధంగా అంటే ఆన్‌లైన్‌లో రిలీజ్‌ చేసేసి తమ పని అయిపోయింద నిపించుకోవాలి. అలాగే తమ డబ్బూ రాబట్టుకోవాలి అది వేరే సంగతి. నో అంటావా బాబు నో నో అంటావా బాబూ అని పాడిస్తారు, ఆడిస్తారు. అందరూ చూడాలని కొన్ని సీన్లు పెడతారు. తరువాత వాటిని తీసేసి వెరీ గుడ్‌ బారు అన్న సర్టిఫికెట్‌ తెచ్చుకుంటారు. అది ఇంకో సంగతి. మొత్తం మీద ప్రపంచ గతి అంటే ప్రపంచం ఎలా నడుస్తోందో చూపిస్తారు. వాళ్ళు చూస్తున్నారని మేము తీస్తున్నాం అని చెబుతారు. చూసే వాళ్లేమో వాళ్ళు తీస్తున్నారు కాబట్టి మేము చూస్తున్నాం అనేస్తారు. ఇద్దరూ చేసే పని వాళ్ళు, చూసేపని వీళ్ళు చేస్తూనే ఉంటారు. అదే సినిమా తర్కం. వాళ్ళు నో చెప్పలేదు అందుకే ఈ సినిమాలు అంటారు. వాళ్ళు ఎస్‌ అని కూడా చెప్పలేదు కదా అంటే మాత్రం నో సమాధానం. చిన్నప్పుడు ఎస్‌, నో, ఆల్రైట్‌ అన్న మూడు ముక్కల ఇంగ్లీషు మాత్రం వచ్చినవాడు నెత్తిమీదికి తెచ్చుకున్న కథ చెప్పి నవ్వించేవారు. ఇప్పటికైనా పెద్దవాళ్ళు చెబుతారు కావాలంటే.
సినిమా మొదలు పెడతారు. మొదట్లోనే అనుమానమొస్తే తీద్దామంటావా బాబు వదిలేయమంటావా బాబు అని అడుగుతారు. ఊరకే సినిమా తీసి చేయి కాల్చుకోవడమా లేక కడుపులో చల్ల కదలకుండా పడుకోవడమా అన్న పాయింటుకు ఎస్‌ లేదా నో అని మొదట ఒక సమాధానం సిద్ధంగా ఉంచుకోవాలి. అలా నిర్ణయాలు తీసుకోవలసిన సమయాలు ఎప్పుడూ వస్తూనే ఉంటాయి. ఇంకో చోట ఒక నాయకుడు ఫలానా రూట్లో ఎన్నికల మీటింగుకి పోదామని బయలుదేరతాడు. మధ్యలో ఎదో అడ్డంకి వచ్చి ఆగిపోతాడు. పొదామంటావా సారు ఆగుదమంటావా సారూ అని అధికారులడుగుతారు. ఆలోచిస్తా బాబూ ఆలోచిస్తా బాబూ అని సమాధానం చెప్పి వెంటనే మిత్రుడికి ఫోను కొడతాడు. ఏమి చెయ్యాలి దోస్తు ఇప్పుడేం చేయాలీ దోస్తు అని అడుగుతాడు. ఓట్లొస్తాయా బాసు మనకోట్లొస్తాయా బాసు అని అవతలనుంచి అడుగుతాడు. నో అంటున్నారు బాబు నో నో అంటున్నారు బాసు అంటాడు. వాపస్‌ ఆజావో బాసు వాపస్‌ ఆజావో బాసు అని రిస్కెందుకంటాడు. అలా సినిమా వాళ్ళు కూడా అంతంత డబ్బుపెట్టి సినిమా తీస్తే అవి తిరిగి వస్తాయా రావా అన్న విషయాన్నీ చూసుకొని కానీ ముందుకు పోరు. అలా వ్యాపారమైనా, సినిమా అయినా, వ్యాపారం లా చూసే ప్రజా సేవ అయినా నో అంటావా లేక ఎస్‌ అంటావా అని అడిగి కానీ ముందుకు పోరు. పోకూడదు కూడా. ప్రజా సేవలో లాభాలు ఆశించని వాళ్ళు మాత్రం ఎప్పుడూ ఎస్‌ అనే సేవ చేస్తుంటారు. వాళ్ళు నో అనేది ప్రజలకు వ్యతిరేకంగా ఉన్నవాటిని మాత్రమే అన్న విషయం మరువరాదు.
చదువుల కాలం. అసలు ఎవరు చెబుతున్నారో, ఎవరు చదువుతున్నారో, అందులో ఏమి చదువుతున్నారో తెలియని కాలం. లైఫ్‌ అంటే ఓ జిందగీ అయిపోయిందని సినిమాలో హీరో చెప్పిన తమాషా డైలాగ్‌ గుర్తొస్తుంది. జిందగీ అన్నా లైఫ్‌ అన్నా ఒకటే కదా అంటే, అందులోనే ఉంది మరి తమాషా. ఈ తమాషా మన జీవితాల విషయంలో ఇంకా విచిత్రంగా ఉంటుంది. పిల్లికి చెలగాటం ఎలుకకు ప్రాణ సంకటం అన్నట్టు ఉంటుంది పరిస్థితి . అసలు ఈ టామ్‌ అండ్‌ జెర్రీ కార్టూనులు మన సామెతను చూసే కాపీ కొట్టారని మన దగ్గర ఉన్న ఒకే ఒక్క డైలాగ్‌ చెప్పొచ్చు వెంటనే. చదివెయ్యా సీటు లేదు చదివొస్తే పనీ లేదు అని ఆకలి రాజ్యంలో కమలహాసన్‌ పాడినట్టు ఇప్పుడు ఏది చదవాలో ఏది కూడదో తేల్చుకోవడం చాలా యదార్‌ ఉంది. విద్యార్థుల్లో, తల్లి తండ్రుల్లో కూడా. ఎందుకంటే చదువూ ఒక వ్యాపారమే కదా. అందుకే నోనా, ఎస్సా అని ఒకటికి పదిసార్లు తేల్చుకొని కానీ ముందుకు పోలేని పరిస్థితి. సంకట స్థితి.
నో అనవలసిన సమయంలో ఎస్‌ అనడంవల్లే ఎక్కువ అనర్ధాలు కొనితెచుకుంటారని మానసిక శాస్త్రవేత్తలు చెబుతారు. ఎదో మొహమాటం కొద్దో, మిత్రులో, సన్నిహితులో, బంధువులో అన్న ఫీలింగులో ఎస్‌ అనేస్తుంటారు చాలా మంది. నో అని చెప్పలేకున్నా మళ్ళీ చెబుతాను, చూస్తాను లాంటి నాన్చుడు మాటలతో దాటవేయడం కొన్ని సందర్భాల్లో మంచిదని తెలివిగలవారు చెబుతుంటారు. దానివల్ల ఏంతో సమయం ఎక్కువ సార్లు పైసలు మిగులుతాయని మా మిత్రుడు చెబుతాడు. ఏకంగా ఈ విషయం పైన ఓ పుస్తకమే ఉంది. నీవు నో అని చెప్పదలచుకుంటే ఎస్‌ అని చెప్పొద్దంటాడు ఆ రచయిత. ఇదేదో స్వార్ధపరులు చేసేపని అని అనుకోవలసి పనిలేదని అసలు అలాంటి స్వార్థపరుల దగ్గర ఇలా చెప్పాలని మళ్ళీ మా మిత్రుడు ఒక ఉచిత సలహా పడేస్తుంటాడు. ఒక్కోసారి వన్‌ ప్లస్ వన్‌ ఆఫర్ కూడా ఇస్తుంటాడు సలహాలు. ఒకటి అడిగినది ఇంకొకటి అడగనిది కలిపి.
ఎన్నికల్లో నోటా అని ఒక ఓటు ఉంటుదన్న విషయం అందరికీ తెలుసు. నిలబడ్డ అభ్యర్థుల్లో మనకు ఎవరూ నచ్చలేదనుకోండి, మనం ఈ నోటా ఓటు వేయొచ్చు. ఆ ఓటు ఎవ్వరికీ కాదన్నా మాట. నిలబడ్డ వాళ్ళల్లో మనకు ఒక్కళ్ళూ నచ్చలేదని అర్థం. అందరికీ నో అంటున్నాను, అందుకే నోటా అంటున్నాను అన్నది సారాంశం. అలా నో చెప్పకనే తలతిక్క పనులు చేసే వాళ్ళను మన నెత్తిన ఎక్కించుకుంటున్నామని ప్రజలు గమనించాలి. గమనించి నో చెప్పాలి. లేదంటే బాగా నష్టపోతారు. అసలు మేము ఓటుకింత ఇచ్చినప్పుడే నో చెప్పవలసింది గెలిచాక చెబితే ఏం ప్రయోజనం? వాళ్ళకివ్వాలి కాబట్టి సంపాదించాలిగా!! అని సినిమా మాటలు వీళ్ళూ చెబుతారు.
నేరస్థులు పార్టీల్లో ఉండకూడదంటారు కాని వాళ్ళు తమతో చేరతామంటే మాత్రం నో అనలేరు. వాళ్ళ కేసులన్నీ పక్కన పెట్టిస్తారు కూడా. వాళ్ళు తమను వీడిపోతే మమ్మల్నే నో అంటావా నోనో అంటావా అని పాత కేసులన్నీ తోడితీసి ఉన్నవాళ్ళలో ఇతరులు బయటకు పోకుండ చూసుకుంటారు. అయినా ప్రజలంతా కలిసి నో అంటామూ మేము నోనో అంటాము... అనే రోజులు దూరంలో మాత్రం లేవు... హ్యాపీ సంక్రాంతి...
జె. రఘుబాబు
సెల్‌: 9849753298
