'జిస్‌సే ఖేల్తేహై - ఉస్‌ సే మర్తా హై!' (ఏ ఆయుధంతో నీవు ఆట ఆడతావో ఆ ఆయుధమే నిన్ను బలి తీసుకుంటుంది.
  - ఒక సామెత)
   హిందూమత రాజ్యస్థాపనే లక్ష్యంగా ఆర్‌.ఎస్‌.ఎస్‌. పనిచేస్తున్నదన్న విషయం అందరికీ తెలిసిందే. దాని ఉపాంగమైన బీజేపీ ప్రస్తుతం యూపీలో జరగనున్న అసెంబ్లీ ఎన్నికల్లో హిందూత్వ ఎజెండానే ఒక ఆయుధంగా తీసుకుని ఒక వితండ వాదాన్ని తెరపైకి తెచ్చింది.
   ఈ ఎన్నిక ఎనభై శాతంగా ఉన్న మెజార్టీవారికీ ఇరవైశాతంగా ఉన్న మైనార్టీవారికీ జరుగుతున్న ఎన్నిక అని, మైనార్టీవారి నుండే మెజార్టీవారికి ప్రమాదం పొంచి ఉన్నదని, జాగ్రత్తగా యోచించి ఓట్లేయాలని బీజేపీ నర్మగర్భంగా ఓటర్లకు పిలుపునిచ్చింది. లోతుగా పరిశీలిస్తే ఇది మైనార్టీవారిని మరింతగా భయభ్రాంతులను గావించే లజ్జారహిత రాజ్యాంగ వ్యతిరేక చర్య అని వేరుగా చెప్పక్కర్లేదు. అయితే పరిస్థితులు తారుమారు అవుతున్నాయి. మెజార్టీ ఓట్లు గుండు గుత్తగా పొందాలనుకునే వారికి చుక్కెదురు అవుతున్నది. కులాలు-మతాలు భావవాద పునాదులపై మనిషి ఏర్పరుచుకున్నవే తప్ప భౌతిక వాస్తవాలు కావనే విషయం శాస్త్రం నిత్యం చెపుతూనే ఉన్నది. కనుకనే ప్రతి మతంలోనూ బహుళత్వం, కులంలో ఉప కులత్వం ఏర్పడుతున్నాయి. నమ్మకాల ఆధారంగా ఏర్పడ్డాయి గనుక ఆయా సందర్భాల్లో అవి సంకోచిస్తుంటాయి, వ్యాకోచిస్తుంటాయి లేదా సమాంతరంగా వైవిధ్యాలతో కొనసాగుతుంటాయి. ఏది ఏమైనా సామరస్యము, సహజీవనము అనివార్యమైన ప్రాకృతిక సహజ ధర్మంగా వర్థిల్లుతూనే ఉంటాయి. ఆ... భిన్నత్వంలోని ఏకత్వమే భారతీయ విశిష్టతగా అనాదిగా జగమంతా చాటుతున్నది.
   రామజన్మభూమి, రామరాజ్యం, అయోధ్యలో రామాలయ నిర్మాణం అంశాలను ప్రాతపదికగా చేసుకుని 1990లో బీజేపీ అగ్రనేత అద్వానీ రథయాత్ర చేశాడు. ఇది మత పరంగా మనుషుల మధ్య చీలికలకు దారితీసింది. తదనంతరం చెలరేగిన మత ఘర్షణల్లో అసంఖ్యాకంగా అమాయక ప్రజలు అశువులు బాసారు. అయినా ''ఇది కోట్లాది మంది ప్రజల నమ్మకం, దీనిని ఏ కోర్టులూ పరిష్కరించలేవు'' అంటూ చట్టం దృష్టిలో అందరూ సమానులే అన్న రాజ్యాంగ నిబంధనను ఆనాడే బీజేపీ వారు తుంగలో తొక్కారు. 1992 డిసెంబర్‌ 6న అక్కడ బాబ్రీ మసీదును కూల్చివేశారు. ఇదంతా గతం. రాజకీయాలను ఆ విధంగా గందరగోళంలోకి నెట్టారు. రాజకీయాన్ని మతాన్ని కలగాపులగం చేసి భావవాదానికి పెద్దపీట వేశారు. తత్‌ ఫలితంగా బీజేపీ రాజకీయంగా ఎగబ్రాకి రాజ్యాధికారాన్ని కైవసం చేసుకున్నదని కొందరు విశ్లేషకులు చెపుతున్నారు. నిజమే కావచ్చు. కానీ ఇప్పుడు ఆ హిందూ ఏకత్వ సిద్ధాంతానికి రాజకీయంగా బీటలు వారడం ప్రారంభమైంది.
   తాజాగా సమాజవాది పార్టీ అధినేత అఖిలేష్‌ యాదవ్‌ శూద్రులకు ప్రతినిధిగా భావించే శ్రీకృష్ణుడిని రాముడికి ప్రతిగా నిలపడానికి ప్రయత్నిస్తున్నాడు. శ్రీకృష్ణరాజ్యమే సమాజవాది సోషలిస్టు రాజ్యమని అఖిలేష్‌ అభివర్ణిస్తున్నాడు. ఆ విధంగా త్రేతాయుగంలోని రామునికి, ద్వాపరయుగం లోని శ్రీకృష్ణుడికి మధ్య వైరుధ్యం మొదలైంది.
   ఎక్కడైనా దేవుడు ఒక్కడే కదా! అన్న వాదనను వీరు ఒప్పుకోవడం లేదు. 2014లో మోడీ ఎన్నికల్లోకి వచ్చినప్పుడు సబ్‌ కా సాథ్‌ సబ్‌ కా వికాస్‌' అన్నాడు. మరి ఏడాది పాటు సాగిన రైతాంగ ఉద్యమంలో ఏడువందల మందికి పైగా ప్రాణాలు పోయినా ప్రదాని మోడీగాని, బీజేపీ పార్టీ గాని మతసంబంధమైన కనీస మానవత్వంతో న్యాయబద్దంగా వ్యవహరించలేదు కదా..? అని వాదిస్తున్నారు. అంటే హిందువులైన రైతులకు న్యాయం దక్కలేదన్నది వారి వాదన. అంతే కాదు.. రామాయణంలో రాముడు వర్ణాశ్రమ వ్యవస్థకు బంధీ, శూద్రులు వేదాలు చదువరాదన్న విప్రుల (బ్రాహ్మణుల) మాటకు విధేయుడై శంభూకుడ్ని వధించాడు. కానీ కృష్ణపరమాత్ముడు బోధించింది ధర్మలౌక్యం. దుష్టశిక్షణకు శిష్టరక్షణకు నడుంకట్టి ధర్మస్థాపనకు మార్గం చూపాడు అని విశద పరుస్తున్నారు.
   పైగా కృష్ణుడ్ని పశుపాలకునిగా, ఆహార వ్యవసాయ ఉత్పత్తి కులాల ప్రతీకగా చూపుతూ రైతులను ఆకర్షించేందుకు ప్రయత్నిస్తున్నారు.
   కురుక్షేత్ర సంగ్రామంలో కృష్ణుడు అర్జునినికి గీతాసారాన్ని బోధిస్తాడు. గీతలో వైరుధ్యాలు, మినహాయింపులు ఎన్ని ఉన్నా అంతిమంగా కర్మ ప్రాధాన్యాన్ని, స్థిత ప్రజ్ఞతను విశదపరుస్తున్నదని తత్వజ్ఞులు చెపుతున్నారు. మనిషి నిరంతరం పనిచేయాలి. పని అంటేనే శ్రమ. శ్రమించేవారే విజయం సాధిస్తారు. 'శ్రయేవ జయతే' అంటూ రైతులను, శూద్రులను, శ్రమజీవులను కీర్తిస్తున్నారు. సోమరులను, సన్యాసులను పరోక్షంగా తెగనాడుతున్నారు. 'నియంతం కురు కర్మత్వం, కర్మ జ్వాయోహ్య కర్మణః
శరీర యాత్ర పిచతే, నప్రసిద్దే దకర్మణః (-గీతాశ్లోకం)
   పనీపాటలు చేయని సోమరులకు జీవనయాత్ర గడపటం అనర్హం. కష్టం. శ్రమ అన్నది మనిషి సామాజిక బాధ్యతగా కృష్ణుడు గీతలో పేర్కొనడాన్ని మహాత్మాగాంధీ అనేకసార్లు ఉటంకిస్తాడు. కాగా, 'మనదంతా ఒకే మతం హిందూ మతం హమ్‌ సబ్‌ హిందూ' అన్న సనాతన ధర్మ ఏకత్వ భావవాద సిద్ధాంతాన్ని రైతాంగం తన సమరశీల పోరాటంతో బ్రద్దలు కొట్టిందనేది గమనార్హం. రైతులు, కష్టజీవులు అన్ని మతాల్లో ఉంటారు. తమకు మేలు చేసేది, ఆనందాన్ని ఇచ్చేది ఏ మత భావమైనా సునాయాసంగా స్వీకరించ డానికి ప్రజలు సదా సిద్ధపడతారు. ఇది వాస్తవమైన సామరస్య జీవన భావన. అదే ఆచరణ మార్పుకు దారితీస్తుంది.
   ఒక యుగపు సామాజిక మనస్తత్వం ఆ యుగపు సామాజిక సంబంధాల ద్వారా నిర్దేశితమవుతుందని ప్లేఖన్‌ల్‌ చెప్తాడు. అంతే కాదు ఇప్పుడు ఈ రామ - కృష్ణ అవతారాల భావయుద్ధంలో మానవ (రైతుల) శ్రమ పాత్ర కీలకం గావడం శుభపరిణామం.
- కె. శాంతారావు
సెల్‌:9959745723