మనుషులకు వినిపించని, కుక్కలకు, పిల్లులకు వినిపించే కుక్కల శిక్షణకు వాడే ఈల డాగ్‌ విజిల్‌. ప్రత్యర్థులు పసిగట్టకుండా శ్రోతల, ప్రేక్షకుల మద్దతు కూడగట్టడానికి వాడే రాజకీయ సంకేతాలను డాగ్‌ విజిల్‌ అంటారు. జాతి మత కుల ద్వేషాల సమర్థక బృందాలకు అర్థమయే రాజకీయ ఉపన్యాసాలు, వ్యాఖ్యానాలు, ప్రకటనలు, నినాదాలు, మాటలు, కొందరిని ఆకట్టుకొని, కొందరి మానసిక స్థితికి అందని ప్రచారాలు, వాస్తవాన్ని వక్రీకరించి, అర్థాన్ని మార్చి, బయటికి అమాయక అర్థాన్ని, తమవారికి భావగర్భిత సందేశాన్ని ఇచ్చే అస్పష్ట ద్వంద్వార్థ భాష డాగ్‌ విజిల్‌. డాగ్‌ విజిల్‌ ను నిశ్శబ్ద ఈల, గాల్టన్‌ ఈల అంటారు.
ప్రజల భావాలను నియంత్రించే రాజకీయ ఉపన్యాసాలను, గొర్రెల మళ్లింపునకు గొర్రెలకాపరులు చేసే శబ్దాలతో పోలుస్తారు. వీటిని డాగ్‌ విజిల్‌ ఈలలని కూడా ప్రచారం చేశారు. కుటుంబ విలువలు పోషించే వ్యక్తికి ఓటేయమంటే క్రైస్తవ అభ్యర్థికి ఓటేయమని అర్థం. యూదు వ్యతిరేక జాత్యహంకారులను ఆకర్షించడానికి అంతర్జాతీయ బ్యాంకులు అన్న సంకేతం వాడారు. డాగ్‌ విజిల్‌ ప్రయోగాలను పసిగట్టడం, నిరూపించడం కష్టం. ప్రజాభిప్రాయ సేకరణ, ఎన్నికల ఫలితాల సర్వేలలో డాగ్‌ విజిల్‌ తయారైందని అమెరికా రచయిత విలియం సాఫిర్‌ వివరించారు. వాషింగ్టన్‌ పోస్ట్‌ ఎన్నికల నిర్దేశకుడు రిచర్డ్‌ మొరిన్‌ 1988లో ఈ పని చేశారని ఆయన అన్నారు. ఆస్ట్రేలియన్‌ విద్యావేత్త, రచయిత అమందా లోహ్రీ, 'జీసస్‌కు ఓటు: ఆస్ట్రేలియాలో క్రైస్తవం, రాజకీయాలు' అన్న పుస్తకంలో అధికసంఖ్యాకులను ఆకట్టుకోవటం, అల్పసంఖ్యాకులను వేరుచేయటం డాగ్‌ విజిల్‌ లక్ష్యమని వివరించారు. ఆస్ట్రేలియా ప్రభుత్వ విశ్వవిద్యాలయంలో సామాజిక, రాజకీయ శాస్త్రాల ఆచార్యుడు రాబర్ట్‌ గూడిన్‌, డాగ్‌ విజిల్‌ ప్రజాస్వామ్యాన్ని నాశనంచేస్తుందని, ఓటర్ల అభిప్రాయాలను పాలకులకు అనుకూలంగా, వారి విధానాలకు మద్దతుగా మారుస్తుందని అన్నారు. ఆస్ట్రేలియా రాజకీయాల్లో డాగ్‌ విజిల్‌ 1990 మధ్యలో ప్రవేశించింది. పూర్వ ప్రధాని జాన్‌ హౌవార్డ్‌ ఎన్నికల ప్రచారాల్లో విస్తృతంగా వాడారు. ఓటర్లను ఆస్ట్రేలియన్లు కానివారు, ప్రధాన స్రవంతి, చట్టవిరుద్ధం వగైరా సంకేత పదాలతో భ్రమింపజేశారు. శరణార్థులకు వ్యతిరేకంగా జాత్యహంకార భాష వాడారు. జాతివాద ఓటర్లకు మద్దతిచ్చారు. 2007లో పౌరసత్వ ప్రవేశ పరీక్ష ప్రవేశపెట్టారు. ఇది ప్రత్యేక ప్రాంతాల నుండి వచ్చిన శరణార్థులకు పౌరసత్వాన్ని తిరస్కరించింది. జాత్యహంకారులను రెచ్చగొట్టింది.
2015 కెనడా ఎన్నికల్లో కన్జర్వేటివ్‌ పార్టీ ప్రధాని స్టీఫెన్‌ హార్పర్‌ సంకేత పదాలను వాడారు. శరణార్థులను, వలసదారులను ఓల్డ్‌ స్టాక్‌ కెనడియన్స్‌ (కెనడా వాసులైన యూరోపియన్లు) అన్న ఎగతాళి పదంతో ఆరోగ్య పథకం నుండి తొలగించారు. శరీర రంగుతో వివక్షత చూపారు. ఆస్ట్రేలియాలో హౌవార్డ్‌కు ఎన్నికల ప్రచారంచేసిన లింటన్‌ క్రోస్బి 2005 యునైటెడ్‌ కింగ్డం (యుకె) ఎన్నికల్లో డాగ్‌ విజిల్‌ ప్రచారంచేశారు. మేము ఆలోచిస్తున్నదే మీరూ ఆలోచిస్తున్నారా?, వలసదారుల నియంత్రణ జాతివాదం కాదు, మీ కుమార్తెలపై దాడిజరిగితే మీకేమనిపిస్తుంది? వగైరా అస్తవ్యస్త ఆస్పత్రులు, దోపిడీలు, పోలీసు వ్యవస్థల నినాదాలతో ప్రచారాలు నిర్వహించారు. 2013 ఎన్నికల్లో ఇంటికెళ్ళండి నినాదం వాడారు.
అమెరికాలో 1954లో నీగ్రోలను నిగ్గర్లని అవమానించారు. 2007లో రాష్ట్ర ప్రభుత్వాల హక్కులను సూచిస్తూ రాష్ట్రాలు, హక్కులు అన్న సంకేతాలు వాడారు. ఇవి నల్లజాతి వెలివేత, జాత్యహంకార ధృవీకరణకు ఉద్దేశించబడ్డాయి. 1981లో నిక్సన్‌ 'దక్షిణ వ్యూహం' పేరుతో శ్వేతజాతీయుల వోట్ల కోసం ఆఫ్రికన్‌ ఆమెరికన్లకు వ్యతిరేకంగా జాత్యహంకార ఎత్తుగడ ప్రయోగించారు. ఇవి డాగ్‌ విజిల్‌లో భాగమని అంతర్జాల పత్రిక స్లేట్‌ పేర్కొంది. అమెరికా న్యాయశాస్త్ర ఆచార్యులు ఇయాన్‌ హానీలోపెజ్‌ 2014లో 'డాగ్‌ విజిల్‌ రాజకీయాలు' అన్న పుస్తకంలో రోనాల్డ్‌ రీగన్‌ డాగ్‌ విజిల్‌ పేల్చారన్నారు. కాడిలాక్‌ డ్రైవింగ్‌, సంక్షేమ రాణులు, చెవుల పిల్లుల పుష్టీకరణ, అన్నం టికెట్లతో గొడ్డుమాంసం కొనడం వగైరా నినాదాలతో ప్రభుత్వ పథకాలు పొందుతున్న నల్లజాతీయులను ఎగతాళి చేశారు. 1శాతం ధనికుల, 99శాతం పేదల ఆర్థిక అసమానతలను మరిపించారు. 2004 ఎన్నికల ప్రచారంలో జార్జ్‌ బుష్‌, సలహాదారుడు కార్ల్‌ రోవ్‌, డాగ్‌ విజిల్‌ వాడారని అమెరికా పాత్రికేయుడు, రచయిత క్రెగ్‌ ఉంగర్‌ రాశారు. 'రాజ్యాంగంలో నల్లజాతివారికి పౌరసత్వం లేదని' 1857లో అమెరికా సుప్రీంకోర్టు తీర్పు చెప్పింది. ఇది డ్రెడ్‌ స్కాట్‌ నిర్ణయంగా ఖ్యాతిచెందింది. ఎన్నికల ప్రచారంలో బుష్‌ ఈ తీర్పును మర్మగర్భంగా ప్రస్తావించేవారు. 2008 డెమొక్రాటిక్‌ పార్టీ అధ్యక్ష అభ్యర్థి ఎంపికలో హిల్లరీ క్లింటన్‌, 'బరాక్‌ ఒబామా నల్ల జాతీయుడనీ, ఆయన మద్దతుదారులు శ్వేతజాతి వ్యతిరేకులని' డాగ్‌ విజిల్‌ భాష వాడారు. 2012 ఎన్నికల్లో, ఒబామా అమెరికా ను ప్రేమించడని టీ పార్టీ, మిట్‌ రోమ్ని మనలో ఒకడు కాదని ఒబామా ప్రచారంచేశారు. ఇద్దరూ జాతివాదం పాటించారని వాషింగ్టన్‌ పోస్ట్‌ పాత్రికేయుడు కారెన్‌ టుముల్టి రాశారు. 2014 ఎన్నికల్లోనూ డాగ్‌ విజిల్‌ పాటించారు. 2016లో ట్రంప్‌ ప్రచారం డాగ్‌ విజిల్‌ పద్దతిలోనే సాగింది. అమెరికా అమెరికన్లకే, అమెరికా గొప్పదనాన్ని తిరిగి సాధిద్దాం, ముస్లింలకు ఉగ్రవాద దాడులు ముందుగానే తెలుసు, వలసదారులు అత్యాచారులు వంటి పదాలతో ఓటర్లను ఆకట్టుకునే ప్రయత్నం చేశారు. ట్రంప్‌ డాగ్‌ విజిల్‌ రాజకీయాలను దాటిపోయారని తత్వవేత్త జెన్నిఫర్‌ సాల్‌ వ్యాఖ్యానించారు. డాగ్‌ విజిల్‌కు ఆమోద నిరాకరణ కీలక గుణమని, ఎవరైనా ఏమైనా అన గల స్పష్టమైన ప్రక్రియ అని అమెరికన్‌ విశ్వవిద్యాలయాల ప్రముఖులు వ్యాఖ్యానించారు.
భారత్‌లో డాగ్‌ విజిల్‌ పాతదే. 2013కు ముందు డాగ్‌ విజిల్‌ రాజకీయాలు నేలమీద నడిచేవి. ఇప్పుడు మోడీ హయాంలో నింగికి ఎగిశాయి. ఎన్నికల ఫలితాలను తారుమారు చేశాయి. ప్రజాస్వామ్యాన్ని అపహాస్యం చేశాయి. రాజ్యాంగ విలువలను తుంగలో తొక్కాయి. నేలను చదును చేయండని వాజపేయి కరసేవకులకు సూచించారు. ఇది మసీదును కూల్చమన్న సంకేతమిచ్చింది. గోధ్రా మారణహౌమంలో మోడీ రాజధర్మం పాటించలేదన్నారు ప్రధాని వాజపేయి. నేనదే చేశానన్నారు మోడీ. సమాచార హక్కు సవరణ, ముమ్మాటి తలాక్‌, పౌరసత్వ సవరణ, నూతన విద్యా విధానం, వ్యవసాయ, అత్యవసర వస్తు చట్టాలు, కాశ్మీర్‌ ప్రత్యేక ప్రతిపత్తి రద్దు, ఒకే దేశం ఒకే సంస్కృతి, పుణ్యభూమి, లవ్‌ జిహాద్‌ నినాదాలు డాగ్‌ విజిల్‌ రాజకీయాలే. ప్రజలు విధ్వంసచర్యల నుండి కాపాడుకోడానికి, కొన్ని ప్రయోజనాలను పొందడానికి పాలకపక్ష పతాకాలను ఇళ్ల మీద ఎగరేస్తారు. ఇది డాగ్‌ విజిల్‌ చర్య. నేటి నాయకుల ప్రకటనలు డాగ్‌ విజిల్‌ రూపకాలు.
ట్రంప్‌, మోడీలు ఓడినా ట్రంపిజం, మోడీయిజం రూపంలో డాగ్‌ విజిల్‌ కొనసాగుతుంది. అవి తిరిగి తలెత్తకుండా చేయడం అవసరం. అమెరికా ముందు, అమెరికా గొప్ప అన్న వాగ్దానాలను ట్రంప్‌ పూర్తిచేయలేదు. అమెరికన్లు గొప్పవారని అమెరికన్‌ ఓటర్లు రుజువు చేశారు. ఆ ప్రక్రియ మన దేశంలోనూ జరగాలి. రాబోయే కాలంలో అబద్ధాలను సాగనంపాలి. నిజాలను నిలబెట్టాలి.
-సంగిరెడ్డి హనుమంతరెడ్డి
సెల్‌: 9490204545
