చిట్టెలుకలే..!
తెలంగాణ దొరల
పక్కటెముకలు విరిచాయి.

చిట్టెలుకలే..!
అరాచక గడీలకు
చితి కట్టెలు పేర్చాయి.

చిట్టెలుకలే..!
నరహంతక నిజాం
పైజాముకు మంటలు పెట్టాయి.

చిట్టెలుకలే..!
తరాల నాటి వెట్టి
ముట్టె పగులగొట్టాయి.

చిట్టెలుకలే..!
బలవంతపు పన్నుల
రెక్కలు విరగకొట్టాయి.

చిట్టెలుకలే..!
జమీందార్లను రజాకార్లను
బజార్ల ఉతికి ఆరేశాయి.

చిట్టెలుకలే..!
భూస్వామ్య దుమ్ము దులిపి
పల్లెలకు దమ్ము నిచ్చాయి.

చిట్టెలుకలే..!
దొరతనాన్ని నుసి చేసి
నేలకు కసి నూరిపోశాయి.

చిట్టెలుకలే..!
భూమి పోరుకు ఊపిరయ్యాయి.
ఆత్మ గౌరవ దారి దీపమయ్యాయి.

చిట్టెలుకలు...
అవి... ప్రచండ నిప్పు కణికలు
ప్రభాత వెలుగు తునకలు
నిన్ను... నన్ను నడిపించే
నిలువెత్తు నిత్య స్పూర్తి దాతలు...!!

- బండారు రమేష్‌