ఒక్క నిప్పు రవ్వ ...
దావానళంలా వ్యాపించి
కీకారణ్యాన్ని కాల్చేస్తుంది

ఒక్క గునపం పోటు ...
బిర్రుగా తలెత్తుకు నిలబడ్డ
కోటల్ని బీటలుబారుస్తుంది

ఒక్క బాణం మొన ...
విర్రవీగిన కొదమసింహాన్ని
నిలువునా ప్రాణం తీస్తుంది

ఒక్క చిట్టిచీమ దండుగట్టి
పడగ విప్పి బుసలు కొట్టే
కాలనాగును కడతేరుస్తుంది

ఒక గడ్డ పరక జతకట్టి
ఘీంకరించి వీరవిహారంచేసే
మదపు గజాన్ని బంధిస్తుంది

ఒక్క చిట్టి పిట్ట పాటై మ్రోగి...
మహౌద్యమాన్ని సష్టిస్తుంది
ఒక్క చిన్న మాట తూటై పేలి
అధికార పీఠాల్ని కదిలిస్తుంది

చేవ చచ్చినవేవి లేవిక్కడ
అవసరమైన సమయంలో
తమ ప్రతాపం చూపుతాయి

ఓయి నియంత పాలకా !
అధికార బలం బలగంతో
బడుగు బలహీనుల మీద
పెత్తనం చేలాయిస్తానంటే

ఏదో ఒకరోజు
తాడిత పీడిత వర్గాలేకమై
తిరుగుబాటుకు తొడగొడ్తారు

నీ సామ్రాజ్యాన్ని పాతరేసి
సరికొత్త చరిత్ర లిఖిస్తారు

- కోడిగూటి తిరుపతి
  9573929493