పాలస్తీనా భూభాగాలను ఇజ్రాయిల్‌ సుదీర్ఘకాలం ఆక్రమించుకోవడం వల్ల తలెత్తే చట్టపరమైన పర్యవసానాలపై అభిప్రాయాన్ని తెలియచేయాల్సిందిగా అంతర్జాతీయ న్యాయ స్థానాన్ని (ఐసిజె) కోరుతూ డిసెంబరు 31, 2022న ఐక్యరాజ్య సమితి జనరల్‌ అసెంబ్లీ ఒక తీర్మానాన్ని ఆమోదించింది. ఆ తీర్మానంపై ఓటింగ్‌కు భారత్‌ గైర్హాజరైంది. తీర్మానానికి 87 దేశాలు మద్దతు ఇవ్వగా, 26 దేశాలు వ్యతిరేకించాయి. భారత్‌ సహా 52 దేశాలు గైర్హాజరయ్యాయి.
పవిత్ర నగరమైన జెరూసలేం హోదా, స్వభావం, జనాభా కూర్పును మార్చడానికి ఉద్దేశించిన చర్యలతో సహా ఇజ్రాయిల్‌ ఆక్రమణ, సెటిల్‌మెంట్‌, కలుపుకోవడం వంటి చట్టపరమైన పర్యవసానాల గురించి... అలాగే సంబంధిత వివక్షాపూరిత చట్టాలు, చర్యలను ఇజ్రాయిల్‌ ఆమోదించడం గురించి...ఈ తీర్మానం పేర్కొంది. ఈ తీర్మానానికి ఓటు వేయకుండా ఉండడం ద్వారా... పాలస్తీనా ప్రయోజనాలకు, రెండు దేశాల ఏర్పాటు పరిష్కారానికి గట్టిగా మద్దతిస్తూ సుదీర్ఘకాలంగా అనుసరిస్తూ వచ్చిన వైఖరిని విడనాడినట్లు భారత్‌ సంకేతాలు ఇచ్చింది. 1967లో యుద్ధం జరిగినప్పటి నుండి వెస్ట్‌ బ్యాంక్‌, తూర్పు జెరూసలేం, గాజా ప్రాంతాల్లో ఇజ్రాయిల్‌ అక్రమణ కొనసాగుతూ వస్తోంది. అప్పటి నుండి, ఈ ఆక్రమణ చర్యలకు అంతం పలకాలని కోరుతూ ఐక్యరాజ్య సమితి పలుసార్లు తీర్మానాలు చేసినప్పటికీ, వెస్ట్‌ బ్యాంక్‌లో యూదు ఆవాసాల ఏర్పాటును ఇజ్రాయిల్‌ నిలకడగా అనుమతిస్తూనే వస్తోంది. తూర్పు జెరూసలేంలో పాలస్తీనా ఆవాస ప్రాంతాలను ధ్వంసం చేస్తూనే ఉంది. మొత్తంగా అక్కడ జనాభా పొందికను మార్చేందుకు ప్రయత్నిస్తూనే ఉంది.
మొత్తంగా జెరూసలేం, వెస్ట్‌ బ్యాంక్‌ ప్రాంతాల్లో నివసిస్తున్న పాలస్తీనియన్లను పారదోలడం ద్వారా లేదా ఇజ్రాయిల్‌ పౌరులుగా కాకుండా వర్ణ వివక్ష పరిస్థితుల్లో జీవించేలా వారిపై ఒత్తిడి తీసుకురావడం ద్వారా ఆ ప్రాంతాలను కూడా తమలో కలిపేసుకోవాలన్నది ఇజ్రాయిల్‌ ప్రణాళికగా ఉంది. భూ ఆక్రమణల ద్వారా తూర్పు జెరూసలేంను బహిరంగంగానే కలిపేసుకోవడంతో ఆ నగర యథాతథ పరిస్థితి మారింది. ఇజ్రాయిల్‌ 'శాశ్వత రాజధాని'గా జెరూసలేం ఉంటుందని ప్రకటించింది. వెస్ట్‌ బ్యాంక్‌లోని పాలస్తీనా భూభాగాల్లో 5లక్షల మంది యూదులు నివాసం ఏర్పరచుకోవడానికి ఇజ్రాయిల్‌లో వరుసగా వచ్చిన ప్రభుత్వాలు అవకాశం కల్పిస్తూవచ్చాయి. గాజా స్ట్రిప్‌లో నివసిస్తున్న దాదాపు 20లక్షల మంది పాలస్తీనియన్లు జైళ్ళలో ఉన్నటువంటి పరిస్థితుల్లో అక్కడ జీవిస్తున్నారు. వారు తరచుగా వైమానిక బాంబు దాడులకు, దిగ్బంధనాలకు గురవుతూనే ఉన్నారు. పాలస్తీనా ఎన్‌క్లేవ్‌లతో వెస్ట్‌ బ్యాంక్‌ను వేరు చేస్తూ నిర్మించిన గోడ వర్ణ వివక్ష వ్యవస్థను స్థాపించింది. గత రెండేండ్లలో, వెస్ట్‌ బ్యాంక్‌ను కలుపుకునే దిశగా ఇజ్రాయిల్‌ దేశం సాగుతోంది.
బెంజమిన్‌ నెతన్యాహు ప్రధానిగా ఇజ్రాయిల్‌లో ఏర్పడిన కొత్త ప్రభుత్వం - వర్ణవివక్షతతో కూడిన యూదు జాతీయ పార్టీలతో, అతి సాంప్రదాయవాద మత గ్రూపులతో ఏర్పడిన అత్యంత మితవాద సంకీర్ణ ప్రభుత్వ వ్యవస్థగా వుంది. ''జుడియా, సమారియా (వెస్ట్‌ బ్యాంక్‌కు బైబిల్‌ పేర్లు)తో సహా ఇజ్రాయిల్‌లో అన్ని ప్రాంతాల్లో ఆవాసాల నిర్మాణాన్ని అభివృద్ధి పరిచి, ముందుకు తీసుకెళ్ళాలని'' సంకీర్ణ పార్టీల ఒప్పందం పేర్కొంది. ''సమయం చూసుకుని, ఇజ్రాయిల్‌ జాతీయ, అంతర్జాతీయ ప్రయోజనాలను పరిగణనలోకి తీసుకుని'' వెస్ట్‌ బ్యాంక్‌ను కలుపుకునేందుకు కూడా ఈ ఒప్పందం హామీ ఇచ్చింది.
యూదు ఆవాసాలను ఏర్పాటు చేసేందుకు పాలస్తీనా భూభాగాలను, ఆలివ్‌ తోటలను ఆక్రమించుకోవడంలో, బుల్డోజర్లుతో పాలస్తీనియన్ల గృహాలను ధ్వంసం చేయడంలో, ఈ అణచివేత చర్యలను ప్రతిఘటించిన వారినెవరినైనా అరెస్టులు చేయడంలో కిరాతకమైన వలసవాద పాలన జోక్యం ఉంది. పైగా, నిరసన లేదా ప్రతిఘటన అనేది ఏ రూపంలో ఉన్నా ఇజ్రాయిల్‌ సాయుధ బలగాలు కాల్పులతో అడ్డుకుంటాయి. 2022 సంవత్సరంలో వెస్ట్‌ బ్యాంక్‌, తూర్పు జెరూసలేం ప్రాంతాల్లో 171 మంది పాలస్తీనియన్లను ఇజ్రాయిల్‌ బలగాలు హతమార్చాయని ఐక్యరాజ్య సమితి పేర్కొంది. వీరిలో 30మందికి పైగా పిల్లలు ఉన్నారు. ఇటువంటి హింసకు సంబంధించి అత్యంత అధ్వాన్నమైన సంవత్సరాల్లో 2022 ఒకటిగా ఉంది. మొత్తంగా 9 వేల మంది గాయపడ్డారు.
కొత్త మితవాద ప్రభుత్వంలో భాగస్వామిగా ఉన్న సంకీర్ణ పార్టీల్లో ఒకటైన రిలీజయస్‌ జియోనిస్ట్‌ పార్టీలో ప్రధానంగా వెస్ట్‌ బ్యాంక్‌ సెటిలర్లే ఉన్నందువల్ల వెస్ట్‌ బ్యాంక్‌లో పాలస్తీనియన్లను మొత్తంగా అణచివేయడానికే ప్రభుత్వం చర్యలు తీసుకుంటుంది. తీవ్రవాద భావజాలం కలిగిన జూయిష్‌ పవర్‌ పార్టీకి చెందిన, జాతీయ భద్రతా వ్యవహారాల మంత్రి ఇత్మార్‌ బెన్‌ గివిర్‌ పాలస్తీనియన్లు, అరబ్బులకు వ్యతిరేకంగా విద్వేష ప్రసంగాలకు పేరొందిన వ్యక్తి. వెస్ట్‌ బ్యాంక్‌లో ఇజ్రాయిల్‌ సరిహద్దు పోలీసులను అలాగే పాలస్తీనా ఆవాసాలను ఆయన మంత్రిత్వ శాఖ పర్యవేక్షిస్తుంది.
అందువల్ల, ఆక్రమిత ప్రాంతాల్లో ఇజ్రాయిల్‌ కొత్త తీవ్రవాద ప్రభుత్వం తన దూకుడు చర్యలను మరింత పెంచేందుకు సిద్ధమవుతున్న తరుణంలో ఐక్యరాజ్య సమితి జనరల్‌ అసెంబ్లీ తీర్మానం సముచితమైన సమయంలో వచ్చింది. ఏ దేశంలోనైనా అంతర్గత మానవ హక్కుల విషయాలపై బయటి విచారణకు పిలుపిచ్చినా లేదా తాను అంగీకరించని అంతర్జాతీయ క్రిమినల్‌ కోర్టుకు సంబంధించిన అంశాలపైనా ఐక్యరాజ్య సమితి మానవ హక్కుల మండలి, ఐక్యరాజ్య సమితి జనరల్‌ అసెంబ్లీ చేసిన తీర్మానాలకు భారత్‌ గతంలో ఎన్నడూ మద్దతివ్వలేదు. కానీ, ప్రస్తుత తీర్మానంపై భారత్‌ ఇలా గైర్హాజరవడాన్ని సమర్థించడానికి ఈ అంశాన్ని పరిగణనలోకి తీసుకోలేం. అన్నింటికంటే ముందు, ఒక సార్వభౌమాధికార దేశం అంతర్గత వ్యవహారాలకు సంబంధం లేని విషయాన్ని... ఆక్రమిత భూభాగానికి సంబంధించిన విషయాన్ని పరిశీలించాల్సిందిగా ఐసిజెను కోరారు. వెస్ట్‌ బ్యాంక్‌, తూర్పు జెరూసలేం రెండూ ఆక్రమిత భూభాగాలేనని భారత్‌ ఇప్పటికీ భావిస్తూ ఉన్నది. పైగా, ఆక్రమిత పాలస్తీనా భూభాగంలో గోడ నిర్మాణం వల్ల తలెత్తే చట్టపరమైన పర్య వసానాల గురించి 2004లో ఐక్యరాజ్య సమితి జనరల్‌ అసెంబ్లీ పట్టుబట్టిన మేరకు ఐసిజె తన అభిప్రాయాన్ని వెల్లడించింది.
ఈ అంశంపై భారత్‌ వెనుకడుగు వేయడానికి కారణం ఇజ్రాయిల్‌తో వ్యూహాత్మక సంబంధాలకు ప్రాధాన్యత ఇస్తుం డడమే. అందువల్లే పాలస్తీనా ప్రయోజనాల విషయంలో మెతక వైఖరి అనుసరిస్తోంది. ఇజ్రాయిల్‌తో మోడీ ప్రభుత్వా నికి పెరుగుతున్న సన్నిహిత సంబంధాలు అందరికీ తెలిసిన విషయమే. గతంలో ప్రధానిగా ఉన్నప్పుడు నెతన్యాహు, మోడీకి చాలా సన్నిహితుడు. సైద్ధాంతికంగా వారిద్దరూ సహచరులే. పాలస్తీనియన్లు, అరబ్బుల పట్ల యూదు శతృత్వానికి ఆర్‌ఎస్‌ఎస్‌-బీజేపీలు అభిమానులు. అమెరికా ప్రణాళిక ప్రకారమే, పశ్చిమాసియాలోని ఐ2యు2 (భారత్‌, ఇజ్రాయిల్‌, యుఎఇ, అమెరికా) ఫోరంలో భారత్‌ చేరింది.
ఐక్యరాజ్య సమితి జనరల్‌ అసెంబ్లీ తీర్మానాన్ని ఆమోదించడానికి ఒక రోజు ముందే నెతన్యాహు ప్రభుత్వం అధికార బాధ్యతలను చేపట్టింది. ఇక్కడ తీర్మానంపై ఓటింగ్‌లో భారత్‌ గైర్హాజరవడం అంటే నెతన్యాహు ప్రభుత్వం పట్ల సుహృద్భావాన్ని ప్రదర్శించడంగా చూడవచ్చు.
నిర్వాసితులవడం, వలసవాద ఆక్రమణలు వంటి కష్టాలను పాలస్తీనా ప్రజలు ఏడు దశాబ్దాలకు పైగా అనుభవిస్తూనే ఉన్నారు. 1948లో ఏడు దశాబ్దాలకు పైగా వారిని వారి మాతృభూమి నుండి బహిష్కరించినప్పటి నుండి వారిలో లక్షలాదిమంది పాలస్తీనా వెలుపల శరణార్ధులుగానే జీవించారు. సైనిక ఆక్రమణ కింద వారిని లొంగ తీసుకున్నారు. మన స్వాతంత్య్రోద్యమ పోరాట కాలం నుండి, పాలస్తీనా ప్రజల పట్ల భారత్‌ సంపూర్ణ సానుభూతితో, సంఘీభావంతో వ్యవహరిస్తూనే వచ్చింది. కానీ, ఇప్పుడు బీజేపీ పాలకుల ఈ హిందూత్వ దృక్పథం ఈ పరాక్రమవంతులను అణచివేసే వారి పక్షాన భారతదేశాన్ని నడిపిస్తోంది.
('పీపుల్స్‌ డెమోక్రసీ' సంపాదకీయం)
