వందే భారత్‌ అంటూ, 130 కిలోమీటర్ల వేగంతో అత్యంత ఫాస్ట్‌గా గమ్యానికి చేరుస్తుందంటూ రైల్వేశాఖ ప్రకటించింది. దేశ ప్రధానమంత్రితోపాటు ఇద్దరు కేంద్ర మంత్రులు, గవర్నర్ అందరూ పండగవేళ ఆ రైలు గురించే మాట్లాడారు. రెండు తెలుగు రాష్ట్రాల ప్రజలకు నిజమైన పండగ వచ్చిందని ప్రధానమంత్రి అభివర్ణించారు. అయితే ఇక్కడ ఆలోచించాల్సిన విషయమేమిటంటే... సికింద్రాబాద్‌ నుంచి విజయవాడకు 905రూపాయల ఛార్జీ ఉంది. సాధారణంగా సూపర్‌ ఫాస్ట్‌, ఎక్స్‌ ప్రెస్‌ రైళ్లలో చార్జి 172రూపాయలే కాగా, అవి గమ్యస్థానానికి ఆరుగంటల్లో చేరుస్తాయి. వందే భారత్‌ రైలుకు సికింద్రాబాద్‌ నుంచి విజయవాడకు నాలుగు గంటల సమయం పడుతోంది. ఇతర రైళ్లకు, వందే భారత్‌కు తేడా కేవలం రెండు గంటలు మాత్రమే. ఆ రెండుగంటల సమయం కోసం అదనంగా 725రూపాయలా? అనే చర్చ ప్రజల్లో నడుస్తోంది. కేవలం వందే భారత్‌ అనేది రైలు లోపల ఇంటీరియర్‌ డెకరేషన్‌కు తోడు కొద్దిపాటి అదనపు వేగం మాత్రమే కలిగివుంది. అందుకే వందేభారత్‌ ఎక్స్‌ప్రెస్‌లో విమానం స్థాయిలో సదుపాయాలు ఉన్నాయని ఊదరగొట్టినప్పటికీ ప్రయాణికుల నుంచి ఆశించినంత స్పందన కానరావడం లేదు. సికింద్రాబాద్‌ నుంచి విశాఖకు నడిపే సూపర్‌ఫాస్ట్‌ రైళ్లలో దురంతో ఎక్స్‌ప్రెస్‌ అతి ముఖ్యమైనది. దీనిలో ఫస్ట్‌ ఎసి, సెకండ్‌ ఎసి, థర్డ్‌ ఎసి కోచ్‌లు ఉంటాయి. అన్నీ స్లీపర్‌ బెర్తులే. దురంతోలో ఫస్ట్‌ ఎసి టికెట్‌ ధర 2,800 రూపాయలు, సెకండ్‌ ఎసి 2,300 రూపాయలు, థర్డ్‌ ఎసి 1,630రూపాయలుగా ఉంది. ఈ ఎక్స్‌ప్రెస్‌ కూడా గంటకు 130 కిలోమీటర్ల నుంచి 140 కిలోమీటర్ల వేగంతో వెళ్తుంది. సికింద్రాబాద్‌ నుంచి విజయవాడ మీదుగా విశాఖకు 10గంటల 10నిమిషాల వ్యవధిలో చేరుకుంటుంది. ఇక వందే భారత్‌ రైలు ఎగ్జిక్యూటివ్‌ క్లాస్‌లో సికింద్రాబాద్‌ నుంచి విశాఖపట్నంకు 3,170 రూపాయలుగా ఉంది. ఇందులో స్లీపర్‌ బెర్తులు ఉండవు. అన్నీ చైర్‌ సీటింగ్‌ మాత్రమే ఉంటాయి. సికింద్రాబాద్‌ నుంచి 8.30గంటల ప్రయాణంతో విశాఖకు చేరుకోవచ్చు. దురంతోతో పోల్చుకుంటే గంటా 40నిమిషాలు ముందుగా వందేభారత్‌లో ప్రయాణించవచ్చు. ఇవన్నీ చూసిన తర్వాత సగటు ప్రయాణికుడు వందేభారత్‌ కంటే దురంతో వైపే ఆసక్తి చూపిస్తున్నాడు. గంటన్నర వ్యత్యాసానికి అంత డబ్బు చెల్లించి, అదీ స్లిపర్‌ బెర్తులు లేకుండా చైర్‌లో కూర్చొని వందేభారత్‌లో వెళ్లే కంటే ఇతర సూపర్‌ఫాస్ట్‌ రైళ్లలో ప్రయాణించడం మేలని ప్రయాణీకులు భావిస్తున్నారు. వందేభారత్‌లో 1,128 సీటింగ్‌కు కాను 1,050 సీట్లు చైర్‌కార్‌ సదుపాయంతో ఉన్నాయి. మిగిలినవి ఎగ్జిక్యూటివ్‌ క్లాస్‌కు కేటాయించారు. వందేభారత్‌ రైలులో ప్యాంట్రీ కార్‌ లేదు. అయినా ఆహారం ఇస్తామంటూ ముందుగానే టికెట్‌తో కలిసి డబ్బులు తీసుకుంటున్నారు. ఎగ్జిక్యూటివ్‌ క్లాసులో ఏకంగా 400రుపాయలు వరకు చార్జీ చేస్తున్నారు. ఈ రైలులో ఆహార పదార్థాలను వేడి చేసుకునే సదుపాయం తప్పితే కనీసం కాఫీ పెట్టడానికి కూడా ఏర్పాట్లు లేవు. కానీ వందే భారత్‌ ఎక్స్‌ప్రెస్‌ రైలు టికెట్ల రేట్లు వింటే మాత్రం గుండె గుభేల్‌ మంటోంది. విశాఖ నుంచి హైదరాబాద్ వెళ్లడానికి పది రోజుల ముందు బుక్‌ చేసుకుంటే విమానం టికెట్‌ 3,900 రూపాయలకే లభిస్తుంది. ప్రయాణ సమయం గంట మాత్రమే. అదే వందే భారత్‌ రైలులో ఎగ్జిక్యూటివ్‌ క్లాస్‌ టికెట్‌కి 3,170 రూపాయలు తీసుకుంటున్నారు. ప్రయాణ సమయం 8.30గంటలు. ఇంకో 700 రూపాయలు అదనంగా పెడితే విమానం ఎక్కి ఏకంగా ఏడు గంటల సమయం ఆదా చేసుకోవచ్చు. కాబట్టి కేంద్ర ప్రభుత్వం వందేభారత్‌ రైలు గూర్చి సొల్లు ప్రచారం ఆపాలి. 1988లో ప్రవేశపెట్టిన శతాబ్ది ఎక్స్‌ప్రెస్‌ గరిష్ట వేగం గంటకు 110 నుంచి 150 కిలోమీటర్లు. ఆ తర్వాత 2016లో గతిమాన్‌ ఎక్స్‌ప్రెస్‌ వచ్చింది. దాని గరిష్ట వేగం 110 నుంచి 160 కిలోమీటర్లు. ఇప్పుడు నూతనంగా వచ్చిన వందే భారత్‌ ఎక్స్‌ ప్రెస్‌ను కూడా 2019లోనే ప్రవేశపెట్టారు. కాకపోతే ఇది మన తెలుగు రాష్ట్రాలకు రావడానికి నాలుగేండ్లు పట్టింది.
సామాన్యుడు దీంట్లో ప్రయాణం చేయలేడు సరిగదా కనీసం ఊహించను కూడా ఊహించ లేడు. మామూలు ఎక్స్‌ప్రెస్‌ రేటు కంటే దీని ధర మూడు రెట్లు ఎక్కువగా ఉన్నది. రాజమండ్రి నుండి సికింద్రాబాద్‌కు గౌతమి ఎక్స్‌ప్రెస్‌లో స్లీపర్‌ బెర్త్‌ 325 రూపాయలు, వందే భారత్‌ రైలులో 1425 రూపాయలు. అందులో 350 రూపాయలు భోజన ఖర్చు. సామాన్యులెవరూ దీనిని భరించలేరు. గౌతమి ఎక్స్‌ప్రెస్‌లో ప్రయాణ సమయం 8 గంటల 25 నిమిషాలు. వందేభారత్‌లో 6 గంటల18 నిమిషాలు. మరి ఈ మాత్రం దానికి అంత భయంకరమైన రేటు పెట్టాలా! ఇంత సొల్లు ప్రచారం చేయాలా! ఇకపోతే స్వదేశీ పరిజ్ఞానం అంటూ గొప్పలు చెప్పుకుంటున్నారు. సిగ్గు లేకపోతే సరి. స్వదేశీ పరిజ్ఞానాన్ని, ప్రయోగాలని పూర్తిగా పక్కన పెట్టింది కేంద్ర ప్రభుత్వం. ఆఖరికి విగ్రహాలు తయారు చేయడానికి కూడా పక్కనున్న దేశాలకి కాంట్రాక్ట్‌ ఇస్తున్నవారు వందేభారత్‌ స్వదేశీ పరిజ్ఞానమని గొప్పలు చెప్పుకుంటే ఆశ్చర్యమేముంది? అయినా ఇతర దేశాల్లో ఈజిప్టులో గంటకు 230 కిలోమీటర్లు, మొరాకొలో 320 కిలోమీటర్లు, జపాన్‌లో 374 కిలోమీటర్లు, ఫ్రాన్స్‌లో 357 కిలోమీటర్లు, స్పెయిన్‌లో 400 కిలోమీటర్లు, చైనాలో 420 కిలోమీటర్ల వేగంతో వెళుతున్న రైళ్ళను ఉపయోగిస్తుంటే మనం గంటకు 300 కిలోమీటర్ల వేగాన్నైనా ఎప్పటికి చేరుకుంటాం? ఒకవేళ చేరుకుంటే సామాన్యుడు ప్రయాణించగలడా?
- యం.ఎ. జబ్బార్‌
సెల్‌: 9177264832
