Authorization
Mon Jan 19, 2015 06:51 pm
మహిళ అనే పదం ఈ మహిలో చాలా గొప్పది. సృష్టిని సృష్టించే ఈ మహిళ గొప్పతనం వర్ణించనలవి కానిది. స్త్రీ అనగానే కేవలం సౌందర్య భావనతో ప్రాచీన కవులు ఎన్నో కావ్యాలలో రకరకాలుగా వర్ణించారు. అందం, ఆలోచన, అణకువ, వివేకం, నేర్పు, బుద్ధి కుశలత, ఓపిక, సహనం అన్నింటికీ రూపం ఇస్తే అదే స్త్రీ. ఇన్ని గొప్ప లక్షణాలు. సృష్టిలో మరెవరికి ఉండవేమో... అందుకే అంటారు 'ముదితలు నేర్వగరాని విద్య కలదే ముద్దార నేర్పించినన్...' నేర్చుకుంటే స్త్రీకి రాని విద్య ఏదైనా కలదా! గుండు సూది నుంచి అంతరిక్షం దాకా ఏ రంగంలోనైనా నేటి స్త్రీ దూసుకుపోతుంది. అందుకే ఆమె విజయాలను గుర్తించడం, మహిళల ఆర్థిక సామాజిక సాంస్కృతిక రాజకీయ విజయాలను గౌరవించడం కోసం, లింగ సమానత్వం పునరుత్పత్తి హక్కులు మహిళలపై హింస, సమాన హక్కులు మొదలైన వాటి గురించి మాట్లాడుకునే సందర్భాన, ప్రతి ఏటా మార్చి 8న అంతర్జాతీయ మహిళా దినోత్సవంగా జరుపుకుంటాం.
స్త్రీ...
జీవన గమనంలో నేస్తమై.
బాధలలో కన్నీళ్ళు తుడిచే తోబుట్టువై.
మనసు భారమైనప్పుడు వెన్నుతట్టి తోడయ్యే భార్య,
కష్టాల్లో నీ చేయి విడువని అండై...
పురిటి నొప్పులు తెలియని పురుష జాతికి తల్లై
గెలుపులో వెనకుండి,
కడగండ్లలో తోడుండి
ఎల్లప్పుడూ పక్కనుండేది స్త్రీ...
అందుకే స్త్రీని భూదేవితో పోలుస్తారు. స్త్రీ అంటే సహనం, సహనం అంటే స్త్రీ అని...
ఒక మహిళని ఆట బొమ్మలా చూసే రోజులు పోవాలి. చూసే కళ్ళలో మనసులో మార్పు వచ్చితీరాలి. ఎందుకంటే మనిషి పుట్టుకను ప్రసాదించే శక్తి స్త్రీకే సాధ్యం. తనకు జన్మనిచ్చిన స్త్రీ జాతిని ఏ విధంగా అవమానించినా అది ఎంతో అమానుషం. క్షమించరానీ నేరం. ఈ నేరాలను చేసిన వాళ్ళను కఠినంగా శిక్షించాలి. నిర్భయ చట్టాలకు మించిన కఠిన శిక్షలు అమలులోకి రావాలి...
స్త్రీలు విద్యావంతులు కానంత వరకు ఏ దేశమూ బాగుపడదు. మన అభివృద్ధి అంతా స్త్రీల అభివృద్ధిపైనే ఆధారపడి ఉన్నది. పురుషులతో సమానంగా స్త్రీలు అభివృద్ధి చెందితేనే అభివృద్ధి సాధ్యం. 'విద్య లేని వారు పశువుతో సమానం' కదా! మరి విద్య లేని స్త్రీలలో, స్త్రీలతో ఉండే పురుషుల సంగతి ఏమిటి? విద్యాధికులం అని గర్వపడే పురుషులకి ఇది చెంపపెట్టు. ఎన్నో దశాబ్దాలుగా స్త్రీలు విద్యకి దూరమయ్యారు. కొన్ని దశాబ్దాలుగా ఎందరో మహానుభావుల కృషి వల్ల విద్య స్త్రీలకు కూడా అందుబాటులోకి వచ్చింది. కానీ వారు అన్ని రంగాలలో అభివృద్ధి సాధిస్తున్నారు. ఇదే అవకాశం మొదటి నుంచి ఉంటే ఆ అభివృద్ధి ఊహించనలవి కానిది. స్త్రీలు ఎన్నో రంగాల్లో చేరి ఉద్యోగాలు చేస్తున్నారు. ఆడది అబల కాదు సబల అని నిరూపించుకున్నారు. కానీ ఉద్యోగ ధర్మంతో పాటు ఇంటి పని, వంట పని, పిల్లల పెంపకం తన బాధ్యత అయింది. ఈ పనుల్లో సమతుల్యం పాటించక తప్పడం లేదు.
ప్రతి సంవత్సరం మార్చి 8న అంతర్జాతీయ మహిళా దినోత్సవం జరుపుతారు. అంతర్జాతీయ మహిళా దినోత్సవానికి శతాబ్దాలనికి మించిన చరిత్ర ఉంది. 1908 సంవత్సరంలోకి తక్కువ పనిగంటలు, మెరుగైన ప్యాకేజీ, ఓటు హక్కు కోసం న్యూయార్క్ నగరంలో 15000 మంది మహిళలు భారీ ప్రదర్శన చేయడం వల్ల సోషలిస్టు పార్టీ 1909 సంవత్సరంలో జాతీయ మహిళా దినోత్సవాన్ని ప్రకటించింది 1975 సంవత్సరంలో అధికారికంగా గుర్తించింది. గత కొన్ని సంవత్సరాలుగా అంతర్జాతీయ మహిళా దినోత్సవం విభిన్న థీమ్లతో జరుపుకుంటున్నాం.
ఈ సంవత్సరం 2023లో ఆవిష్కరణ, సాంకేతికలో లింగ సమానత్వం అనే అంశాన్ని థీమ్గా నిర్ణయించారు. సాంకేతిక అభివృద్ధిలో మహిళలు, ఇతర అట్టడుగులు పాలుపంచుకుంటున్నప్పుడు మహిళల అవసరాలను తీర్చే, లింగ సమానత్వాన్ని ముందుకు తీసుకువెళ్లే ఆవిష్కరణ సంభావ్యత పెరుగుతుంది. దీనికి విరుద్ధంగా వారి అసాధారణ ఆర్థిక పరిణామాలను కలిగి ఉంటుంది.
ఐకాస, ఉమెన్స్ జెండర్స్ స్నాప్ షాట్ 2022 నివేదిక ప్రకారం డిజిటల్ ప్రపంచంలో మహిళలు లేకపోవడం వల్ల గత పదేండ్లలో తక్కువ, మధ్య ఆదాయ దేశాల స్థూల జాతీయత్పత్తి తగ్గింది. ఏమి చేయలేక పోయినట్లయితే ఈ నష్టం 2025 నాటికి పెరుగుతుంది. అందువల్ల అంతర్జాతీయ మహిళా దినోత్సవం 2023 డిజిటల్ రంగాలలో మహిళలు, బాలికల హక్కులను రక్షించడం, టెక్నాలజీ ఇన్నోవేషన్ అండ్ ఫర్ జెండర్ ఈక్వాలిటీ కింద ఆన్లైన్ సదుపాయం కల్పించడం జరిగింది. మహిళ అన్ని రంగాల్లో బుల్లెట్లా ముందుకు దూసుకుపోతుంది. ఆమె గెలుపు, ప్రగతిని ఆపటం ఎవరి తరము కాదు.
- స్వప్న కొండ