Authorization
Mon Jan 19, 2015 06:51 pm
చాపకింద నీరులా మానవాళి బాహ్య ప్రపంచం కింద భయంకర యుద్ధం ప్రవహిస్తూనే ఉన్నది. యుద్ధం మానవాళిచే మానవాళి విధించుకున్న వికృత శాపం. కాబట్టే 'అంతిమంగా మానవుడు శాంతిని సాధించ నంతవరకు అజేయుడు కాజాలడు' అని టాల్స్టారు ఏనాడో చెప్పిన మాటలు ఎప్పటికీ యధార్థమే. రష్యా-ఉక్రెయిన్ యుద్ధం ప్రారంభమై ఏడాది పైబడింది. అయినా యుద్ధ మంటలు చల్లారడం లేదు. ఈ యుద్ధంలో ఇరువైపులా ఇప్పటికి లక్షన్నర మంది సైనికులు చొప్పున మొత్తం మూడు లక్షలమంది మరణించి ఉంటారని అంచనా. వీరు కాక మరో నలభైవేలమంది సాధారణ పౌరులు సైనిక దాడుల్లో ప్రాణాలు విడిచారు. మరో పదివేల మంది క్షతగాత్రులు అయ్యారు. చనిపోయిన వారిలో, గాయపడిన వారిలో చిన్నారులు కూడా లెక్కకు మించే ఉన్నారు. నివాసాలు ధ్వంసమై, బతుకు తెరువు కరువై శరణార్థులుగా పొరుగు దేశాలకు వలసబాట పట్టినవారు ఎనభైలక్షల పైగా ఉన్నారు. వీరి బాధలు, కష్టాలు వర్ణనాతీతం. ఇక ఇప్పట్లో యుద్ధం ముగిసే ఛాయలు కనిపించడం లేదు. యుద్ధంలో ఎవరిది పైచేయి? రష్యాదా? ఉక్రెయిన్దా? అంటే ఎవరూ చెప్పలేకున్నారు. ''ఈ ఏడాది యుద్ధంలో ఎవరూ పెద్దగా ప్రయోజనం పొందలేదని, మానవ హననం మాత్రం క్రమేణా, నిదానంగా సాగిపోతున్నదని అమెరికన్ రిటైర్డ్ కల్నల్, యుద్ధ పరిశోధకులు రాబర్ట్ హుమిల్టన్ చెప్పారు. అంతేకాదు, సమీప భవిష్యత్లో కూడా ఏ దేశమూ పైచేయి సాధించే స్థాయి లేదని ఆయన తెలిపారు. ఏడాది కాదు, మరో రెండేండ్లు గడిచినా ఏదో ఒక పక్షం తాము ఆశిస్తున్న రీతిలో విజయం సాధించలేదని కూడా ఆయన తేల్చి చెప్పారు. రష్యా పైచేయి సాధించినా ఉక్రెయిన్ తిరుగుబాటు కొనసాగిస్తూనే ఉంటుంది. దానికి అమెరికా ఆజ్యం పోస్తూనే ఉంటుంది. ఒకవేళ ఉక్రెయిన్ పైచేయి సాధిస్తే, రష్యా ఆత్మరక్షణ కోసం యుద్ధపోరును తీవ్రతరం చేస్తుంది. జరుగుతున్న పరిణామం ఇది. ఉక్రెయిన్తో సహా ఒకప్పటి సోవియట్ దేశాలు దేనినీ, అమెరికా నేతృత్వంలోని నాటో సైనిక కూటమిలో చేర్చుకోవద్దని రష్యా అధ్యక్షుడు వ్లాదిమిర్ పుతిన్ పదే పదే ప్రపంచ వేదికలపై చెప్పాడు. ఉక్రెయిన్ రష్యా నుండి విడిపోయిన విషయం తెలిసిందే. ఉక్రెయిన్ గనుక నాటోలో చేరితే అమెరికా, పశ్చిమదేశాలు రష్యాను చుట్టుముట్టే ప్రమాదం ఉన్నదని పుతిన్ వాదన. అమెరికా యుద్ధోన్మాదం గురించి తెలిసిన వారెవరూ పుతిన్ వాదనను కొట్టిపారేయలేరు. అందుకే ఎట్టి పరిస్థితుల్లోనూ మా సరిహద్దుల వెంట నాటో సైన్యం మోహరింపుకు మేము ససేమిరా అంగీకరించబోమని, ఇది మా జీవన్మరణ సమస్యని పుతిన్ నిర్ద్వంద్వంగా ప్రకటించాడు. పరిష్కార దిశగా అమెరికా, నాటో మిత్రదేశాలు స్పందించకపోవడంతో అనివార్య యుద్ధానికి (మిలటరీ ఆపరేషన్కు) రష్యా తెరతీయాల్సి వచ్చింది. కానీ ఉక్రెయిన్ను నిత్యం ఎగదోస్తున్నది అమెరికా. ఇప్పటికి 27 బిలియన్ డాలర్లు (2.23 లక్ష కోట్ల రూపాయలు) విలువగల ఆయుధ సామాగ్రిని అందించింది. అమెరికా పెట్టుబడిదారుల్లో సింహభాగం మిలటరీ ఇండిస్టియల్ కాంప్లెక్స్ (సైనిక పారిశ్రామిక సముదాయాల) అధినేతలు. వారికి ప్రపంచం లో యుద్ధాలు జరిగితేనే వారి ఆయుధాలు అమ్ముడై లాభాలు సమకూరు తాయి. మరో భాషలో చెప్పాలంటే శవాలపై పైసలు ఏరుకోవడం అంటే ఇదే. మనిషి ప్రాణాలు కన్నా వారికి లాభాలే మిన్న. అమెరికాతో పాటు ఇప్పుడు దాని మిత్ర దేశాలు ఇంగ్లాడు, జర్మనీ కూడా ఉక్రెయిన్కు ఆయుధాలు సరఫరా చేస్తున్నాయి. ఈ యుద్ధ కాలంలో ప్రపంచాన్ని ఆశ్చర్యానికి గురిచేసిన విషయం మరొకటి ఉన్నది. యుద్ధ విరామం ప్రకటించని సమయంలో, అమెరికా సైన్యం ప్రత్యక్షంగా లేని సందర్భాన, అమెరికా అధ్యక్షుడు జో బైడిన్ అకస్మాత్తుగా ఉక్రెయిన్ పర్యటించి కీవ్ నగర నేలపై నడయాడటం అసాధారణం. అలాగే ఆక్షణాన మిలటరీ సైరన్లు హెచ్చరిక కూతలు చేసినా రష్యా సైన్యం ఏమాత్రం తోట్రుపడ కుండా, దాడి చేయక నిగ్రహం పాటించడం అంతే అసాధారణంగా పరిశీలకులు భావిస్తున్నారు. క్షణాల్లో మీటలు నొక్కి దేశ దేశాలను భస్మీపటలం చేయగల సైనిక పాటవమున్న దశలో సైతం, సంయమనం పాటించడం మానవ వివేచనా విశేషమే. అయితే ఇప్పుడు ఎవరు యుద్ధ పిపాసులు? అనే మౌలిక ప్రశ్న తలెత్తుతున్నది. యుద్ధ కారణంగా రష్యా అగ్రదేశమైనా, పరదేశ ఆంక్షలను ఎదుర్కొంటూ ఆర్థికంగా దెబ్బతింటున్నది. ఇక ఉక్రెయిన్ - అమెరికా, పశ్చిమ దేశాల నుండి లక్షల కోట్ల రూపాయల విలువగల ఆయుధ సాయం పొందు తున్నప్పటికీ దినదినం యుద్ధక్షేత్రంలో నిలబడటం ఆ దేశానికి శ్రేయస్కరం కాదు. సమస్త వ్యవస్థలు ధ్వంసమవుతున్నాయి. ప్రాణాలు హారతి కర్పూరంలా హరించుకు పోతున్నాయి. ప్రచ్ఛన్న యుద్ధ దశ ముగిసాక, అమెరికా - రష్యా మధ్య సుదీర్ఘ చర్చల అనంతరమే, 2010లో అణ్వాయుధాల నియంత్రణ ఒప్పందం (స్టార్ట్) కుదిరింది. దీని కాలపరిమితి మరో మూడేండ్లకు ముగియనున్నది. కొత్త ఒప్పందంకై మొదలైన చర్చలను ఇక నిలిపి వేస్తున్నట్టు పుతిన్ ఇప్పుడు ప్రకటించాడు. అమెరికా గనుక ఇలాగే తన ధోరణిలో యుద్ధ చర్యలు ఈ విధంగా కొనసాగిస్తూ అణుపరీక్షలు మొదలుపెడితే, తామూ అందుకు ధీటుగా సన్నద్ధంగానే ఉంటామని పుతిన్ ప్రకటించాడు.
అమెరికా ఒత్తిడితో ఐరోపా దేశాలు కొన్ని ఇప్పటికే పీకలోతుల ఆర్థిక సంక్షోభంలో కూరుకుపోయాయి. అయినా రష్యాకు సహకరిస్తే... ఖబడ్దార్! అంటూ వాటికి అమెరికా హెచ్చరికలు చేస్తూనే ఉన్నది. దీనికి సమాధానంగానా అన్నట్టు, చైనా కమ్యూనిస్టుపార్టీ విదేశాంగ నిపుణుడూ వాంగ్, ఈ నేపథ్యంలోనే మాస్కోలో పర్యటించి రష్యాతో మా బంధం మరింత దృఢతరం అవుతుందని తెలిపాడు. ఈ ప్రకటన శాంతి కాముక శక్తులకు ఊరటతో పాటు ఉత్తేజాన్ని కలిగించింది.
యుద్ధంలో అంతిమంగా బలైపోయేది ఎప్పుడైనా ఎక్కడైనా సైనికులు - ప్రజలు. 'సైనికుడినైన నేనూ - నా ప్రత్యర్థి ఒకే పాత్రలోని విషాన్ని మింగుతాం. ఒకే విషాద గీతాన్ని ఆలపిస్తాం. చివరకు సరిహద్దుల్లేని ఓ మానవతా సువిశాల శాంతి ప్రపంచాన్ని నిర్మిస్తామనే సుందర స్వప్నాన్ని ఉమ్మడిగానే కలకంటాం' మళయాళ కవి సశ్చిదానందన్ వాక్కులు ప్రపంచంలో యుద్ధం ఉన్నంత కాలం మానవ హృదయాలపై తారాడుతూనే ఉంటాయి.
- కె శాంతారావు
సెల్: 9959745723