Authorization
Mon Jan 19, 2015 06:51 pm
''మంటలు భగ భగ మండుతుంటే, మంటలు మండుతున్నారు, కొందరు కాలిపోతున్నారు 'అగ్ని దేవునికి కోపమొచ్చిందని, ఎవరు మంటల వద్దకు వెళ్ళొద్దని వెళ్తే బూడిదవుతారని భయపెడుతున్నారు. మంటలకు కొందరు ఎదురెల్లి కుండలు, బిందెలు, బకీట్లు, చెంబులు పట్టుకొని నీళ్లు గుప్పుతున్నారు, మరికొందరు నీళ్లు చల్లుతూనే మంటలు పెట్టిన దాన్ని ఆచూకీ గుట్టు రట్టు చెయ్యబూనుతున్నారు''. మంటలు రగులుతుంటే ఆపకుండా అడ్డుకొని చలిగాచుకొనే సాంప్రదాయవాదులు, గట్టవతల ఉన్నోళ్లు మస్తుచెబుతారు వాళ్ళకి పోయేది ఏమీలేదు. పైగా కాల్చుకతినే బ్యాచ్ ఉండనే ఉంటది. వారిదే ఈ దేశపు మనువాద వారసత్వం. ఎదురెల్లి సేవ చేసే వాళ్ళు, ప్రాణాలకు తెగించి కారణాలపై యుద్ధం చేసే వాళ్ళు ఏ సమాజానికైనా అవసరం పడ్డ వాళ్ళు కావాలి. వాళ్ళే నిజమైన త్యాగదనులు. ఆ త్యాగధనుల కోవలోకి ఈ దేశంలో చార్వాకులు, లోకాయతులు, బుద్ధుడు, జ్యోతిరావు ఫూలే, అంబేడ్కర్, మార్క్స్ ఫాలోవర్స్ చేరుతారు. మహిళల్లో సాంప్రదాయ మనుగీతలను చెరిపిన మొదటి యోధురాలు సావిత్రిబాయి ఫూలే నే .
తొమ్మిదేళ్ళకే పెళ్లయి వంటింటి కుందేళ్లుగా మారే ఈ దేశపు ముఖచిత్రం మీద రంగు అద్దిన చెరిగిపోని కుంచె సావిత్రిబాయి ఫూలే. ఆమె ఒక ఉపాధ్యాయురాలుగానే అందరికీ తెలుసు. కానీ ఇంగ్లీష్ చదివిన ఫస్ట్ విమెన్, ఇంగ్లీష్ బోధించిన మొదటి లేడీ టీచర్, ఇంగ్లీష్లో లెటర్, కవిత్వం రాసిన మొదటి విమెన్ పోయెట్ కూడా సావిత్రినే. ఆధునిక కవయిత్రి కూడా ఆమెనే. ఆమె చదివిన నూట డెబ్బరు ఏళ్ల తర్వాత కూడా ఇంగ్లీష్లో కవిత్వం అటుంచితే ఇంగ్లీష్ ముక్కలు తెలవని ఆధునిక మహిళలు డెబ్బరు శాతం ఉన్నారంటే ఆశ్చర్యం లేదు. అంతేకాదు తెలుగు అక్షరంతో కూడా దోస్తీ చెయ్యని నలబై శాతం తెలంగాణ ఆడబిడ్డల చేతులు ఖాళీగానే ఉన్నాయి. సావిత్రి టీచర్గా అందరికి పరిచయమే. కానీ సరస్వతి ఎందరికి టీచర్గా తెలుసు? ఏ రాష్ట్రంలో, ఏ జిల్లాలో, ఏ ఊర్లో చదువు చెప్పిందో తెల్వదు. ఎవరికి చెప్పిందో తెలియదు. పోనీ ఎక్కడ పుట్టిందో అదైనా తెలుసునా అంటే తెలియదు అనే సమాధానమే వస్తుంది. కానీ సావిత్రి ఎక్కడ పుట్టిందో, ఎక్కడ చదువు చెప్పిందో, ఎవరికి చెప్పిందో స్పష్టంగా ఎవరైనా చెప్పగలరు. అయినా తెలియని అసలు ఉన్నదో లేదో పుట్టిందో లేదో ఊహల్లో చెప్పే సరస్వతి ఫొటోలు పెట్టి, చదువుల తల్లి అని ఊహల తల్లిని ఈ దేశపు మెజారిటీ ప్రజల మస్తిష్కల్లో రుద్ది. ఆ ఊహ చదువుల దేవత ఏమిచెబుతుందో అర్థం కాక ఏదో చెప్పిందని సంస్కృతాన్ని తెలియని బలవంతంగా బహుజనులకు అంటగట్టి కుట్ర పన్నింది బ్రహ్మణవర్గం. పైగా అది ఎవరూ చదవద్దని ఆంక్షలు పెట్టి, పొరపాటున ఎవరైనా వింటే చెవుల్లో సీసం పోసింది. అత్యధికులకు తెలియని, నిషేధించిన సరస్వతి చదువుల తల్లి అని ఎందుకొప్పుకోవాలి. అందుకే అందరికి తెలిసిన సావిత్రి బాయి ఫూలేనే బహుజనపు తల్లి. ఆమె చదువు నిషేధించిన దేవత అసలే కాదు. భౌతికంగా బతికి విద్యాబుద్ధులు చెప్పి జ్ఞానం కలిగించిన ఎక్కుపెట్టిన ఏకలవ్యుని బాణపు లక్ష్యపు గురిని బహుజనులకు బతుకు చూపిన సావిత్రి బాయి ఫూలేనే నిజమైన చదువుల తల్లి .
''పితా రక్షతి కౌమారే, భర్తా రక్షతి యౌవ్వనే
పుత్రా రక్షతి వార్థక్యే న స్త్రీ స్వాతంత్య్ర మర్హతి''
స్త్రీలకు పెళ్లే విద్య, భర్తే గురువు, ఇంటిపనులే అభ్యసన విషయాలు అనే మనుస్మృతి గీతలను మొదట చెరిపినది ఆమె. రక్షణకే భర్త కాదని రణమే ఆయుధమనే రణధీరుడు జ్యోతిరావుఫూలే సహకారంతో తనే గురువయ్యింది. నాలుకతో దబుడాన్ని చీల్చి ఇంగ్లీష్ అక్షరాలతో నాట్యమాడించింది. చెవుల్లో పోసిన సీసాన్ని కరిగించిన చరిత్రను తిప్పి తిరుగుబాటు యోధుల గానాన్ని వినిపించింది, వంటింటికి కట్టేసిన బంధాలను తెంపి తన కాళ్లతో జ్ఞానపు బాటలు పరిచింది.
స్త్రీకి ఏ జ్ఞాన విద్యనైతే మనుస్మృతి నిరాకరించిందో దానిని ఆమె పొందటానికి తొలి విద్యా గురువు భర్త కాగా, అతని మిత్రులు సఖరం యాశ్వంత్ పరాంజపే, కేశవ్ శివరాం భావేల్కర్ల సహాయ సహకారాలతో అహమ్మద్ నగర్లో ఫరార్స్ సంస్థ లోను, పూణేలో ఎం.ఎస్ మిచెల్ నిర్మల్ స్కూల్లోనూ సావిత్రి బాయి చదువుకోవటానికి, టీచర్స్ ట్రైనింగ్ పూర్తి చేయటానికి అవకాశాలను కల్పించాడు జ్యోతిరావ్ఫూలే. ఆ రకంగా 1848లో ఆయన పూణేలో భీడే వాడాలో ఆడపిల్లల బడి ప్రారంభించే నాటికి అతని సంస్కరణ భావాలకు తగిన చైతన్యంతో సామాజిక కార్యాచరణలో చేదోడు వాదోడుగా నిలబడగల వ్యక్తిగా ఆమె ఎదిగింది.
సాంప్రదాయ సమాజం పురుషులే కుల, లింగ వివక్షకు వ్యతిరేకంగాపోరాడితే సహించని పరిస్థితుల్లో ఒక మహిళ ఈ సమాజ గబ్బుని శుభ్రం చేస్తానని బయలుదేరుతా అంటే సహిస్తుందా? అనేక రంగాలలో స్త్రీల కృషిని నిరోధించటానికి, నియంత్రించటానికి వ్యతిరేక ప్రచారాలకు, భౌతిక దాడులకు, లైంగిక దాడులకు పాల్పడుతున్న పితృస్వామిక అధికార వికృతి మనకు తెలిసిన వర్తమానమే. కొదురుపాక రాజవ్వ నుండి, భన్వారీ బాయి, సోనె సోరీ వరకు, అలాగే తెలుగు రాష్ట్రాల్లో అయేషా నుండి దిశ వరకు, ఢిల్లీ నిర్భయ నుండి ఉత్తరప్రదేశ్ మనీషా వరకు చదువుకై, ఉద్యోగానికై బయటికెళ్తే ఆధునిక మనువుల రాజ్యంలో లైంగిక దాడులకు ఆహుతవుతున్న ఘటనలు నేటి స్థితికి ఉదాహరణలు. నూటా యాభై సంవత్సరాల కితం ఆడపిల్లలకు చదువు చెప్పటానికి, అందులోనూ శూద్ర, అతి శూద్ర బాలికలకు చదువు చెప్పటానికి బయటకు వచ్చిన సావిత్రి బాయిని రాళ్లు రువ్వి, కుళ్ళిన కూరగాయలు, పేడ విసిరి వేధించారంటే ఆశ్ఛర్య పడవలసినది ఏమీ లేదు. వాటిని తన పనికి అభినందనగా విసరబడే పూలగా భావిస్తూ, వాళ్ళ చర్యలవల్ల పాడై పోయిన చీరను మార్చుకొనటానికి మరొక చీర కూడా వెంట తీసుకువెడుతూ ఆమె ఎంతో స్థిత ప్రజ్ఞత, నిబ్బరం, ఆశయం పట్ల దీక్ష ఆమెను నిలబడేలాచేసాయి. దేశంలోనే మొట్టమొదటిగా కులాంతర వివాహాలను ప్రోత్సహించారు. వివాహాలు చేశారు. పురోహితులు లేకుండా పెళ్ళిళ్లు చేశారు. భర్త చనిపోయినప్పుడు భర్త చితికి ఆమె నిప్పు అంటించిన సంఘటన ఆరోజుల్లో భారతదేశ చరిత్రలోనే అరుదైనది. ఈ చర్యతో ఆమె సాంప్రదాయ స్త్రీ కాదని స్వతంత్ర వ్యక్తిత్వం, భావాలు, ధైర్యం గల స్త్రీ అని నిరూపించింది.
ఫూలేలో నిజమైన గొప్పతనం ఏమిటంటే వారు హిస్టరీని ఫాలో కాలేదు. రివర్స్ చేశారు. రివర్స్ గానే పరిశీలించారు. బ్రాహ్మణులు రాసింది. చెప్పింది అంతా వారికి అనుకూల గాథలే చెప్పారు. ఫూలే సేద్యగాని చర్ణకోలా, గులాంగిరి కానీ వారి భావధారను తెలుపుతుంది. సావిత్రిబాయి కూడా తన కవితల్లో అద్భుతమైన రీతిలో బ్రాహ్మణ మనువాదం కుటిల దుర్నీతిని, గొప్పవాళ్లను చరిత్ర హీనులుగా, విలన్లుగా చేసిన తీరును సూటిగా విమర్శిస్తూ రాసింది. తన 'ఆత్మ కథనం' కవితలో పౌరాణికపాత్రల్లో తరచూకనిపించే బలిచక్రవర్తిని మహనీయుడుగా పొగిడి 'ఆ మహాదాత యోద్ధాకు నిజమైన వారసులం' అని సగర్వంగా చెప్పుకొన్నది.
సావిత్రి ఫూలే ఆలోచనలకు భిన్నంగా నేటి ఆధునిక మనురాజ్యం నడుస్తుంది. వేదాల్లో అంతా ఉందంటారు. ప్లాస్టిక్ సర్జరీ చేసిన దేశం అని, పుష్పక విమానాలు నడిపిన దేశం అని, రామరాజ్య నిర్మాణమే లక్ష్యంగా చెబుతూ నడుస్తున్నారు. తమ రాజ్యానికి ఆటంకం అనిపిస్తే గౌరీ లంకేష్ నీ, కలుబుర్గిని చంపినట్లు చంపి రామరాజ్యం తెస్తారా? ప్రశ్నను ఓర్వని పరిస్థితులు తెలంగాణలో నేడు నెలకొన్నాయి. అభ్యుదయాన్ని కూడా జీర్ణించుకోలేని స్థితిలో నేటి మనువాదులు ఉన్నారు. కోటగిరి టీచర్ మల్లికార్జున్ పై దాడి, నరేష్, రాజేష్, వింజమూరి టీచర్ కురుమూర్తి లపై ప్రత్యక్ష దాడి చేసి బెదిరిస్తున్నారు. సావిత్రి కాలంలో కూడా వారిపై అప్పటి మనువాదులు, సాంప్రదాయ వాదులు కించపరిచారు, అవమాన, ఆటంక పరిచారు. కానీ చంపలేదు. కానీ నేడు భౌతిక దాడులకు ఉసి గొలుపుతున్నారు. ఇంతటి దశకు సమాజం తిరోగమించిందా? పవర్ లో ఉన్నోల్లే పనికిరాని మనువాదాన్నీ నేడు పునర్జీవింప కుట్ర చేస్తున్నారు. నయా మనువాధన్ని రుద్దాలని యత్నిస్తున్నారు. సావిత్రి చూపిన దారిలో ఆ మనువాద విశపు కత్తులను చీల్చే జ్ఞానపు బుల్లెట్లుగా కావాలి నేటి యువత.
ప్లేగు వ్యాధి ప్రబలినప్పుడు సోకినప్పుడు ప్రజలందరికీ తిండి పెట్టి అదుకున్నది. చివరికి ఒక దళిత పిల్లాన్ని తన భుజాలపై మోస్తూ సేవ చేసి అదే ప్లేగు వ్యాధితో చనిపోయింది. ప్రజల కోసమే తన జీవితాంతం కృషి చేసింది. వారికి సేవ చేస్తూనే చని పోయింది. తను అనుకున్న నిర్మించుకున్న ఆశసౌధం కోసమే ఒడిదుడుకులు ఎదుర్కొని, ఛీత్కారాలను సహించి, చివరికంట నిలబడిన త్యాగపు కోట. మనువు గీతలపై దాటి అడ్డువచ్చిన, అడ్డుపడిన హద్దులను దాటి, వాటిపై యుద్ధం చేసినది సావిత్రిబాయి ఫూలే. అందుకే జ్యోతిభాను అన్నట్లుగానే ఆమె కూడా 'మహిళ లోకపు వినీలకాశంలో సావిత్రి బాయి ఓ చంద్రబింబం'. ఆమె చూపిన మార్గమే ప్రగతిశీల శక్తుల కర్తవ్య బాట.
- ఎ. విజయకుమార్
(నేడు సావిత్రిబాయి ఫూలే 126వ వర్థంతి)
సెల్:9573715656.