Authorization
Mon Jan 19, 2015 06:51 pm
గత నెల ప్రారంభంలో హిండెన్ బర్గ్ నివేదిక విడుదలైన తర్వాత ఒక్కసారిగా అదానీ సామ్రాజ్యం కుప్పకూలినంత పనైంది.దేశంలోనే గాక ప్రపంచ వ్యాపితంగా ఆ గ్రూపు ప్రభలు కొడిగట్టాయి. రాజకీయ పార్టీల నుంచి సుప్రీం కోర్టు వరకూ ఆందోళనతో ఆగ్రహంతో స్పందిం చాయి. దేశదేశాల మీడియా సంస్థలు కథ నాలు ప్రకటించాయి. గౌతం అదానీ ఇంతగా దేశాన్ని దగా చేయగలిగాడంటే ప్రధాని మోడీ ఆయన ప్రభుత్వ అండ దండలే కారణమని ప్రతి ఒక్కరూ విమర్శించారు. పార్లమెంటులోనూ ప్రతిపక్షాలు నిలదీశాయి. ఈ వ్యవహారం మొత్తం కూలంకషంగా దర్యాప్తు చేయడానికి సంయుక్త పార్లమెంటరీ సంఘం(జేపీసీ) వేయాలని గట్టిగా పట్టుపట్టాయి.వారి కంఠశోష,పార్లమెంటు సమయం హరించుకుపోవడం తప్ప దమ్మిడీ ప్రయోజనం కలగలేదు. చివరలో చర్చకు సమాధానమిచ్చిన మోడీ వాటిపై సమాధానం ఇవ్వడం కాదు కదా కనీసం ఖండిం చడం కూడా జరగలేదు!ఎల్ఐసి,ఎస్బిఐల నుంచి రూ.లక్ష కోట్ల వరకూ అప్పులు ఇప్పించి అదానీని అందలమెక్కించిన కేంద్రం నిర్వాకం కనీసంగా విచారణకు నోచలేదు! దీనిపై పరిశీలనకు ఒక విచారణ కమిటీని నియమించాలని భావించిన సుప్రీం కోర్టుకు కూడా కేంద్రం సహకరించలేదు. తనుగానే అత్యున్నత న్యాయస్థానం ఒక కమిటీని వేసింది. ఈ దర్యాప్తునకు సహకరించకపోగా కేంద్రం సంస్థలు బీజేపీకి దగ్గరగా ఉండే మహాకుబేరులు అదానీని కాపాడేందుకు రంగంలోకి దిగారు.అంతిమంగా అమెరికాకు చెందిన రాజీవ్ దేశారు భారీ రుణమిచ్చి ఆదుకున్నారు. ఇప్పుడు ఆ గ్రూపు గట్టెక్కిందని కథనాలు వదులుతున్నారు. అదానీ చిక్కులెదుర్కొంటున్న మరోదేశం ఆస్ట్రేలియా ప్రధానిని పిలిపించి మరీ క్రికెట్ ఆట ముసుగులో మంతనా లాడి దారికి తెచ్చుకున్నారు. ఇది అస్మదీయుల సంగతి.
తస్మదీయులే లక్ష్యం
మరి తస్మదీయులైతేనో?ఢిల్లీలో లిక్కర్ స్మాం జరిగిం దంటూ వార్తలు లీక్లు వచ్చాయి. ఏడాది కిందటినుంచి బీజేపీ నేతలు దీని గురించి మాట్లాడుతూ బీఆర్ఎస్ నాయకులు కేసీఆర్ కుటుంబ సభ్యులు అరెస్టు కాకతప్పదని చెబుతూ వచ్చారు.ఇంతకూ ఈ కుంభకోణం విచారించాలని ఢిల్లీ లెఫ్టినెంట్ గవర్నర్ విజరు సక్సేనా సీబీఐని కోరారు.వారు రంగంలోకి దిగాక బీజేపీ నేతల దాడి దూకుడు మరింత పెరిగాయి.తెలంగాణలో ఆపరేషన్ ఫాంహౌస్ ప్రహసనం తర్వాత బీజేపీ నేతల దాడి మరింత పెరిగింది. ముఖ్యమంత్రి కెేసీఆర్ కూడా అరెస్టు కావలసిందేనని బీజేపీ అధ్యక్షుడు బండిసంజరు పలుమార్లు బెదిరించారు.తర్వాత ఈ దాడి ఎంఎల్సి కవితపైకి మరలింది. సౌత్గ్రూపుగా ఏర్పడిన కొందరు వైసీపీ, బీఆర్ఎస్ నాయకులు ఢిల్లీ మద్యపాన విధానాన్ని మార్పు చేసి తమకు లాభం వచ్చేలా చేసుకున్నారని ఈ క్రమంలో రూ. వందకోట్లు ముడుపులు ముట్టాయని తెలంగాణ బీజేపీ మోతమోగిం చింది.ఢిల్లీలోనూ ఆప్ను దెబ్బతీయడానికి ఇదే ప్రచారం మరింత తీవ్రంగా నడిచింది. కేవలం సందేహాల ఆధారంగానే ఎన్ఫోర్స్మెంట్ డైరెక్టరేట్(ఈడి) రంగంలోకి దిగింది. తమ ఇల్లు మొత్తం సోదా చేసిన ఈడి ఏ ఆధారాలు దొరకలేదని ప్రకటించిందని ఇప్పుడు అరెస్టులో ఉన్న మాజీ ఉప ముఖ్యమంత్రి మనీష్సిసోడియా ప్రకటించారు. అయితే అది వేగంగా మారిపోయింది.ఏవో ఆధారాలు దొరికాయంటూ హైదరాబాద్ లో కొన్ని అరెస్టులు చేశారు. ఆ తర్వాత దీనంతననటికీ సంధానకర్త కవిత అంటూ ఆమెపై దాడి మొద లెట్టారు. కవిత ఇందుకు సంబం ధించిన ఫోన్లు ధ్వంసం చేశారనేది మాత్రమే వారు చెబుతున్న ఆధారం. చచ్చిపోయిన గేదె పగిలి పోయిన కుండడు పాలు ఇచ్చేదన్న చందంగానే ఈ వాదన ఉంది. తమాషా ఏమంటే ఇదంతా కూడా మొదట మీడియాలో రావడం తర్వాత ఈడీ సీబీఐ రంగంలోకి దిగడం.ఆ విధంగా ఆంధ్ర తెలం గాణ రాష్ట్రాల్లో లిక్కర్ కంపెనీలకు మీడియా సంస్థలు లాబీయింగ్ వ్యవస్థకు సంబంధించిన పలు వురిని అదుపులోకి తీసుకున్నారు. కవిత నిర్దేశకత్వంలో అరుణ్ రామచంద్ర పిళ్లె అనే ఆసామి వీరందరినీ సమన్వయం చేశారనేది సీబీఐఈడీ ఆరోపణ.వారిని వారి తర్వాత సిసోడియాను అదుపులోకి తీసుకున్నారు. ఆయన తర్వాత రాజకీయ ప్రచారం ఎక్కువ చేసింది కవిత గురించే.ఆమెను రెండు మూడు సార్లు విచారించారు. ఆ సమ యంలో ఉద్రిక్తత కూడా తారాస్థాయిుకి చేరింది. ఈ వారంలో మరోసారి విచారణకు పిలిస్తే ఆమె ఢిల్లీలో మహిళా రిజర్వేషన్ల బిల్లు గురించిన దీక్ష కారణంగా వాయిదాకోరి ఈ రోజు హాజరయ్యారు. ఆ క్రమంలో ఆమె ఫొటోలు ప్రచురించి ఆమె చాలా భయపడుతున్నట్టు వ్యాఖ్యలు రాశారు.అనేక ఇంటర్వ్యూలు ఇచ్చిన కవిత తనకు ఈ వ్యవహారంతో ఏం సంబంధం లేదని భయం కూడా లేదని చెబుతూ వచ్చారు. ఈమధ్యలో ఆమె ముఖ్యమంత్రి కేసీఆర్తో మాట్లాడటం, వ్యూహం నిర్ణయించుకోవడం ప్రతిదీ అపహాస్యం చేశారు. స్కాం ఇప్పటికే రుజువైనట్టు, ఆమె కుటుంబం పార్టీ కూడా పద్మవ్యూహంలో చిక్కినట్టు ప్రచారం సాగింది.
ఎనిమిది పార్టీల అభ్యంతరం
ఈ సమయంలో ఎనిమిది పార్టీలకు చెందిన తొమ్మిది మంది నాయకులు వారిలో నలుగురు ముఖ్యమంత్రులు, అయిదుగురు మాజీలు ప్రధాని మోడీకి లేఖరాస్తూ దర్యాప్తు సంస్థలను ప్రత్యర్థు లపై నిర్బంధానికి దుర్వినియోగపర్చడం అప్రజాస్వామికమని విమర్శించారు. అదానీ ఉదంతం వలే బీజేపీకి అనుకూలమైతే రక్షించడం,తమ పార్టీలో చేరితే వదలివేయడం ద్వంద్వనీతి అని తేల్చిచెప్పారు. లేఖపై సంతకం చేసిన బీఆర్ఎస్, ఆప్, టీఎంసీ, నేషనల్ కాన్ఫరెన్స్, శివసేన, సమాజ్వాది, ఆర్జేడి, నాయకులందరూ ఈ విధమైన వేటకు గురైనవారే, గవర్నర్లను అడ్డం పెట్టుకుని రాష్ట్ర ప్రభుత్వాలతో చెలగాలమాడటం తప్పని కూడా హెచ్చరించారు. (ఢిల్లీ లిక్కర్ వ్యవహారం లెఫ్టినెంట్ గవర్నర్దగ్గరే మొదలైందని గుర్తుంచుకోవాలి.ఆ లేఖ రాసిన రోజునే తెలంగాణ గవర్నర్ తమిళిసై వివాదం రాజేయడం యాదృచ్చికం కాదు) ఈ లేఖలో సంతకాలు చేసిన వారంతా అవినీతి ఆరోపణలు ఎదుర్కొంటున్న వారేనని ఆరోపిస్తూ దీనిపై కాంగ్రెస్ వామ పక్షాల నేతల సంతకాలు లేక పోవడం గురించి ఎక్కువ చేసి చూపించారు. తర్వాత కేరళ ముఖ్య మంత్రి పినరాయి విజయన్, తమిళనాడు ముఖ్యమంత్రి స్టాలిన్ విడి విడిగా మోడీకి ఇదే విష యమై లేఖలు పంపించారు. కేసుల మంచి చెడ్డలు ఏమైనా దర్యాప్తు సంస్థల తీరు పారదర్శకంగా నిష్పక్ష పాతంగా లేదని పినరాయి సోదాహరణంగా వ్యాఖ్యానిం చారు. ఇంతకూ పినరాయి విజయన్ తన లేఖలో పేర్కొన్నట్టు ఈ కుంభకోణా నికి సంబంధించి ఎలాటి ఆధారాలు లేదా నగదు కాదంటే డేటా దొరికినట్టు ఇంతవరకూ వెల్లడి కాలేదు. సిసోడియాను విడుదల చేయాలని కూడా స్టాలిన్ తన లేఖలోరాయడం జరిగింది. ఆయనను మరో సంస్థ ద్వారా కస్జడీలో కొనసాగించడం, ముఖ్యమంత్రి అరవింద్ కేజ్రీవాల్ను కూడా అరెస్టు చేయొచ్చని బీజేపీ చోటా నాయకులు బెదిరిస్తూనే ఉన్నారు.ఈ లేఖల తర్వాతనే బీహార్ మాజీ ముఖ్యమంత్రి లాలూ యాదవ్ఆయన కుమార్తెల ఇండ్లపై దాడులు చేశారు.అంటే ఇదంతా కావాలని జరుగుతున్న దేనని స్పష్టమవుతుంది.
ఇదే మోడీ న్యాయం
అదేపనిగా ప్రత్యర్థులపై దాడులు దుష్ప్రచారాలతో లొంగదీసుకునే మోడీ ప్రభుత్వ పోకడలకు తోడు మీడియాలో పక్షపాత ధోరణుల వల్ల ఈడీ,ఐటీ, సీబీఐలను దుర్వినియోగ పరిచే త్రిశూల వ్యూహం తగినంతగా ప్రజల దృష్టికి రావడం లేదు. ప్రజాస్వామ్యంలో రాష్ట్ర ప్రభుత్వాలకు వివిధ పార్టీలకూ సమానమైన హక్కులు ఉంటాయనే సత్యం విస్మరించబడుతున్నది. కేంద్ర దర్యాప్తు సంస్థలు స్వతంత్ర ప్రతిపత్తితో పనిచేయాలి.గతంలోనూ వీటిపై ఆరోపణలు ఉన్నమాట నిజమే గాని మోడీ హయాంలో వాటిని పూర్తి కీలుబొమ్మలుగా మార్చివేయడం సత్యం. సీబీఐ, ఈడీలకు అధిపతులను నియమించేప్పుడు సుప్రీం కోర్టు సూచనలు తోసిపుచ్చి తమకు లోబడి ఉండేవారి సర్వీసు పొడగించి మరీ ఎంపికచేస్తున్నారు.వారిని తమ ఇష్టానుసారం వేధింపులకు పాల్పడు తున్నారు. ముందే చెప్పినట్టు అస్మదీయులకు ఒక నీతి తస్మదీయులకు ఒక నీతి అంటున్నారు. తృణమూల్ నాయకులు సువేందుఅధికారి, ముకుల్ రారు తమతో చేరగానే వారిపై దర్యాప్తులు ఆగిపోయాయి. తెలుగునాట కూడాకొందరు టీడీపీ నేతలకు ఇదే విధమైన ఉపశమనం లభించింది. మరోవంక తమను వ్యతిరేకించేవారిపై నిరంతరాయంగా దాడులు, దర్యాప్తులు నాటకీయంగా సాగిస్తున్నారు. కేరళ వామపక్ష ప్రభుత్వంపైన ముఖ్యమంత్రిపైన కూడా బంగారం స్మగ్గింగ్ కేసు మోపాలని విఫలయత్నం చేసిన కేంద్రం దాన్ని ఏదో రూపంగా సాగదీస్తూనే ఉంది. మోడీతో జోడీ లేదంటే ఈడీ అన్నది ఇప్పుడు తారకమంత్రంగా మారింది. సంపన్న వ్యాపార వేత్తలు, వ్యాపారాలు గల సంపన్న రాజకీయ నేతలు స్వీయ రక్షణ కోసం బీజేపీని ఆశ్రయించితే రక్షణ దొరుకుతుందని భావిస్తున్నారు. మరోవంక మానవ హక్కుల కోసం, ప్రజల కోసం పనిచేసే స్వచ్చంద సంస్థలతో సహా లేనిపోని దాడులకు, వేధింపులకు గురవుతున్నారు. న్యూస్క్లిక్, క్వింట్తో సహా అనేక మీడియా సంస్థలు నడిపించడం దుర్భరంగా మార్చేశారు.ఇవేవీ ప్రజాస్వామిక లక్షణాలు కావు. ఇది ప్రభుత్వ పరిధులు దాటి రాజకీయపార్టీగా బీజేపీ ఇష్టారాజ్యంగా మారుతున్నది.
చాలామంది తప్పుగా భావిస్తున్నట్టు లేదా కొందరు వాఖ్యాతలు చిత్రిస్తున్నట్టు ఇది అవినీతి నిరోధానికి సంబంధించిన అంశం కాదు. అవినీతి వ్యవహారాలకు ఆధారాలుంటే పార్టీల ప్రమేయం లేకుండా ఎవరిపైనైనా చర్యతీసుకోవాల్సిందే. శిక్షలు పడాల్సిందే. కాని ఒకవైపే చూడు అన్నట్టు తస్మదీయులను ఏరికోరి ఇబ్బంది పెట్టడం,వెంటబడి వేధించడం ప్రజాస్వామ్య విరుద్ధం. మనీ లాండరింగ్ కింద కేసు నమోదు చేసే అధికారం గతంలోవలే గాక మామూలు అధికారులకు కూడా కట్టబెడుతూ చట్టాన్ని సవరించారు.ఇప్పుడు ఏచిన్న అధికారి అయినా ఆరోపణచేస్తే నిర్దోషిత్వం నిరూపించుకోవలసిన భారం నిందితులదే, ఇంతకన్నా తలకిందులు తర్కం మరొకటి ఉండదు. దురదృష్టవశాత్తూ దీనికి సుప్రీం కోర్టు ఆమోదం కూడా పొందారు. కనకనే ప్రతిపక్షాలు సుప్రీంకోర్టుకు దీనిపై లేఖరాసి పున:పరిశీలన కోరాయి. విచ్చలవిడిగా ఈడి కేసులు దాడులు పెరగడానికి ఇదో ముఖ్య కారణం.కేసుల జాప్యం దీనికి తోడు. ఇటీవల న్యాయస్థానాలు కూడా ఇలాటి తప్పుపోకడలను గుర్తించినా కేంద్రం వైఖరిలో మార్పులేదు.ఆధారాలున్న అక్రమాలను చట్టప్రకారం విచారించి కోర్టుల ముందుంచాలి. అంతేగాని తామే తీర్పరులై దండనాయకులై ప్రతిపక్షాలపై విరుచుకుపడి లొంగదీసుకోచూడటం సహించరానిది.
- తెలకపల్లి రవి