Authorization
Mon Jan 19, 2015 06:51 pm
ఛాందసం సింహాసనమెక్కి
శాసనాలు లిఖిస్తోంది
మిత్రమా..
మాట మౌనమవ్వాలట
పాట జోల పాడాలట.
శబ్దం నిశ్శబ్దమై ఉన్మాద నినాదమవ్వాలట.
రాతలు గీతలు చేతులు
ముడుచుకు కూర్చోవాలట.
కలల శిశువులకు జన్మనిచ్చే
కన్నులు వెన్నులు వంచాలట.
వెలుగు దారులకై పరుగులు తీసే
కాళ్ళు... సంకెళ్ల చెప్పులు తొడగాలట.
''ఒకటికి'' మాత్రమే కిరీటం పెట్టాలట.
ఒక్కడికే పట్టాభిషేకం చేయాలట.
భిన్నత్వం వైవిధ్యం ధ్వంసం కావాలట.
సనాతన సంస్కృతి నిర్మితమవ్వాలట.
మనువు అంగాలు మన జన్మస్థానాలట
తరాలు మోస్తున్న అంతరాలు కర్మ ఫలాలట.
అంబేద్కర్ రాసిన రాజ్యాంగం అరువు తెచ్చిందట
అది నిత్యం భరతమాత పరువు తీస్తున్నదట.
కార్పొరేటుతో చుట్టరికం కలుపుకొని
రాజ్యం మౌడ్యం దోస్తులయ్యాయి.
గనులు మణులు వనరులు... చివరికి
నింగి నేల వారికి ఆస్తులయ్యాయి
జాతి సంపదను అమ్మకానికి పెట్టి
దేశానికి అడ్డ నిలువుల పంగనామం పెట్టి
దొంగ కొంగ జపం చేస్తున్నాయి.
రాష్ట్ర రాష్ట్రాన రబ్బరుస్టాంపుల రాజకీయాలు
కేడీలు ఈడీలు మూలవాసిపై మూకదాడులు
వీధివీధిన గోడీ మీడియాలు సీబీఐ ఐడియాలు
ప్రశ్న విధ్వంసం ప్రజాస్వామ్యం అపహాస్యం.
ఈవైపు శిఖరమెత్తు సంపద పోగులు,
ఆ వైపు ఇంకా సరిపడా నిండని
శ్రమ జీవుల పేగులు
కుహానా భక్తి , దేశభక్తి నిస్సిగ్గుగా
నాకుతుంటే నల్ల చట్టాల బూట్లు
బందిపోట్లై కార్పొరేట్ ఖజానాకు
పెడుతున్నరు తూట్లు
మిత్రమా..
ఛాందసం చెలరేగిపోతున్న తరుణంలో
రణం ఆపి...చేతులు ముడుచుకు కూర్చుంటే
ప్రశ్న ప్రమాదంలోకే... బ్రతుకు అగాధంలోకే
అందుకే.. అందుకే..
ఊపిరి పీల్చుకుందాం. ఊరిని కలుసుకుందాం
రచ్చబండ కాడ చైతన్య కాగడా వెలిగిద్దాం
ఫాసిస్టు పోకడలపై పోరు జేయ కదులుతున్న
''జన చైతన్య యాత్ర''కు స్వాగతం పలుకుదాం..
'జన చైతన్య యాత్ర'కు స్వాగతం పలుకుదాం...
(ఈ నెల 17 నుంచి 29 వరకు తెలంగాణ రాష్ట్ర వ్యాప్తంగా జరగనున్న ''జన చైతన్య యాత్ర''లకు సంఘీభావంగా...)
- బండారు రమేష్