సత్యం శివం సుందరం ఒక తల్లి సంతానం కాదు. ఒకే కుటుంబంలో వేరు వేరు తల్లులకు పుట్టిన వారు కాదు. అన్నదమ్ముల పిల్లలూ కాదు. వాళ్ళ బ్లడ్‌గ్రూప్‌లు కూడా ఒకటి కాదు.
సత్యం శివం సుందరం వేరు వేరు కులాలకు కుటుంబాలకు చెందిన వారైనా వారి మధ్య ఉన్న అనుబంధం మాత్రం చాలా గట్టిది. అన్నదమ్ముల అనుబంధాన్ని మించినది.
సత్యం శివం సుందరం చిన్న నాటి స్నేహితులు. వాళ్ళ స్నేహం ప్రాథమిక పాఠశాలలో మొగ్గ తొడిగింది. అది లతలాగా స్కూల్‌ నుంచి కాలేజీ దాకా పాకింది. ఒకళ్ళంటే ఒకళ్ళకి ప్రాణాలిచ్చేంత ప్రాణం.
ఏ బంధాలైనా అనుబంధాలైనా ఏదో ఒక రోజు బలహీన పడటం సర్వసాధారణం. అయితే వీళ్ళ బంధం గాలిపటపు దారంలా మూడు దిక్కులకూ విసిరేసింది. మూడు రకాల జీవితాల్ని నిర్దేశించింది.
కాలప్రవాహంలో ముగ్గురి జీవిత నావలూ గాలివాటంతో మూడు చోట్లకు కొట్టుకుపోయినా వాళ్ళ మధ్య అనుబంధం 'సెల్‌ఫోన్‌' బంధంతో కొనసాగింది. 'వాట్సప్‌' వాళ్ళ మధ్య సంబంధాన్ని నారు నీరు పోసి పోషించసాగింది.
సత్యం శివం సుందరంలు సెల్‌ఫక్షన్‌లలో గుడ్‌ మార్నింగ్‌తో రోజును కొలవడం మొదలుపెట్టే వారు. గుడ్‌నైట్‌ వరకూ పోస్టింగులు సెల్‌లలో వెలుగులు విరజిమ్మేవి. బర్త్‌డేలప్పుడూ పండుగలకూ చిచ్చుబుడ్లు కాంతులు విరజిమ్మేవి. గ్రీటింగ్సు పారిజాతాలు సువాసనలు వెదజల్లేవి.
సత్యం శివం సుందరాలు వేరువేరుగా వేరు వేరు చోట్లల్లో ఉన్నా వేరు వేరు రకాలుగా జీవితాన్ని అనుభవిస్తున్నా అందరం హాయిగా, సుఖంగా ఉన్నామనే అనుకునేవాళ్ళు. ప్రతి రోజూ పరస్పరం పోస్టింగులు చూసుకుంటే క్షేమంగా ఉన్నామనే భావించేవాళ్ళు.
నీలాకాశంలో నల్లమబ్బులు ఎప్పుడు ముసురుకుంటాయో ఎవరికి తెల్సు. నల్లమబ్బులు ఒకదానితో ఒకటి సంఘర్షించి ఉరుములూ మెరుపులతో చినుకులుగా రాలిపడ్డం అసాధారణమేమీ కాదు కదా!
ఒకనాడు శివం సుందరమ్‌ల సెల్‌ఫోన్‌లలో సత్యం కనపళ్ళేదు. బిజీగా ఉన్నాడేమో అనుకున్నారు ఇద్దరూ. మర్నాడు ఆ మర్నాడు ఇంకొకనాడు కూడా సత్యం జాడలేదు. శివం సుందరం కంగారు పడ్డారు ఫోన్లు చేశారు. ఫోన్‌లోనూ సత్యం వినపళ్ళేదు.
సత్యం జాడ తెలీక శివం సుందరమ్‌ తల్లడిల్లిపోయారు. అంతా బానే వుందా లేక ఏమీ బాగులేదా అని ఒకళ్ళనొకళ్ళు ప్రశ్నించుకున్నారు. 'మూఢ'గా ఉన్నారు.
ఐదవ రోజున శివం ఫోన్‌లో సత్యం కనబడ్డాడు. అదే రోజున సుందరం ఫోన్‌లో మెరిశాడు. అది చూసి శివం సుందరం ఆనందంతో 'మూడు దెబ్బల' నృత్యం చెయ్యాలి కానీ క్యూరింగ్‌ సరిగ్గా చేయని సిమెంటు స్లాబ్‌లా కుప్పకూలిపోయేరు.
సత్యం పోస్టింగ్‌లో అక్షరాలు పొడిపొడిగా ఉన్నా తడితడిగా తగిలాయి వాళ్ళిద్దరికీ. 'నాకు జీవితమ్మీద విరక్తి కలిగింది. ఆత్మహత్య చేసుకోబోతున్నాను. సారీ ఫ్రెండ్స్‌ రేపటి సూర్యోదయాన్ని మీరిద్దరే చూస్తారు.'
శివం సుందరం అదిరిపోయారు. వాళ్ళ పల్సు రేటు జూబ్లీహిల్స్‌ ప్లాట్ల రేటుకు రెట్టింపయింది. వాళ్ళ హార్ట్‌బీట్‌ దేశంలోనే అత్యంత వేగంగా పరుగెత్తే వందేభారత్‌ ఎక్స్‌ప్రెస్‌ రైలు వేగాన్ని మించిపోయింది. ఒకరు గాలిలో ఈదుతూ మరొకరు నేల మీద పాకుతూ సత్యం ఉన్న చోటికి వచ్చేశారు మర్నాటి సూర్యోదయానికి ముందే.
ఏ భయంకరమైన దృశ్యాన్ని చూడాల్సి వస్తుందోనని ఏ ఘోరానికి సాక్షులుగా నిలబడాల్సి వస్తుందోనని అనుకుంటూ.
కానీ ఎలెక్షన్‌ ఫలితాలు రాజకీయ నాయకుల అంచనాలు తలకిందులు చేసినట్లు, వాళ్ళ అంచనాలు బొక్కబోర్లా పడ్డయి. కాలుమీద కాలు వేసుకుని కుర్చీలో కూచుని టీవీ చూస్తూ కనబడ్డాడు సత్యం. శివం అది చూసి నిర్ఘాంతపోయాడు. సుందరం మూర్ఛను బలవంతంగా ఆపుకున్నాడు. ఏమయిందిరా నీకు అని యుగళంగా అరిచారు.
చాలా రోజులైందిరా మీ ఇద్దర్నీ చూసి అందుకే ఆ పోస్టింగ్‌. నేనూహించినట్టే పరుగులు పెట్టారు కదా. ఎంతైనా మన బంధం గట్టిదిరా అన్నాడు తాపీగా సత్యం.
అంతేనా ఇంట్లో నీ 'బెటర్‌ ఆఫ్‌' కనిపించడం లేదు. వస్తువులేమీ 'కాస్ట్‌లీ' గా అనిపించడం లేదు. ఏదైనా సమస్య ఉంటే మాతో చెప్పు అన్నారిద్దరూ.
సత్యం నవ్వాడు అయాం ఆల్‌రైట్‌ అన్నాడు. శివం సుందరం వెనక్కి వెళ్ళిపోతూ వీడికేవో సమస్యలున్నయి కానీ మనకు చెప్పడం లేదు అనుకుంటూ వెళ్ళిపోయారు. తమను రప్పించటానికి ఎంత పని చేశాడ్రా వీడు అని కూడా అనుకున్నారు.
మరో నెల గడిచింది. శివం క్యాలెండర్లో ఆ నెల కాగితం చించాడు. సుందరం శివంను అనుసరించాడు. మళ్ళీ నాలుగు రోజులు సత్యం ఫోన్‌లో కనబడ్లేదు. ఆ తర్వాత వినపడ్లేదు. శివం సుందరం విమానం రైలూ టిక్కెట్లు కొన్నారు. మొదటిసారి లాగానే రెండో సారీ సారీ చెప్పాడు సత్యం. వాళ్ళను చూడాలనిపించిందన్నాడు. సమస్యేదో చెప్పవు. ఆత్మహత్య చేసుకుంటానని హడలెత్తిస్తున్నావు అని కోప్పడ్డారు శివం సుందరం. మూడవసారీ ఇది రిపీటు అయింది. తమాషాగా వుందా. పనులన్నీ మానుకుని రావాలా చిన్న నాటి స్నేహం అనుబంధం అని వస్తున్నాం. నీ ప్రాక్టికల్‌ జోక్‌కి ఛస్తున్నాం అని విసుక్కున్నారు శివం సుందరర.
ఊరికే శివం సుందరంలను పిలవడం తన సమస్య చెప్పకపోవడం సత్యానికే నచ్చలేదు. తను నిజంగా ఆత్మహత్య చేసుకోవలసిన పరిస్థితి ఉంది. ఈ సారి వాళ్ళు వస్తే నిజం చెప్పి వాళ్ళ సాయంతో ప్రాణగండం తప్పించుకోవచ్చు అనుకున్నాడు సత్యం.
నాకు జీవితమ్మీద విరక్తి కలిగింది. ఇక నేను బతకను. గుడ్‌బై శివం గుడ్‌బై సుందరం అని సెల్లులో ఘొల్లుమన్నాడు సత్యం మరోసారి.
సత్యం అసత్యం పోస్టింగ్‌ నమ్మలేదు శివం. వీడి పోస్టింగ్‌ అబద్ధం అనవసరంగా కంగారు పడవద్దు అనుకున్నాడు సుందరం. శివం విమానం ఎక్కలేదు. సుందరం రైలు టిక్కెట్టు కొనలేదు.
ఈ సారి సత్యం మర్నాటి సూర్యుణ్ణి చూడలేదు.
-చింతపట్ల సుదర్శన్‌, 9299809212
