- పాల్గొన్న ఎమ్మెల్యే పైలట్‌ రోహిత్‌ రెడ్డి, ఎమ్మెల్సీ పి. మహేందర్‌ రెడ్డి, ఆర్డీవో అశోక్‌ కుమార్‌, డీఎస్పీ. శేఖర్‌గౌడ్‌ ఆధ్వర్యంలో భారీ బందోబస్తు
- భారీగా తరలివచ్చిన ప్రజలు
- ఎఫ్‌ఎస్‌ గిరి ఆధ్వర్యంలో అన్నదాన కార్యక్రమం
నవతెలంగాణ-యాలాల
యాలాల మండలంలోని జుంటీపల్లి శ్రీ సీతారామస్వామి కల్యాణ మహౌత్సవం శ్రీరామనవమిని పురస్కరించుకొని గురువారం అంగరంగ వైభవంగా నిర్వహించారు. ఉమ్మడి రంగారెడ్డి జిల్లాలోనే జుంటి పల్లి శ్రీ సీతారామస్వామి కల్యాణం కమనీయంగా కన్నుల పండుగగా భారీ ఎత్తున ఆలయ నిర్వాహకులు అట్టహాసంగా నిర్వహిస్తారు. దేవాలయం ఈవో బాలరాజు, ఏర్పాట్లను పరిశీలించారు. దేవాలయ చైర్మన్‌ నాగేశ్వరరావు దేశ్‌ ముఖ్‌ దంపతులు పూర్ణకుంభంతో పండితుల మంత్రుచారణలతో స్వామివారికి పట్టు వస్త్రాలు తలంబ్రాలు తీసుకొచ్చారు. ఈ మహౌత్సవానికి తాండూరు శాసనసభ్యులు పైలట్‌ రోహిత్‌ రెడ్డి, స్థానిక సంస్థల ఎమ్మెల్సీ పట్నం మహేందర్‌ రెడ్డి, ఆర్డీవో అశోక్‌ కుమార్‌, బీసీ కమిషన్‌ సభ్యులు శుభప్రద్‌ పటేల్‌ , వేరువేరుగా ఆలయంలో ప్రత్యేక పూజలు చేశారు. ఎలాంటి అవాంఛనీయ సంఘటనలు జరగకుండా తాండూర్‌ డీఎస్పీ.శేఖర్‌ గౌడ్‌ ఆధ్వర్యంలో జాతర ఏర్పాట్లకు కట్టుదిట్టమైన భారీ బందోబస్తును ఏర్పాటు చేశారు. తాండూర్‌ ఆర్టీసీ డిపో నుంచి జుంటిపల్లి జాతర వరకు భక్తుల సౌకర్యం కోసం ప్రత్యేక బస్సు లను కొనసాగించారు. ప్రతి ఏటా జాతర మహౌత్సవానికి కర్ణాటక, మహారాష్ట్ర ప్రాంతాల నుంచి భక్తులు భారీగా తరలివచ్చారు. పగిడిపల్లి గ్రామానికి చెందిన వ్యాపారవేత్త ఎఫ్‌ఎస్స్‌ గిరి పెద్ద ఎత్తున అన్నదాన కార్యక్రమాన్ని నిర్వహించారు. భారీ ఎత్తున తరలివచ్చిన భక్తుల సౌకర్యం కోసం ఆలయ నిర్వహకులు అన్ని ఏర్పాట్లు చేశారు.
