- మలిదశ ఉద్యమ నాయకురాలు విమలక్క
- కడ్తాల్‌ లో మహానీయుల జ్ఞాన దీక్ష చేపట్టిన యువత
- ఘనంగా దొడ్డి కొమురయ్య జయంతి వేడుకలు
నవతెలంగాణ-ఆమనగల్‌
డాక్టర్‌ బీఆర్‌ అంబేద్కర్‌, జ్యోతిరావు పూలే, స్వామి వివేకానంద తదితర మహానీయుల ఆశయ సాధనకు ప్రతి ఒక్కరు కృషి చేయాలని మలిదశ ఉద్యమ నాయకురాలు, విప్లవ గాయని, బహుజన ముద్దుబిడ్డ విమలక్క పిలుపునిచ్చారు. కడ్తాల్‌ మండల కేంద్రములో సోమవారం యువజన సంఘాల ఐక్యవేదిక, వివేకానంద యూత్‌ అసోసియేషన్‌ ఆధ్వర్యంలో మహానీయుల జ్ఞాన దీక్ష కార్యక్రమం నిర్వహించారు. ఈకార్యక్రమానికి ముఖ్య అతిథిగా విమలక్క హాజరై మాట్లాడారు. ప్రస్తుత సమాజంలోని యువత మహానీయుల ఆశయ సాధనకు కృషి చేయాలని సూచించారు. కార్యక్రమంలో భాగంగా దొడ్డి కొమురయ్య జయంతిని పురస్కరించుకుని ఆయన చిత్రపటానికి పూలమాలలు వేసి నివాళులర్పించారు. అదేవిధంగా పలువురు యువకులు విమలక్క నేతృత్వంలో మహానీయుల జ్ఞాన దీక్షను చేపట్టారు. అంతకు ముందు ఆమె స్థానిక నాయకులతో కలిసి డాక్టర్‌ బీఆర్‌ అంబేద్కర్‌, జ్యోతిరావు పూలే, సావిత్రి బాయి పూలే తదితరుల విగ్రహాలకు పూలమాలలు వేసి నివాళులర్పించారు. వృద్ధులకు, పిల్లలకు పండ్లు పంపిణీ చేశారు. యువకులకు మహానీయు జీవిత గాథల పుస్తకాలు, భారత రాజ్యాంగం గ్రంథాలను పంపిణీ చేశారు. ఈకార్యక్రమంలో ఎంపీపీ కమ్లి మోత్యా నాయక్‌, తెలంగాణ యువజన సంఘాల ఐక్యవేదిక అధ్యక్షులు ఎర్రోళ్ల రాఘవేందర్‌, ఉపసర్పంచ్‌ రామకృష్ణ, వివిధ సంఘాల నాయకులు చందోజీ, మూడ రవి, సిలివేరు మాధవులు, శ్రీనివాస్‌ యాదవ్‌, సిద్దిగారి దాసు, లక్ష్మీనారాయణ, సంజీవ్‌, బిచ్యా నాయక్‌, వెంకటేష్‌ తదితరులు పాల్గొన్నారు.
