నవతెలంగాణ - కంటేశ్వర్
స్వర్గీయ నందమూరి తారక రామారావు జన్మదినం సందర్భంగా , తెలుగు వెలుగు , సాంస్కృతిక సమాఖ్య సంస్థ , మద్డుకూరి సాయిబాబుకు యన్ .టి.ఆర్ . స్మారక సాహితీ సామాజిక సేవా పురస్కారాన్ని  అందజేసారు. ఈ మేరకు బుధవారం నాడు, తెలుగువెలుగు ఆధ్వర్యం లో ఇందూరుయువత స్వచ్ఛంద సేవాసంస్థ కార్యాలయం లో యన్ టి ఆర్ స్మారక పురస్కార సభ జరిగింది. సభకు అధ్యక్షత వహించిన ఇందురుయువత సంస్థ గౌరవాధ్యక్షలు దారం గంగాధర్ మాట్లాడుతూ.. నిత్యం సామాజిక సాహితీ సేవలు చేస్తున్న సాయిబాబు కు ఈ పురస్కారం లభించడం సముచితం అన్నారు. అందించిన తెలుగువెలుగు సంస్థకు ధన్యవాదాలు తెలిపారు. కార్యక్రమానికి ముఖ్యాతిథిగా వచ్చిన ప్రముఖకవి డా.కాసర్ల నరేశ్ రావు మాట్లాడుతూ, యువరచయితగా ,కవిగా రాణిస్తున్న మద్దుకూరి సాయిబాబు, ఎన్నో సాహిత్యసభలను ఏర్పాటు చేసి, విజయవంతంగా నడిపించారన్నారు. నాల్గుదశాబ్దాల ఘనచరిత్ర కల్గిన తెలువెలుగు సంస్థ సాయిబాబు కు సాహితీపురస్కారం అందించడం పట్ల హర్షం వ్యక్తం చేసారు.తెలుగువెలుగు చంద్రశేఖర్ మాట్లాడుతూ.. తమ సంస్థ ద్వారా ఎంతోమందికి సేవాపురస్కారాలు అందించినామనీ, యన్ టి ఆర్ పురస్కారం నిరంతరం , అనాథలూ అభాగ్యుల సేవలలో తరిస్తున్న సాయిబాబు కు అందించడం, తమకు గౌరవంగా ఉందన్నారు. సన్మానగ్రహీత సాయిబాబు , తనకు అందిన ఈ పురస్కారం వలన మరింత బాధ్యత పెరిగిందనీ, ధన్యవాదాలు తెలిపారు. ఈ సందర్భంగా  సాయిబాబుకు సంస్థ బాధ్యులు జగన్ మోహన్, చిటిమిల్ల హరిప్రసాద్, సంజీవన్ రావు, రామేశ్వర్ రెడ్డి, బాలకిషన్, వెంకన్న, తొగర్ల సరేశ్  తదితరులు  అభినందించారు.