నవతెలంగాణ- జూబ్లీహిల్స్‌
జూబ్లీహిల్స్‌ పోలీస్‌ స్టేషన్‌ పరిధిలోని వెంకటగిరిలో ఒక ఇంటిలోనికి ఆదివారం రాత్రి దొంగతనానికి వచ్చిన దొంగ ప్రమాదవశాత్తు 4వ అంతస్తు పై నుండి కింద పడి చనిపోయిన సంఘటన జరిగింది. పోలీసులు తెలిపిన వివరాల ప్రకారం బోరబండ సపదర్‌నగర్‌లో నివాసం ఉంటున్న సయ్యద్‌ భాషా అలియాస్‌ ఇబ్రహీం (22) ఆదివారం రాత్రి మూడు గంటల సమయంలో వెంకటగిరిలోని ఒక ఇంటిలోనికి వచ్చి, 4వ అంతస్తులోనికి ప్రవేశించాడు. దొంగను గమనించిన ఇంటిలోని వారు కేకలు వేయగా తప్పించుకుని వెళ్లే సమయంలో నాలుగవ అంతస్తు నుండి కిందకు దూకగా తీవ్రంగా గాయపడి పడిపోయాడు. స్థానికుల సమాచారంతో జూబ్లీహిల్స్‌ పోలీసులు అక్కడకు చేరుకొని గాయపడిన దొంగను 108 ఆంబులెన్స్‌లో ఉస్మానియా హాస్పిటల్‌కు తరలించి వైద్యం చేయిస్తుండగా చనిపోవడం జరిగింది. జూబ్లీహిల్స్‌ ఇన్‌స్పెక్టర్‌ రాజశేఖర్‌ రెడ్డి కేసు నమోదు చేసుకొని దర్యాప్తు చేస్తున్నట్లు తెలిపారు.
