- జీహెచ్‌ఎంసీ అధికారులకు మేయర్‌ ఆదేశం
- ఉప్పల్‌ నియోజకవర్గ కార్పొరేటర్లతో సమీక్ష
నవతెలంగాణ-సిటీబ్యూరో
ఉప్పల్‌ నియోజకవర్గంలో లోతట్టు ప్రాంతాలు, ఇతర ఏరియాల్లో వర్షపు నీరు ప్రవహించడానికి ఏమైనా అడ్డంకులు ఉంటే వాటిని తొలగించాలని జీహెచ్‌ఎంసీ అధికారులను మేయర్‌ గద్వాల్‌ విజయలక్ష్మి ఆదేశించారు. డిప్యూటీ మేయర్‌ శ్రీలత, ఎమ్మెల్యే బి.సుబాష్‌రెడ్డి, ఉప్పల్‌ నియోజక కార్పొరేటర్లు, బల్దియా అధికారు లతో కలిసి రుతుపవనాల సంసిద్ధతపై గురువారం జీహెచ్‌ఎంసీ ప్రధాన కార్యాలయంలో సమీక్షా సమావేశం నిర్వహించారు. నియోజకవర్గంలో పెండింగ్‌లో ఉన్న సమస్యలను చర్చించారు. సమావేశంలో మేయర్‌ ఉప్పల్‌ అసెంబ్లీ నియోజకవర్గంలోని కార్పొరేటర్లను సమస్యల గురించి అడిగి తెలుసుకున్నారు. ప్రతి డివిజన్లో సమస్యలు నివారించడానికి, రుతుపవనాల సంబంధిత పనులను పూర్తి చేయడానికి, డీసిల్టింగ్‌ పురోగతి కోసం సూచనలు చేశారు. కార్పొరేటర్లు తమ వార్డులలో నాలా పనులను పూర్తి చేయడంపై సంతప్తి వ్యక్తం చేశారు. ఇప్పటికే ఉన్న పాత డ్రయినేజీ పైపులైన్లను అదనపు వెడల్పు పైపులతో మార్చాలని అభ్యర్థించారు. కాలనీలలో డ్రయిన్‌లను నిర్మించాలని కోరారు. ఈ సందర్భంగా మేయర్‌ మాట్లాడుతూ వర్షపు నీటి ఉచిత ప్రవాహానికి ప్రధాన అవరోధాల పట్టికను, మాన్‌సూన్‌ బృందాలు, అత్యవసర వాహనాల వివరాలను ఇవ్వాలని మేయర్‌ అధికారులను ఆదేశించారు. కాార్పొరేటర్లు తద్వారా వారు అవసరమైనప్పుడు సంప్రదించడానికి అవకాశముంటుందన్నారు. ఉదయం క్షేత్రంలో ఉండి, శానిటరీ ఫీల్డ్‌ అసిస్టెంట్లతో హాజరును ధృవీకరించండంతో పాటు కార్మికుల పనులను తనిఖీ చేయాలన్నారు. పారిశుద్ధ్యాన్ని మెరుగుపరచడానికి క్షేత్రంలో కార్పొరేటర్ల ప్రాతినిధ్యంపై జోనల్‌ కమిషనర్‌కు మేయర్‌ సమాచారం ఇచ్చారు. ఈ సమావేశానికి జోనల్‌ కమిషనర్‌ ఉపేందర్‌రెడ్డి, సూపరింటెండెంట్‌ ఇంజినీర్‌ అశోక్‌రెడ్డి, డిప్యూటీ కమిషనర్‌ అరుణకుమారి, ఎగ్జిక్యూటివ్‌ ఇంజనీర్లు, మెడికల్‌ ఆఫీసర్‌, టౌన్‌ప్లానింగ్‌ ఏసీపీ హాజరయ్యారు.
