- పలుప్రాంతాల్లో మేయర్‌, ఎమ్మెల్యేలు, కార్పొరేటర్లు హాజరు
నవతెలంగాణ-సిటీబ్యూరో
నగర పరిశుభ్రత, పచ్చదనం పెంపు ప్రధాన లక్ష్యాలుగా చేపట్టిన పట్టణ ప్రగతి కార్యక్రమం జీహెచ్‌ఎంసీలో గురువారం అట్టహా సంగా ప్రారంభమైంది. నగరానికి చెందిన మంత్రులు, మేయర్‌, డిప్యూటీ మేయర్‌, కార్పొరేటర్లు, ప్రజాప్రతినిధులు పట్టణ ప్రగతి కార్యక్రమంలో పెద్దఎత్తున పాల్గొన్నారు. ఖైరతాబాద్‌ నియోజక వర్గం దుర్గానగర్‌ కాలనీలో నిర్వహించిన పట్టణప్రగతిలో రాష్ట్ర పశు సంవర్ధక శాఖ మంత్రి తలసాని శ్రీనివాస్‌యాదవ్‌, ఎమ్మెల్యే దానంనాగేందర్‌, జీహెచ్‌ఎంసీ కమిషనర్‌ లోకేష్‌కుమార్‌, కార్పొరేటర్‌ విజయారెడ్డిలు పాల్గొని పారిశుధ్య కార్యక్రమాలను పర్యవేక్షించడంతో పాటు కాలనీపార్క్‌లో నిర్వహించిన హరిత హారంలో పాల్గొన్నారు. డిప్యూటీస్పీకర్‌ పద్మారావు స్థానిక కార్పొరేటర్‌తో కలసి చిలకలగూడలోని ఇందిరానగర్‌ నిర్వహిస్తున్న పట్టణ ప్రగతి కార్యక్రమాన్ని తనిఖీచేశారు. మధురానగర్‌లో చేపట్టిన నాలా పూడిక పనులను పరిశీలించారు. బంజారా హిల్స్‌లోని ఎమ్మెల్యే కాలనీపార్క్‌లో నిర్వహించిన పట్టణ ప్రగతి కార్యక్రమంలో మేయర్‌ గద్వాల్‌ విజయలక్ష్మి పాల్గొని మొక్కలు నాటారు. ఈ సందర్బంగా డెంగ్యూ నివారణ మాస చైతన్య కార్యక్రమాన్ని మేయర్‌ ప్రారంభించారు. ఈ కార్యక్రమంలో ఎమ్మెల్యే దానం నాగేందర్‌, జోనల్‌ కమిషనర్‌ ప్రావీణ్య ఇతర అధికారులు హాజరయ్యారు.
పట్టణ ప్రగతి కార్యక్రమంలో భాగంగా డిప్యూటీ మేయర్‌ మోతె శ్రీలతశోభన్‌రెడ్డి తార్నాక డివిజన్‌ లాలాపేట సత్యనగర్‌, సీబీఎన్‌నగర్‌లలో పాల్గొన్నారు. ప్రతి ఒక్కరూ మొక్కలు నాటి పర్యావరణాన్ని పరిరక్షించి భావితరాలకు కాలుష్యరహిత వాతావరణాన్ని అందించాలని ఆమె కోరారు. ఎల్‌బీనగర్‌ శాసన సభ్యులు డి.సుధీర్‌రెడ్డి హయత్‌నగర్‌ సర్కిల్‌లోని కార్పొరేటర్లతో కలసి పట్టణ ప్రగతిలో పాల్గొన్నారు. యూసఫ్‌గూడాలో జూబ్లీహిల్స్‌ ఎమ్మెల్యే మాగంటి గోపినాథ్‌్‌, గోషామహల్‌ ఎమ్మెల్యే రాజాసింగ్‌ గోషామహల్‌ డివిజన్‌లో పాల్గొనగా, నాంపల్లి ఎమ్మెల్యే జాఫర్‌హుస్సేన్‌ నాంపల్లిలో పాల్గొన్నారు. అంబర్‌పేట్‌ శాసన సభ్యులు కాలేరు వెంకటేష్‌ కాచిగూడలో నిర్వహించిన ప్రగతి కార్యక్రమానికి హాజరయ్యారు. కార్వాన్‌ నియోజకవర్గంలో ఎమ్మెల్యే హాజరయ్యారు. ఉప్పల్‌ ఎమ్మెల్యే బేతి సుభాష్‌రెడ్డి ఉప్పల్‌ వార్డ్‌ పరిధిలో, కుత్బుల్లాపూర్‌ ఎమ్మెల్యే కెపి.వివేకానంద్‌ గాజుల రామారం సర్కిల్‌లో స్థానిక కార్పొరేటర్‌తో కలసి పాల్గొన్నారు. పటాన్‌చెరు ఎమ్మెల్యే గూడెం మహిపాల్‌రెడ్డి స్థానికంగా పాల్గొనగా, రాజేంద్రనగర్‌ ఎమ్మెల్యే ప్రకాష్‌గౌడ్‌ ఎన్‌ఐఆర్‌డీలో నిర్వహించిన పట్టణ ప్రగతిలో పాల్గొన్నారు. శేరిలింగంపల్లి ఎమ్మెల్యే అరికపూడిగాంధీ వీవీనగర్‌ కాలనీలో పాల్గొన్నారు. కూకట్‌పల్లి ఎమ్మెల్యే మాధవరం కృష్ణారావు కేపీహెచ్‌బీ 15 ఫేజ్‌లో పాల్గొన్నారు.
