నగర సీపీ అంజనీ కుమార్‌
నవతెలంగాణ-బంజారాహిల్స్‌
ప్రస్తుత కరోనా పరిస్థితుల నేపథ్యంలో ఆరోగ్య సంరక్షణపై ప్రతి ఒక్కరూ దృష్టి సారించాలని హైదరాబాద్ నగర పోలీస్‌ కమిషనర్‌ అంజనీకుమార్‌ సూచించారు. గురువారం సోమాజిగూడలోని మ్యాక్సీవిజన్‌ ఆస్పత్రిలో ఫిక్కీ భాగస్వామ్యంతో ఏర్పాటు చేసిన ఉచిత కోవిడ్‌ వ్యాక్సినేషన్‌ సెంటర్‌ను ప్రారంభించారు. ఈసందర్భంగా ఆయన మాట్లాడుతూ ఆరోగ్యం విషయంలో క్రమశిక్షణ, నిబద్ధతతో ప్రతి ఒక్కరూ వ్యవహరించాలన్నారు. కోవిడ్‌ విజృంభణలో ప్రజల్లో అవగాహన కల్పించేందుకు పోలీసులు కీలక పాత్ర పోషించారని పేర్కొన్నారు. సీఎస్‌ఆర్‌ కార్యక్రమంలో భాగంగా ఏర్పాటుచేసిన వ్యాక్సినేషన్‌ సెంటర్‌ గురువారం నుంచి ఆదివారం వరకు కొనసాగుతుందని ఆస్పత్రి యాజమాన్యం తెలిపింది. ఈఅవకాశాన్ని ప్రతి ఒక్కరూ సద్వినియోగం చేసుకోవాలని, వివరాలకు 9390035929 సంప్రదించాలని సూచించారు. కార్యక్రమంలో ఫిక్కీ చైర్మెన్‌ మురళీధరన్‌, హాస్పిటల్‌ చైర్మెన్‌ జి.ఎస్‌.కె వేలు, కో చైర్మెన్‌ కాసు ప్రసాద్‌ రెడ్డి తదితరులు పాల్గొన్నారు.
