-నవతెలంగాణ, అడిక్‌మెట్‌/కల్చరల్‌
భక్తి టీవీ నిర్వహణలో ఎన్‌టీఆర్‌ స్టేడియంలో కోటి దీపోత్సవ సంరంభం అశేష జనవాహిని మధ్య ఉత్సాహంగా ప్రారంభమైంది. మొదటిరోజు వేద పండితులు కాళేశ్వర ముక్తేశ్వర స్వామి వారి కల్యాణాన్ని ఘనంగా నిర్వహించారు. అనంతరం హంసవాహనంపై స్వామి, అమ్మవార్లను ఊరేగించారు. దీపోత్సవంలో శ్రీశ్రీ త్రిదండి రామానుజ చిన్న జీయర్‌ స్వామి, శ్రీశ్రీ సిద్దేశ్వరానంద భారతి, అనుగ్రహ భాషణం నిర్వహించారు. శ్రీశ్రీ నోరి నారాయణమూర్తి విశేష ప్రవచనంతో భక్తులలో భక్తిభావాన్ని వెల్లువెత్తించారు. వేదికపై కాశీ స్ఫటిక లింగానికి సహస్ర కలశాభిషేకం, కోటిలింగం మల్లెల అర్చన భక్తులతో స్వయంగా చేయించారు. కార్తీక మాస దీపారాధనకు భక్తులు వందల సంఖ్యలో హాజరై ప్రాంగణాన్ని కాంతివంతం చేశారు. ఈసందర్భంగా కళాకారుల కోలాటం, నత్యాలు ఆకట్టుకున్నాయి.